అనుదీప్.. అనుకున్నట్లే పర్ఫెక్ట్ హీరో సెట్టయ్యాడుగా..

జాతిరత్నాలు చిత్రంతో ఒక్కసారిగా ప్రేక్షకుల మనసుల్లో జెట్ స్పీడ్ లో నిలిచిపోయిన దర్శకుడు అనుదీప్. ఇక ఆ సినిమా తర్వాత కూడా తన ప్రత్యేకమైన కామెడీ టైమింగ్ ను కొనసాగించాలని అనుకున్నాడు. అయితే తరువాత శివకార్తికేయన్‌తో చేసిన ప్రిన్స్ చిత్రం కమర్షియల్‌గా ఆడలేదు. ఈ ఫ్లాప్ కెరీర్‌పై ప్రభావం చూపుతుందేమో అనుకున్నప్పటికీ, అనుదీప్ క్రేజ్ మాత్రం అసలు తగ్గలేదు. ఎక్కడ ఈవెంట్స్ కు వెళ్లినా ఫ్యాన్స్ విజిల్స్ తో అతనికి మంచి డిమాండ్ ఉందని చెప్పకనే చెప్పారు.

ప్రిన్స్ అనంతరం పెద్దగా గ్యాప్ తీసుకోకుండానే అనేక కథలను ప్రముఖ హీరోలకు వినిపించాడు. వెంకటేష్ కోసం కథను సిద్ధం చేసినప్పటికీ, అది కార్యరూపం దాల్చలేదు. కానీ విశ్వక్ సేన్ మాత్రం అనుదీప్ కథను ఆసక్తిగా విన్నాడు. విశ్వక్ తన డిఫరెంట్ టైమింగ్ నటనతో విభిన్నమైన కథలతో ప్రయోగాలు చేస్తూ ఉంటాడు. ఇక అనుదీప్ చెప్పిన కథపై మొదట పాజిటివ్‌గా స్పందించిన విశ్వక్, కొన్ని మార్పులు సూచించినట్లు తెలుస్తోంది.

ఆ మార్పులు చేసిన తర్వాత, ఇన్నాళ్ళకు ఫైనల్‌గా ఈ ప్రాజెక్ట్‌కు గ్రీన్ సిగ్నల్ ఇచ్చారని సమాచారం. ఈ ప్రాజెక్ట్‌ను సితార ఎంటర్టైన్మెంట్స్ పతాకంపై నిర్మించబోతున్నారు. సితార ఎంటర్టైన్మెంట్స్‌లో ఇప్పటికే విశ్వక్ సేన్ నటించిన గ్యాంగ్స్ ఆఫ్ గోదావరి మంచి గుర్తింపును తెచ్చుకుంది. ఆ సినిమా నుండి వచ్చిన అనుభవంతో ఈ ప్రాజెక్ట్ మరింత అంచనాలు పెంచుకుంది. విశ్వక్ సేన్ తన కెరీర్‌లో ఈ చిత్రాన్ని ఒక డిఫరెంట్ మూవీగా మార్చాలని చూస్తున్నాడు.

ఇక అనుదీప్ కథా నిర్మాణం పై కూడా మంచి అంచనాలున్నాయి. ఆయన చిత్రాలకు ఒక ప్రత్యేకమైన కామెడీ టైమింగ్ ఉండటం, ప్రేక్షకులకు నవ్వుల పండగగా అనిపించడం తెలిసిందే. ఇప్పుడు అదే మాజిక్‌ను విశ్వక్ సేన్‌తో మళ్ళీ రిపీట్ చేస్తాడని చిత్రబృందం ఆశిస్తోంది. ఈ ప్రాజెక్ట్ కేవలం హాస్య ప్రధానంగా కాకుండా విభిన్నమైన ఎమోషన్లను కూడా చూపుతుందనే టాక్ వినిపిస్తోంది.

ఈ సినిమా గురించి పూర్తి వివరాలు త్వరలోనే అధికారికంగా ప్రకటించనున్నారు. కథ, ఇతర నటీనటుల ఎంపిక, టెక్నికల్ టీమ్ వివరాలు తెలియాల్సి ఉంది. ఇక అనుదీప్‌కు ఈ ప్రాజెక్ట్ చాలా కీలకం. జాతిరత్నాలు విజయంతో వచ్చిన పాజిటివ్ క్రేజ్‌ను నిలబెట్టుకోవడానికి, ఈ సినిమా విజయవంతం కావాల్సిన అవసరం ఉంది. ఇక ఇటీవల విశ్వక్ సేన్ మెకానిక్ రాకీ సినిమాతో ప్రేక్షకుల ముందుకు వచ్చాడు. ఆ సినిమాలో కూడా అతని నటనకు మంచి గుర్తింపు లభించింది. అలాగే మరికొన్ని ప్రాజెక్టులతో బిజీగా ఉన్నాడు. ఇక అనుదీప్ ప్రాజెక్ట్ ను ఎప్పుడు స్టార్ట్ చేస్తారో చూడాలి.