కిరణ్ అబ్బవరం 'క' కలెక్షన్స్.. 2వ రోజు కూడా అదే జోరు

టాలీవుడ్‌లోకి టాలెంటెడ్ యువ హీరోలు ఎంత మంది ఉన్నా కూడా అందులో డిఫరెంట్ గా సినిమాలు చేసే వారి సంఖ్య చాలా తక్కువగా ఉంది. అలాంటి వారిలో కిరణ్ అబ్బవరం ఒకరు. ఆరంభంలోనే మంచి విజయాలను అందుకున్న ఈ కుర్రాడు.. మధ్యలో తడబడినా వరుసగా సినిమాలు చేస్తున్నాడు. ఇలా తాజాగా ‘క’ అనే సినిమాతో ప్రేక్షకుల ముందుకు వచ్చాడు.

సుజిత్, సందీప్ దర్శకత్వంలో క్రేజీ కాన్సెప్టుతో రూపొందిన ‘క’ మూవీ మిస్టరీ థ్రిల్లర్ ఎంటర్‌టైనర్‌గా రూపొందింది. దీంతో ఈ చిత్రం నుంచి వచ్చిన ప్రమోషన్ కంటెంట్ ప్రేక్షకుల హృదయాలను దోచుకున్నాయి. ఫలితంగా ఈ మూవీపై అంచనాలు క్రమక్రమంగా పెరుగుతూ వచ్చాయి. అలా భారీ అంచనాల నడుమ ఈ చిత్రం అక్టోబర్ 31వ తేదీన వైభవంగా విడుదలైంది. అందుకు తగ్గట్లుగానే దీనికి మంచి మౌత్ టాక్ కూడా లభించింది.

కిరణ్ అబ్బవరం నటించిన ‘క’ సినిమాకు మొదటి రోజు ప్రపంచ వ్యాప్తంగా అన్ని ఏరియాలనూ కలుపుకుని రూ. 6.18 కోట్లు గ్రాస్‌ను వసూలు చేసింది. తద్వారా అతడి కెరీర్‌లోనే అత్యధిక వసూళ్లను సాధించిన సినిమాగా ఇది రికార్డును నమోదు చేసుకుంది. ఇదే జోరును ఈ సినిమా రెండో రోజు కూడా చూపించింది. అలా అదిరిపోయే రెస్పాన్స్‌ను సొంతం చేసుకుని మరో రూ. 6.82 కోట్లు రాబట్టింది.

ఆద్యంతం ఆసక్తిని రేకెత్తించే కథాంశంతో రూపొందిన ‘క’ సినిమాకు రెండు రోజుల్లో అద్భుతమైన స్పందన సొంతం అయింది. తద్వారా ఈ చిత్రం రెండు రోజుల్లోనే వరల్డ్ వైడ్‌గా రూ. 13 కోట్లు గ్రాస్‌ను వసూలు చేసింది. దీంతో వేగంగా ఈ మార్కును చేరుకున్న కిరణ్ అబ్బవరం చిత్రంగా ఇది మరో రికార్డును నమోదు చేసింది. ఇదే ఊపు కొనసాగిస్తే ఈ చిత్రం మూడు రోజుల్లోనే బ్రేక్ ఈవెన్ టార్గెట్‌ను చేరుకుంటుందని చెప్పొచ్చు. అంతేకాదు, ఈ మూవీ డిస్ట్రిబ్యూటర్లకు, ఎగ్జిబిటర్లకు సైతం భారీ లాభాలను అందించే దిశగా సాగుతోంది.

టాలెంటెడ్ హీరో కిరణ్ అబ్బవరం హీరోగా సుజిత్, సందీప్ తెరకెక్కించిన ‘క’ సినిమా యూఎస్‌లో సైతం ఊహించని రీతిలో స్పందనను అందుకుంటోంది. ఫలితంగా ఇది రెండు రోజుల్లోనే 330K డాలర్ల గ్రాస్‌ను కలెక్ట్ చేసింది. అంటే భారతీయ కరెన్సీలో రూ. 2.77 కోట్లు వసూలు చేసింది. ఇది కూడా కిరణ్ అబ్బవరం కెరీర్‌లో బెస్ట్ అని ట్రేడ్ వర్గాలు వెల్లడించాయి. ఇక, ఈ చిత్రంలో నయన్ సారిక, తన్వీ రామ్ హీరోయిన్లుగా చేశారు. సామ్ సీఎస్ దీనికి సంగీతం అందించారు. అలాగే, ఈ సినిమాలో అచ్యుత్ కుమార్, అన్నపూర్ణ, అజయ్, శరణ్య ప్రదీప్ తదితరులు నటించారు.