కీర్తి సురేష్ 'బుజ్జి'.. గేమ్ ఛేంజర్ అవుతుందా?

హీరోయిన్ కీర్తి సురేష్ కు సౌత్ సినీ ఇండస్ట్రీలో స్పెషల్ క్రేజ్ ఉన్న విషయం తెలిసిందే. హోమ్లీ బ్యూటీ ఇమేజ్ తో పాటు గ్లామర్ ఇమేజ్ కూడా కీర్తి సురేష్ సొంతం. అందం, అభినయంతో తనదైన శైలిలో అలరిస్తోంది. మహానటి సినిమాతో విమర్శకుల ప్రశంసలు అందుకున్న కీర్తి.. ఇప్పుడు వరుస విజయాలతో మంచి ఫామ్ లో ఉంది. ముఖ్యంగా దసరా, మమ్మానమ్ వంటి పలు సినిమాలు కీర్తి కెరీర్ కు మంచి బూస్టప్ ఇచ్చాయని చెప్పవచ్చు.

ప్రస్తుతం కోలీవుడ్ లో వరుస సినిమాలు చేస్తోంది కీర్తి సురేష్. దాంతోపాటు బాలీవుడ్ డెబ్యూ బేబీ జాన్ లో నటిస్తోంది. వరుణ్ ధావన్ సరసన ఆ మూవీలో యాక్ట్ చేస్తోంది కీర్తి. దీంతోపాటు మరిన్ని అవకాశాలు ఆమె అందుకుంటున్నట్లు తెలుస్తోంది. ఇటీవల అక్క అనే వెబ్ సిరీస్ కూడా కమిట్ అయింది కీర్తి. ఈ వెబ్ సిరీస్ లో హీరోయిన్ రాధికా ఆప్టే కూడా నటిస్తోంది. ఇద్దరూ కూడా గ్లామర్ షో చేయనున్నట్లు వార్తలు వస్తున్నాయి.

ఇక డిఫరెంట్ ప్రాజెక్టులతో బిజీగా ఉన్నా కీర్తి సురేష్.. రీసెంట్ గా మరో ఆఫర్ దక్కించుకున్న విషయం తెలిసిందే. పాన్ ఇండియా స్టార్ ప్రభాస్ కల్కి 2898 ఏడీ మూవీలో భాగమైంది. సినిమాలోని ప్రభాస్ స్పెషల్ వెహికల్ బుజ్జికి సంబంధించిన ఏఐ రోబో గ్యాడ్జెట్ కు వాయిస్ ఓవర్ ఇచ్చింది. మేకర్స్ నిన్న గ్లింప్స్ రిలీజ్ చేశాక.. అందరూ గ్యాడ్జెట్ కు కీర్తి సురేష్ వాయిస్ ఓవర్ బాగా సెట్ అయిందని నెట్టింట కామెంట్లు పెడుతున్నారు.

అందుకోసం కీర్తి బాగా కష్టపడినట్లు కూడా తెలుస్తోందని చెబుతున్నారు. ఎందుకంటే.. ఈ గ్లింప్స్ లో డైలాగ్స్ డిఫరెంట్ వేరియేషన్స్ లో ఉన్నాయి. దీంతో సందర్భానుసారం కీర్తి సురేష్ వాయిస్ ఓవర్ పర్ఫెక్ట్ గా ఇచ్చిందని కొనియాడుతున్నారు. ఎంతైనా మహానటి కదా అంటూ ఆకాశానికెత్తేస్తున్నారు. అయితే ప్రస్తుతం తెలుగులో అవకాశాలు కోసం ఎదురుచూస్తోంది కీర్తి. పాన్ ఇండియా లెవెల్ లో క్రేజీ దక్కించుకోవాలని ట్రై చేస్తోంది.

ఇదే సమయంలో పాన్ ఇండియా మూవీ కల్కిలో కీర్తి సురేష్ భాగమవ్వడం విశేషం. దానికి తోడు.. అమ్మడు వాయిస్ ఓవర్ అందించిన గ్యాడ్జెట్ సినిమాలో కీలక పాత్ర పోషిస్తున్నట్లు తెలుస్తోంది. దీంతో కీర్తి సురేష్.. ఆ గ్యాడ్జెట్ వల్ల పాన్ ఇండియా లెవల్ లో క్రేజ్ సంపాదించుకునే అవకాశం ఉందని ఫ్యాన్స్ చెబుతున్నారు. మరి కల్కి 2898 ఏడీ మూవీ.. కీర్తి సురేష్ కు గేమ్ ఛేంజర్ గా నిలుస్తుందా లేదా అనేది తెలియాలంటే వేచి చూడాలి.