స్టార్ హీరో భార్య‌ను దూరం పెట్టిన‌ ఆడ‌ప‌డుచులు

అత్త మామ‌లు, ఆడ‌ప‌డుచుల‌తో కోడ‌లు 'కూతురు'లా క‌లిసిపోవ‌డం నూటికో కోటికో సాధ్యం. కొత్త కుటుంబంలో అడుగు పెట్టే అమ్మాయికి 'కోడ‌లు' హోదాలో ఎలాంటి ప‌రిస్థితులు ఉంటాయో చెప్ప‌లేం. అలాంటి ఒక సంక్లిష్ఠ స్థితిని తాను ఎదుర్కొన్నాన‌ని, స్టార్ హీరో సంజయ్ దత్ కుటుంబంలో కలిసిపోవడం మొదట్లో కష్టమైంద‌ని మాన్య‌తా ద‌త్ ఓ ఇంట‌ర్వ్యూలో వెల్లడించారు.

మాన్య‌త 2008లో సంజయ్ దత్‌ని వివాహం చేసుకున్నారు. ఆ ఇంట్లో అడుగుపెట్టాక‌ ఆడ‌ప‌డుచుల‌ నుండి అంగీకారం పొందడం మొదట్లో కష్టంగా ఉండేద‌ని మాన్య‌త ఒకానొక ఇంట‌ర్వ్యూలో తెలిపారు. కోర్టు కేసులు జైలు జీవితంతో సంజయ్ దత్ తన జీవితంలో అనేక సవాళ్లను ఎదుర్కొన్నాడు. తెరపై పాపుల‌ర్ హీరోగా వెలుగొందుతున్నా కానీ.... అతడు మాదకద్రవ్యాల వ్యసనం, పోలీసు కేసులతో తన జీవితాన్ని కష్టతరం చేసుకున్నాడు. అయితే ద‌త్ జీవితంలోకి మాన్య‌త ప్ర‌వేశం అనూహ్య మ‌లుపు. సవాళ్లను ఎదుర్కొంటున్న స‌మ‌యంలో సంజ‌య్ ద‌త్ కి ఆమె మ‌ద్ధ‌తుగా నిలిచారు. దత్ 7 ఫిబ్రవరి 2008న మాన్య‌తా దత్‌ను వివాహం చేసుకున్నారు. అప్పటి నుండి ఈ జంట అన్యోన్య దాంప‌త్యం బలంగా కొనసాగుతోంది. అయితే ప్రారంభంలోనే తాను అత్త ఇంట్లో స్థిరపడటం అంత సులభంగా జ‌ర‌గ‌లేద‌ని మాన్య‌త‌ వెల్లడించారు.

తనను అంగీకరించేలా సంజయ్ దత్ సోదరీమణులను అనుకూలంగా మార్చుకోవ‌డం త‌న‌కు ఇష్టం లేదని మాన్య‌త తెలిపారు. సంజయ్ దత్ 2008లో మాన్య‌త‌ను వివాహం చేసుకున్నప్పుడు అత‌డికి ఇంట్లో ఇద్దరు సోదరీమణులు ఉన్నారు. అయితే వారు కుటుంబంలో మాన్య‌త‌ను త్వ‌ర‌గా అంగీకరించలేదు. ఇది విభేదాలకు కారణమైంది. మాన్య‌త‌ 2009లో IANSతో ఇంటర్వ్యూలో ఈ విష‌యాల‌ను బ‌హిరంగంగా ముచ్చ‌టించారు. ''అత‌డి సోదరీమణులతో అంగీకారం పొందేందుకు నేను నా సామర్థ్యంతో ఎంతగానో ప్రయత్నించానని సంజూకు తెలుసు. అంతకు మించి నన్ను నేను పుష్ చేయ‌డం ఆయ‌న‌(భ‌ర్త‌)కు ఇష్టం ఉండదు. నేను కూడా అలా చేయను..'' అని తెలిపారు.

పెళ్లి తర్వాత తనపై వచ్చిన నెగిటివ్ కామెంట్స్‌పైనా మాన్య‌త‌ స్పందించింది. కుటుంబ సమస్యలతో పాటు చాలా మంది అభిమానులు మాన్య‌తా దత్‌ని విమర్శించారు. సంజయ్ దత్ జీవితంలో అన‌వ‌స‌రంగా ప్ర‌వేశించింద‌ని దునుమాడారు. జ‌నం మాన్య‌త‌ను నిందించడానికి ఆమె నేపథ్యం గురించి త‌వ్వి తీసారు. అయితే అన్ని ఆరోపణలకు ధైర్యంగా నిల‌బ‌డి మాన్య‌తాద‌త్ సమాధానమిచ్చింది. తన భర్తతో కోరుకున్న విధంగా జీవించే హక్కు తనకు ఉందని చెప్పింది. ''నాకు తెలుసు.. కానీ నేను చెప్పదలుచుకున్నది ఏమిటంటే.. నా భర్తతో నాకు నచ్చిన విధంగా జీవించే హక్కు నాకు ఉంది.. అది వేశ్య అయినా.. యువరాణి అయినా పర్వాలేదు.. భర్త ఇంట్లో భార్యకు కొన్ని హక్కులు ఉంటాయి. నేను స్త్రీ ఇంట్లో నివసించే వ్యక్తిని కాదు.. భ‌ర్త‌తో నివ‌శిస్తాను'' అని మాన్య‌త తెలిపింది.

మాన్య‌త‌ను బెస్ట్ హాఫ్ అన్నాడు:

అన్నిర‌కాల‌ సవాళ్లు ఎదురైనా కానీ.. సంజయ్ దత్ - మాన్య‌తా దత్ సంబంధం కాల పరీక్షకు ఎదురు నిలిచింది. సంజయ్ దత్ సోదరీమణులు, దత్ మొద‌టి వివాహంలో జ‌న్మించిన‌ కుమార్తె త్రిషాలా దత్‌తో చివ‌రికి మాన్య‌త మంచి సంబంధాన్ని పెంచుకుంది. కాల ప‌రీక్ష‌కు నెగ్గి 2010లో షహరాన్, ఇక్రా అనే కవలలకు మాన్య‌త‌-ద‌త్ తల్లిదండ్రులు అయ్యారు. తనకు అతిపెద్ద సహాయ వ్యవస్థగా ఉన్నందుకు తన భార్య పట్ల కృతజ్ఞతలు తెలియజేయడంలో స్టార్ హీరో సంజ‌య్ ద‌త్ ఎప్పుడూ విఫలం కాలేదు. ఒక మీడియా ఇంటర్వ్యూలో మాన్య‌త తన 'బెటర్ హాఫ్' కాదని, తన 'బెస్ట్ హాఫ్' అని ద‌త్ చెప్పాడు. ఈ జంట అన్యోన్య‌త‌, స‌హ‌నానికి ఇప్పుడు స‌త్ఫ‌లితం ద‌క్కింది. వారు ఇప్పుడు ఎంతో సంతోషంగా కోరుకున్న జీవితాన్ని కొన‌సాగిస్తున్నారు.