KGF 3: అంటే సలార్ 2 షెడ్డుకేనా?

కన్నడ రాకింగ్ స్టార్ యష్, ప్రశాంత్ నీల్ కాంబినేషన్ లో వచ్చిన కేజీఎఫ్ సిరీస్ ఎంత పెద్ద సక్సెస్ అయ్యిందో అందరికి తెలిసిందే. ముఖ్యంగా “కేజీఎఫ్ చాప్టర్ 2” అయితే వరల్డ్ వైడ్ గా 1250 కోట్ల కలెక్షన్స్ ని సొంతం చేసుకొని రికార్డ్ సృష్టించింది. ఇండియన్ బాక్సాఫీస్ నుంచి వచ్చి వరల్డ్ వైడ్ గా అత్యధిక కలెక్షన్స్ అందుకున్న సినిమాల జాబితాలో “కేజీఎఫ్ చాప్టర్ 2” నాలుగో స్థానంలో ఉంది. “కేజీఎఫ్ చాప్టర్ 2”లో రాకీభాయ్ బంగారంతో సముద్రంలో మునిగిపోయినట్లు చూపించారు.

అయితే అక్కడితో రాకీభాయ్ క్యారెక్టర్ ఎండ్ అయిపోయిందని అందరూ అనుకున్నారు. కానీ “కేజీఎఫ్ చాప్టర్ 3” కూడా ఉంటుందని ఆ మధ్య హోంబలే ఫిలిమ్స్ అధినేత కేజీఎఫ్ సిరీస్ ప్రొడ్యూసర్ విజయ్ కిరంగదూర్ క్లారిటీ ఇచ్చారు. స్టోరీ కూడా రెడీ అయిపోయిందని చెప్పారు. ప్రశాంత్ నీల్ కేజీఎఫ్ ఫ్రాంచైజ్ లో పార్ట్ 3 కోసం అద్భుతమైన కథని సిద్ధం చేసాడని చెప్పారు. అయితే “కేజేఎఫ్ చాప్టర్ 3” ఒక వేళ చేయాలన్న 2026 తర్వాతనే సాధ్యం అవుతుందని అందరూ అనుకున్నారు.

కానీ ఇప్పుడు 2025లోనే ప్రశాంత్ నీల్ “కేజీఎఫ్ చాప్టర్ 3” స్టార్ట్ చేస్తారనే ప్రచారం తెరపైకి వచ్చింది. ప్రస్తుతం ప్రశాంత్ నీల్ జూనియర్ ఎన్టీఆర్ తో “డ్రాగన్” మూవీ స్టార్ట్ చేశారు. ఈ సినిమా రెగ్యులర్ షూటింగ్ ఒకటి, రెండు నెలల్లో మొదలవుతుందని టాక్ వినిపిస్తోంది. 2026 సంక్రాంతి కానుకగా ఈ చిత్రాన్ని రిలీజ్ చేయనున్నట్లు నిర్మాణ సంస్థ ప్రకటించింది. ప్రశాంత్ నీల్ గత ఏడాది “సలార్” సినిమాతో ప్రేక్షకుల ముందుకొచ్చారు. ఈ మూవీ కమర్షియల్ గా సక్సెస్ అయ్యింది.

“సలార్” కి సీక్వెల్ గా “శౌర్యంగ పర్వం” సినిమాని ప్రశాంత్ నీల్ స్టార్ట్ చేయాల్సి ఉంది. కచ్చితంగా ఈ ఏడాదిలో “సలార్ 2” పూర్తి చేసి 2025లో రిలీజ్ చేస్తారని అందరూ భావించారు. అయితే ఎందుకనో సడెన్ గా “సలార్2” పక్కన పెట్టి ప్రశాంత్ నీల్ ఎన్టీఆర్ తో “డ్రాగన్” స్టార్ట్ చేశారు. అయితే ఇప్పుడు 2025లో “కేజీఎఫ్ చాప్టర్ 3” మూవీ స్టార్ట్ చేస్తారనే టాక్ తెరపైకి రావడంతో “సలార్ 2” మూవీ ఉంటుందా అనే ప్రశ్న వినిపిస్తోంది. డార్లింగ్ ప్రభాస్ అభిమానులు “సలార్2” పై క్లారిటీ ఇవ్వాలని సోషల్ మీడియాలో అడుగుతున్నారు.

గతంలో “సలార్ 2” ఆగిపోయిందని జరిగిన ప్రచారాన్ని నిర్మాత విజయ్ కిరంగదూర్ ఖండించారు. అయితే ప్రశాంత్ నీల్ “డ్రాగన్” మూవీ స్టార్ట్ చేయడంతో మరోసారి “సలార్ 2”పై పబ్లిక్ కి డౌట్ స్టార్ట్ అయ్యింది. ఇప్పుడు “కేజీఎఫ్ చాప్టర్ 3” వచ్చే ఏడాదిలోనే మొదలవుతుందనే ప్రచారంతో అనుమానాలు మరింత బలపడుతున్నాయి. “సలార్2” సినిమాపై క్లారిటీ ఇవ్వాలని డిమాండ్ చేస్తూ డార్లింగ్ ఫ్యాన్స్ పోస్టులు పెడుతున్నారు.