కీడా కోలా.. డేట్ వచ్చేసింది

టాలీవుడ్లో ఈ తరం యూత్‌ను బాగా ఆకట్టుకున్న దర్శకుల్లో తరుణ్ భాస్కర్ ఒకడు. తన తొలి చిత్రం ‘పెళ్ళిచూపులు’ ఎంతటి సంచలనం రేపిందో తెలిసిందే. విజయ్ దేవరకొండ అనే సెన్సేషనల్ హీరో ఈ సినిమాతోనే వెలుగులోకి వచ్చాడు. టాలీవుడ్లో ఇదొక ట్రెండ్ సెట్టింగ్ మూవీగా నిలిచింది. తరుణ్ రెండో సినిమా ‘ఈ నగరానికి ఏమైంది’ కూడా యూత్‌కు మాంచి కిక్ ఇచ్చింది. కాకపోతే ‘పెళ్ళిచూపులు’ స్థాయిలో ఇది కమర్షియల్ సక్సెస్ కాలేదు. కానీ కాలక్రమంలో ఈ మూవీ కల్ట్ స్టేటస్ తెచ్చుకుంది. ఈ మధ్యే ఈ చిత్రాన్ని రీ రిలీజ్ చేస్తే అదిరిపోయే రెస్పాన్స్ వచ్చింది. యూత్‌లో తరుణ్‌కు మాంచి ఫాలోయింగ్ ఉన్నా.. అతను తరచుగా సినిమాలు చేయపోవడం తన అభిమానులకు నిరాశ కలిగించే విషయమే. ‘పెళ్ళిచూపులు’ రిలీజై ఏడేళ్లు దాటిపోగా.. ఇంకా తన మూడో సినిమా కూడా రిలీజ్ కాలేదు.

‘ఈ నగరానికి ఏమైంది’ తర్వాత చాలా గ్యాప్ తీసుకుని తరుణ్ తీసిన ‘కీడా కోలా’ కొన్ని నెలల కిందటే టీజర్‌తో ప్రేక్షకులను పలకరించింది. ఇది కూడా తరుణ్ మార్క్ యూత్‌ఫుల్, క్రేజీ ఎంటర్టైనర్ అని టీజర్ చూస్తే అర్థమైంది. టీజర్ వచ్చినప్పటి నుంచి రిలీజ్ కోసం ఎదురు చూస్తున్నారు తరుణ్ ఫ్యాన్స్. ఎట్టకేలకు ఈ సినిమా రిలీజ్ డేట్ ప్రకటించారు. నవంబరు 3న ‘కీడా కోలా’ను రిలీజ్ చేస్తున్నట్లు ఒక క్రేజీ పోస్టర్ ద్వారా వెల్లడించాడు తరుణ్. ‘301 వెడ్స్ 21’ వెబ్ సిరీస్‌తో పాపులర్ అయిన చైతన్యరావు ఈ చిత్రంతో కథానాయకుడిగా పరిచయం అవుతున్నాడు. తరుణ్ భాస్కర్ సైతం ఓ కీలక పాత్ర పోషిస్తున్న ఈ సినిమాలో బ్రహ్మానందం కూడా ఒక ప్రత్యేక పాత్ర చేశాడు. దసరా సినిమాల సందడి ముగిశాక.. వచ్చే తొలి వీకెండ్‌ను ‘కీడా కోలా’ టార్గెట్ చేసింది. ట్రైలర్ కూడా తరుణ్ శైలిలో క్రేజీగా ఉంటే ఈ సినిమాకు మంచి ఓపెనింగ్స్ రావడం ఖాయం.