SSMB 29 : నిర్మాతకు ఆ విషయాలు ఏవీ తెలియవట!

సూపర్ స్టార్‌ మహేష్ బాబు హీరోగా రాజమౌళి దర్శకత్వంలో రూపొందబోతున్న సినిమా ఎప్పుడెప్పుడు ప్రారంభం అవుతుందా అంటూ గత రెండేళ్లుగా ప్రేక్షకులు ఎదురు చూస్తున్నారు. ఎట్టకేలకు ఈ క్రేజీ కాంబో మూవీ ప్రీ ప్రొడక్షన్‌ వర్క్ షురూ అయ్యాయి. ఇప్పటికే పలు దఫాలుగా రాజమౌళి, మహేష్ బాబు ఇతర టీమ్‌ మెంబర్స్‌ భేటీ అయ్యారు.

తాజాగా ఈ సినిమా నిర్మాత శ్రీదుర్గ ఆర్ట్స్ అధినేత కేఎల్‌ నారాయణ ఒక ఇంటర్వ్యూలో ఆసక్తికర వ్యాఖ్యలు చేశాడు. ఆయన మాట్లాడుతూ మహేష్‌, రాజమౌళి సినిమా కథ రెడీ అయ్యింది. ఆ కథ నాకు తెలుసు. కథ చర్చల సమయంలో నేను పాల్గొన్నాను అన్నాడు.

సినిమా షూటింగ్‌ ఎప్పుడు ప్రారంభం అయ్యేది, విడుదల ఎప్పుడు అయ్యేది ఇంకా ఇతర విషయాల గురించి మాత్రం తాను చెప్పలేను అన్నాడు. ఆ విషయాలు అన్నీ కూడా కేవలం రాజమౌళికి మాత్రమే తెలుసు అన్నట్లుగా కేఎల్‌ నారాయణ ఆ ఇంటర్వ్యూలో చెప్పుకొచ్చాడు.

సాధారణంగా నిర్మాతలకు వారు నిర్మించే సినిమాలకు సంబంధించిన అన్ని విషయాలు తెలుస్తూ ఉంటారు. కొందరు నిర్మాతలు దర్శకులను డామినేట్‌ చేస్తూ అన్నీ తామే అన్నట్లుగా వ్యవహరిస్తూ ఉంటారు. కానీ ఇది రాజమౌళి సినిమా. కనుక హీరో, నిర్మాతల కంటే కూడా రాజమౌళి నిర్ణయాలే ఫైనల్‌.

సినిమా విషయాలు తెలిస్తే ఏంటి, తెలియకుంటే ఏంటి.. రాజమౌళి తో సినిమా అంటే డబ్బులు ఎన్నైనా పెట్టి చల్లటి గుడ్డ వేసుకుని పడుకోవచ్చు. కనుక కేఎల్‌ నారాయణకు షూటింగ్‌ స్టార్ట్, విడుదల తేదీల విషయంలో అస్సలు టెన్షన్‌ అక్కర్లేదు. అందుకే నారాయణ ఆ విషయాలను పట్టించుకోవడం లేదు.

రాజమౌళి గత సినిమాల ఫలితాల నేపథ్యంలో కేఎల్‌ నారాయణ ఎంత ఖర్చు చేసినా దానికి పది రెట్ల లాభం దక్కడం ఖాయం. అందుకే ఈ సినిమా తర్వాత నిర్మాత కేఎల్‌ నారాయణ మళ్లీ నిర్మాతగా వరుస సినిమాలు నిర్మించే అవకాశాలు ఉన్నాయి.