ఖాన్ వార‌సుడిని కాకా ప‌డుతున్న న‌టి?

మెగా హీరో సాయిధ‌ర‌మ్ స‌ర‌స‌న `తిక్క` సినిమాలో న‌టించింది లారిస్సా బోనెస్సి. ఈ విదేశీ మోడల్ కం న‌టి తొలి సినిమా ప‌రాజ‌యంతో తీవ్రంగా నిరాశ‌ప‌డింది. ఆ త‌ర్వాత పూర్తిగా బాలీవుడ్ ప్ర‌య‌త్నాలతోనే స‌రిపెట్టుకుంది. మోడ‌లింగ్ అసైన్ మెంట్లు, సింగిల్ ఆల్బ‌మ్స్ తో బండి లాగించేందుకు అల‌వాటు ప‌డింది.

అయితే ఇటీవ‌ల కింగ్ ఖాన్ షారూఖ్ వార‌సుడు ఆర్యన్ ఖాన్ తో లారిస్సా స‌న్నిహితంగా ఉంటోంద‌ని పుకార్లు షికార్ చేసాయి. ఆర్యన్ - లారిస్సా బోనేసిల జంట షికార్ల‌ గురించి కొంతకాలంగా పుకార్లు వినిపిస్తున్నాయి. గత సంవత్సరం ఒక సంగీత కచేరీలో ఇద్దరూ కలిసి కనిపించినప్పుడు ఊహాగానాలు మొదలయ్యాయి. వారు ఈవెంట్‌కు హాజరైన వీడియో సోషల్ మీడియాలో వైరల్‌గా మారింది. అయితే ఆర్యన్ కానీ లారిస్సా కానీ.. త‌మ మ‌ధ్య‌ సంబంధాన్ని ధృవీకరించక‌పోయినా కానీ.. వారి సోషల్ మీడియా స్నేహం ర‌క‌ర‌కాల ఊహాగానాలకు ఆజ్యం పోసింది.

ఇప్పుడు లారిస్సా నేరుగా కింగ్ ఖాన్ వార‌సురాలు సుహానాతో స్నేహంగా ఉంటోంది. తాజాగా అనంత్ అంబానీ- రాధిక మర్చంట్‌ల గ్రాండ్ వెడ్డింగ్ వేడుకల్లో సుహానా స్పెష‌ల్ లుక్‌పై లారిస్సా కామెంట్ ప‌లు ఊహాగానాలకు తావిచ్చింది. షారుఖ్ ఖాన్ కుమార్తె సుహానా ఖాన్ పెళ్లిలో సంప్రదాయ దుస్తులలో అద్భుతంగా కనిపించింది. శుభ్ ఆశీర్వాద్ వేడుక కోసం తన సొగసైన రూపాన్ని ప్రదర్శించే వరుస ఫోటోలను సుహానా ఖాన్ ఇన్‌స్టాగ్రామ్‌లో షేర్ చేయ‌గా వాటికి లారిస్సా రిప్ల‌య్ ఇచ్చింది. బ్రెజిలియన్ మోడల్ కం నటి సుహానా లుక్ పై తన అభిమానాన్ని వ్యక్తం చేస్తూ, ఒక కిరీటం ఎమోజీ, రివాల్వింగ్ హార్ట్స్‌, హార్ట్-ఐ ఎమోజీలను షేర్ చేసింది.

లారిస్సా ఇంత‌కుముందు సైఫ్ అలీ ఖాన్-నటించిన `గో గోవా గాన్‌`లో ఒక చిన్న పాత్రలో న‌టించింది. అటుపై అక్షయ్ కుమార్ - జాన్ అబ్రహంతో పాటు `దేశీ బాయ్జ్‌`లోని సుబా హోనే నా దే అనే పాటలో డాన్సర్‌గా క‌నిపించింది. తెలుగు చిత్ర పరిశ్రమలో లారిస్సా ఎంట్రీ ఇచ్చింది. సాయి ధరమ్ తేజ్‌తో కలిసి యాక్షన్-కామెడీ తిక్కలో నాయిక‌గా న‌టించింది.

పాపుల‌ర్ బ్రాండ్‌ల కోసం ప్రకటనల‌లో కూడా కనిపించింది. అదే సమయంలో ఆర్యన్ ఖాన్ వినోద పరిశ్రమలో తనదైన మార్గాన్ని ఏర్పరుచుకుంటున్నాడు. కొన్ని ప్ర‌క‌ట‌న‌ల‌కు ద‌ర్శ‌క‌త్వం వ‌హించ‌డ‌మే గాక‌.. `స్టార్ డమ్` అనే వెబ్ సిరీస్ తో దర్శకుడిగా పరిచయం కాబోతున్నాడు. ఈ సిరీస్‌లో షారుఖ్ ఖాన్, రణబీర్ కపూర్, రణవీర్ సింగ్, కరణ్ జోహార్, బాబీ డియోల్ అతిధి పాత్రలలో క‌నిపించ‌నుండ‌గా, మోనా సింగ్ ముఖ్యమైన పాత్రలో నటించనున్నారు. ప్ర‌క‌ట‌న‌ల రూప‌క‌ల్ప‌న స‌మ‌యంలోనే లారిస్సాతో అత‌డికి ప‌రిచ‌యం పెరిగింది. ఇప్పుడు దీనిపై ర‌క‌ర‌కాల ఊహాగానాలు సాగుతున్నాయి. బ్రెజిలియ‌న్ మోడ‌ల్ కింగ్ ఖాన్ వార‌సుడిని, అత‌డి సోద‌రిని కాకా ప‌డుతోందంటూ కామెంట్లు వినిపిస్తున్నాయి.