అమీర్ అతిగా న‌టించాడ‌ని రాజ‌మౌళి అన్నారా! KRK ర‌చ్చేంటి?

కొన్నిసార్లు జ‌రగ‌నివి జ‌రిగిన‌ట్టు.. జ‌రిగిన‌వి జ‌ర‌గ‌న‌ట్టు భ్ర‌మింప‌జేసేవి సోష‌ల్ మీడియాలు. నిజాల్ని వ‌క్రించ‌డం ఇక్క‌డ ష‌రా మామూలే. ఇలాంటి వేదిక‌లపై డిబేట్లు అంత‌గా ప‌ట్టించుకోన‌వ‌స‌రం లేద‌నేది నిపుణుల మాట‌. కానీ ఇప్పుడు ద‌ర్శ‌క‌ధీరుడు ఎస్.ఎస్.రాజ‌మౌళి మిస్ట‌ర్ ప‌ర్ఫెక్ట్ అమీర్ ఖాన్ ని అలా అన్నారు!! అంటూ ఒక వార్త ప్ర‌చారంలో ఉంది. ఫారెస్ట్ గంప్ రీమేక్ 'లాల్ సింగ్ చ‌డ్డా దారుణ వైఫ‌ల్యానికి కార‌ణం "అమీర్ ఖాన్ ఓవ‌రాక్టింగేనంటూ" రాజ‌మౌళి వ్యాఖ్యానించార‌ని అమీర్ క‌జిన్, ద‌ర్శ‌కుడు మ‌న్సూర్ ఖాన్ వెల్ల‌డించారని కొన్ని బాలీవుడ్ మీడియాల్లో క‌థ‌నాలొచ్చాయి. దీనికి కొన‌సాగింపుగా వివాదాస్ప‌ద‌ విమ‌ర్శ‌కుడు కేఆర్కే ర‌చ్చ పీక్స్ కి చేరుకుంది. అస‌లు దీనివెన‌క ఇంకా ఏం జ‌రిగింది? అన్న వివ‌రాల్లోకి వెళితే..

అమీర్ ఖాన్ న‌టించిన - లాల్ సింగ్ చద్దా 2022లో విడుద‌లై బాక్సాఫీస్ వద్ద డిజాస్టర్‌గా నిలిచింది. ఆస్కార్ బ‌రిలో నిలిచిన బ్లాక్ బ‌స్ట‌ర్ మూవీ 'ఫారెస్ట్ గంప్'కి రీమేక్ గా వ‌చ్చిన ఈ చిత్రం ఫెయిల‌వ్వ‌డం అమీర్ ని తీవ్రంగా నిరాశ‌ప‌రిచింది. వైఫ‌ల్యానికి అమీర్ ఖాన్ స్వ‌యంగా బాధ్యత తీసుకున్నాడు. అప్ప‌టినుంచి ఆయ‌న‌ సినిమాలకు కాస్త విరామం ఇచ్చారు. ఇప్పుడు లాల్ సింగ్ చద్దా వైఫ‌ల్యంపై రాజ‌మౌళి కామెంట్ చేసార‌ని క‌థ‌నాలొచ్చాయి. ఆ చిత్రంలో అమీర్ ఖాన్ అతిగా నటించాడని బాహుబలి- RRR చిత్రాల దర్శకుడు SS రాజమౌళి భావించినట్లు బాలీవుడ్ మీడియాల్లో క‌థ‌నాల రావ‌డం హాట్ టాపిక్ గా మారింది. ఇంత‌లోనే రాజ‌మౌళిపై వివాదాస్ప‌ద క్రిటిక్ కేఆర్కే కామెంట్లు చేయ‌డం ఈ వివాదానికి మ‌రింత ఆజ్యం పోస్తోంది.

ఒక రెడ్డిట్ పోస్ట్ చేసిన వివ‌రాల ప్ర‌కారం... మ‌న్సూర్ ఖాన్ ఇలా అన్నారు. "భారతీయ సినిమాకు కొన్ని అతిపెద్ద చిత్రాలను అందించిన SS రాజమౌళి వంటి వారు పనితీరును విమర్శించినప్పుడు, అమీర్ ఆలోచించాల్సిన సమయం ఆసన్నమైంది" అని మ‌న్సూర్ వ్యాఖ్యానించిన‌ట్టు రెడ్డిట్ పోస్ట్ చేసారు. "రాజమౌళి లాంటి వారు నాకు ఓవర్‌యాక్టింగ్ లాగ్ రహా హై అని చెప్పినప్పుడు, నేను ఇస్కో భీ లాగ్ రహా హై తో కియా హై హోగా అని చెప్పాను" అని అమీర్ ఖాన్‌తో ఒక సాధారణ సంభాషణలో మ‌న్సూర్ చెప్పాడని Reddit వినియోగదారు ఒక న్యూస్ వైర్ ఏజెన్సీ నివేదిక నుండి కోట్ తీసుకున్నట్లు పేర్కొన్నాడు. దీంతో ఇది బాలీవుడ్ మీడియాలో హెడ్ లైన్స్ కి కార‌ణ‌మైంది.

ఇంత‌లోనే సందు చూసి రంగంలోకి దిగిన‌ విమ‌ర్శ‌కుడు కేఆర్కే త‌న నోటికి ప‌ని చెప్పాడు. అత‌డు త‌న ట్విట్ట‌ర్ లో రాజ‌మౌళి అబద్ధాలకోరు .. కాపీ మాస్టర్ అని కామెంట్ చేసాడు. రాజమౌళి 'లాల్ సింగ్ చద్దా' ప్రివ్యూ చూసినప్పుడు దానిని మాస్టర్ పీస్ అని పొగిడేశార‌ని KRK ట్వీట్ చేశాడు. రాజమౌళిని మోసపూరిత ద‌ర్శ‌కుడు అంటూ కామెంట్ చేసాడు. నిజానికి రాజ‌మౌళి అన్నారో లేదో కానీ ఈయన వీరంగం ఇప్పుడు డిబేట‌బుల్ గా మారింది. ఇదిలా ఉంటే అమీర్ ఖాన్ ఇంకా ఏ సినిమాని ప్రకటించలేదు. అతను ఫర్హాన్ అక్తర్‌తో 'కాంపియోన్స్' రీమేక్ కోసం చర్చలు జరుపుతున్నట్లు సమాచారం.