కృతి స‌నోన్‌ని ఫాలో అవుతున్న షాడో?

క‌థానాయిక‌ల డేటింగ్ వ్య‌వ‌హారాలు యువ‌త‌ను ఎక్కువ‌గా ఆక‌ర్షిస్తుంటాయి. ప‌లువురు క‌థానాయిక‌ల డేటింగులు, సీక్రెట్ పెళ్లి సంగ‌తులపై బోలెడంత చ‌ర్చ సాగింది. అదే కోవ‌లో ఇప్పుడు యంగ్ బ్యూటీ కృతి స‌నోన్ డేటింగ్ పై ప్ర‌జ‌ల్లో ఆస‌క్తి నెల‌కొంది. కృతి ఇంత‌కుముందు ప్ర‌ముఖ‌ వ్యాపారవేత్త కబీర్ బహియాతో క‌నిపించ‌డంతో వారిమ‌ధ్య రొమాంటిక్ డేట్ గురించి పుకార్లు మొద‌ల‌య్యాయి. గ్రీకు ద్వీపం మైకోనోస్‌లో ఇద్దరూ కలిసి కనిపించిన తర్వాత ఊహాగానాలు మ‌రింత‌గా ఊపందుకున్నాయి. అక్కడ ఈ అంద‌మైన జంట వెకేష‌న్‌ని ఆస్వాధిస్తూ క‌నిపించారు.

సోషల్ మీడియాల్లో ఈ వార్త నిరంత‌రం హాట్ టాపిక్ గా మారింది. ముఖ్యంగా రెడ్డిట్‌లో మైకోనోస్‌లో లైవ్‌ పార్టీలో కృతి సనన్ - కబీర్ బహియా ఫోటోలు లీక్ కాగానే దీనిపై వేడిగా చ‌ర్చ సాగింది. ప్ర‌ఖ్యాత బాలీవుడ్ వెబ్ లో కొన్ని ఫోటోలు విడుద‌ల కాగానే.. అందులో ఆ ఇద్ద‌రి మ‌ధ్యా ర్యాపో గురించి ఫ్యాన్స్ ముచ్చ‌టించుకున్నారు. ఎంతో ఉత్సాహభరితమైన వాతావరణాన్ని ఆస్వాధిస్తున్నార‌ని, ఇది క‌చ్ఛితంగా డేటింగే సుమీ! అంటూ ఊహాగానాలు మొద‌ల‌య్యాయి. డేట్ గురించి ముచ్చ‌ట సాగుతుండ‌గానే.. దాని గురించి చెప్ప‌కుండానే కబీర్ బహియా తన ఇన్‌స్టాలో అదే ప్రదేశం నుండి ఒక ఫోటోను షేర్ చేసి, లొకేషన్‌ను ట్యాగ్ చేశాడు.. దీంతో వారి అనుబంధంపై అభిమానులలో మరింత ఉత్సుకత పెరిగింది.

ఈ జంట న‌డుమ రొమాన్స్ కి సంబంధించిన‌ రూమర్స్ ఇప్పుడే కొత్త కాదు. ఈ సంవత్సరం ప్రారంభంలో దుబాయ్‌లో జరిగిన నూతన సంవత్సర వేడుకల సందర్భంగా కృతి- కబీర్, ఆమె సోదరి నూపుర్ సనన్, క్రికెటర్ ఎంఎస్ ధోని, అత‌డి భార్య సాక్షి ధోని సహా వారి స్నేహితులతో కనిపించారు. ఈ ఫోటోలు వైర‌ల్ కాగానే మ‌రింత‌గా ఊహాగానాలు మొద‌ల‌య్యాయి. కృతి ఈ సంవత్సరం లండన్‌కు అనేకసార్లు ప‌య‌న‌మైంది. బ్రిట‌న్‌లో ఉన్న కబీర్‌ను చూడటానికే వెళుతోంద‌ని అభిమానులు ఊహిస్తున్నారు. మేలో కబీర్‌ని క‌లుసుకుంద‌ని భావించేలా కొన్ని లీకులు కూడా ఇచ్చింది కృతి. సోషల్ మీడియాల‌లో లండ‌న్ నగరంపై తనకున్న అభిమానం ఎలాంటిదో షేర్ చేసింది. అంతేకాదు... కృతి - కబీర్ లండన్‌లో నడుస్తూ చేతులు పట్టుకుని ఉన్న ఫోటోలు బ‌య‌ట‌ప‌డ‌డంతో డేటింగ్ పుకార్లకు మరింత ఆజ్యం పోశాయి. వారు తమ సంబంధాన్ని అధికారికంగా ధృవీకరించనప్పటికీ వారి మధ్య ఉన్న స్థిరమైన క‌నెక్ష‌న్స్ స్నేహాన్ని మించి అనే సందేహాల‌కు తావిస్తున్నాయి. కబీర్ క్రికెటర్ ఎంఎస్ ధోనీకి సన్నిహిత మిత్రుడు. సాక్షి ధోనీకి ద‌గ్గ‌ర వాడు. వారితో కృతి త‌ర‌చుగా క‌నిపిస్తోంది. వారి సామాజిక వర్గాలను మరింతగా పెనవేసుకుని ఉండ‌డం కూడా డేటింగ్ పుకార్ల‌కు తావిస్తోంది.

కృతి సనన్ తన కెరీర్ పరంగా బిజీగా ఉంది. షాహిద్ కపూర్‌తో `తేరీ వ‌త‌న్ మే ఐసా ఉల్జా జియా`.. కరీనా కపూర్ ఖాన్ ,టబుతో కలిసి క్రూ లో న‌టించ‌గా రెండు చిత్రాలకు మంచి ఆదరణ లభించింది. శశాంక చతుర్వేది దర్శకత్వం వహిస్తున్న ఓటీటీ చిత్రం `దో పట్టి`తో కృతి నిర్మాతగా పరిచయం కానుంది. ఈ ప్రాజెక్ట్ కృతి కెరీర్‌లో ఒక ముఖ్యమైన దశ. నటనకు మించిన ఇత‌ర ల‌క్ష్యాలు త‌న‌కు ఉన్నాయ‌ని ఇది నిరూపిస్తోంది.