షారుక్ ఖాన్ పిలుపు కోసం కీర్తి సురేష్ వెయిటింగ్!

మాలీవుడ్ బ్యూటీ కీర్తి సురేష్ వ‌రుస విజ‌యాల‌తో మ‌ళ్లీ ఫామ్ లోకి వస్తోంది. టాలీవుడ్ లో 'ద‌స‌రా'...కోలీవుడ్ 'మ‌మ్మాన‌మ్' లాంటి సినిమాలు కీర్తిని బ‌లంగానే ప్రోజెక్ట్ చేస్తున్నాయి. అంత‌కుముందు వ‌ర‌కూ వ‌రుస ప‌రాజ‌యాల్లో ఉన్న అమ్మ‌డికి ఈ రెండు విజ‌యాలు బూస్టింగ్ లా నిలిచాయి. అలాగే కొత్త అవ‌కాశాలు బాగానే క్యూ క‌డుతున్నాయి. హీరోయిన్ గానే న‌టించాలి? అన్న ఆలోచ‌న చెరిపేసి పాత్ర మంచిదైతే ఎలాంటి సినిమా అయినా చేయ‌డానికి రెడీగా ఉండ‌టంతో కీర్తి ఇంటి త‌లుపు ఛాన్సులు బాగానే త‌డుతున్నాయి.

ప్ర‌స్తుతం కోలీవుడ్ లో నాలుగైదు సినిమాలు చేస్తోంది. తెలుగు లో చిరంజీవి హీరో గా న‌టిస్తోన్న 'భోళా శంక‌ర్' లో సిస్ట‌ర్ రోల్ పోషిస్తోంది. మ‌రి కీర్తి సురేష్‌కి డ్రీమ్ రోల్ అంటూ ఏదైనా ఉందా? ఏ హీరోతో న‌టించాలి? ఏ ద‌ర్శ‌కుడితో ప‌నిచేయాలి? వంటి ఆశ‌లు ఏవైనా ఉన్నాయా? అంటే ఉన్నాయ‌నే అంటోంది. బాలీవుడ్ లో షారుక్ ఖాన్ తో సినిమా చేయాలంటోంది. కెరీర్ ముగిసేలోపు బాద్ షాతో ఒక్క సినిమా అయినా చేసి తెర‌ పై క‌నిపించాలంటోంది.

షారుక్ అభిమానిగా ఆ సినిమా లో న‌టించాలంటోంది. అలాగే సంజ‌య్ లీలా భ‌న్సాలీతో ద‌ర్శ‌క‌త్వంలో ఓ సినిమా చేయాలంటోంది. కీర్తికి ఇష్ట‌మైన ద‌ర్శ‌కుడుట‌. ఆయ‌న మేకింగ్...చారిత్రాత్మ‌క సినిమాలంటే అస్స‌లు వ‌దిలిపెట్ట‌దుట‌. ఇండియ‌న్ గ్రేట్ డైరెక్ట‌ర్ల‌లో ఆయ‌న ఒక‌రు అంది. షారుక్-సంజ‌య్ ప‌నిచేస్తే ఆ ఛాన్స్ త‌న‌కే రావాల‌ ని దేవుణ్ని కోరుకుంటుందిట‌. వాళ్లిద్ద‌రి పిలుపు కోసం వెయిట్ చేస్తున్నా అంటోంది.

కీర్తి ఇంకా హిందీ ప‌రిశ్ర‌మ‌లో కి ఎంట్రీ ఇవ్వ‌ని సంగ‌తి తెలిసిందే. మాలీవుడ్ సినిమాల ద్వారా టాలీవుడ్..కోలీవుడ్ లో లాంచ్ అయింది. మ‌హాన‌టి లాంటి సినిమాతో పాన్ ఇండియా లో గుర్తింపు ద‌క్కించుకుంది. దివంగ‌త లెజెండ‌రీ సావిత్రి పాత్ర‌లో కీర్తి ప‌ర‌కాయ ప్ర‌వేశం దేశ వ్యాప్తంగా క్రేజ్ తీసుకొచ్చింది. ఆ క్రేజ్ ని ఎన్ క్యాష్ చేసుకోవ‌డంలో మాత్రం విఫ‌ల‌మైంది. ఆ సినిమా త‌ర్వాత చెప్పుకోద‌గ్గ అవ‌కాశాలు రాలేదు.