కియారాకి పోటీగా అలియా దిగుతుందా!

`మూంజ్య‌`, `స్త్రీ-2` లాంటి భారీ విజ‌యాల‌తో మ‌డాక్ ఫిల్మ్స్ బాలీవుడ్ లో సంచ‌ల‌న నిర్మాణ సంస్థ‌గా మారిపో యింది. ఈ రెండు విజ‌యాల‌తో కంటెంట్ బేస్ట్ చిత్రాలు నిర్మించ‌డంలో మ‌డాక్ యూనిక్ సంస్థ‌గా హైలైట్ అయింది. దీంతో ఇప్పుడు హీరోయిన్ల అంద‌రి చూపు ఆసంస్థ‌పైనే పండింది. స‌ద‌రు నిర్మాణ సంస్థ‌లో ఛాన్స్ వ‌స్తే ముందుగా ఎస్ చెప్పిన త‌ర్వాతే స్టోరీ వినాలని డిసైడ్ అయిపోతున్నారు. అంత‌గా మ‌డాక్ పాపుల‌ర్ అవుతుంది.

త‌దుప‌రి ప్రాజెక్ట్ లో భాగంగా మ‌డాక్ ఇప్ప‌టికే కియారా అద్వానీ తో చ‌ర్చ‌లు జ‌రిపిన‌ట్లు వార్త‌లొస్తున్నాయి. ఇటీవలే అమ్మ‌డు దినేష్ విజన్ కార్యాలయంలో కనిపించడంతో విష‌యం దాదాపు క‌న్ప‌మ్ గానే క‌నిపిస్తుంది. అతీంద్రీయ‌ అంశాలతో పాటు ఫాంటసీ కామెడీని మిళితం చేసిన కాన్సెప్ట్ ఇది. అయితే ఇప్పుడీ సినిమా కోసం అలియాభ‌ట్ రంగంలోకి దిగింద‌నే ప్ర‌చారం ఊపందుకుంది. కియారా త‌ర్వాత అలియాభ‌ట్ కూడా మ‌డాక్ కార్యాల‌యంలో క‌నిపించిన‌ట్లు బాలీవుడ్ మీడియాలో వార్త‌లొస్తున్నాయి.

సుమారు మూడు గంట‌ల పాటు ఆమె దినేష్ విజ‌న్ తో భేటీ అయిన‌ట్లు స‌మాచారం. దీంతో మ‌డాక్ సంస్థ‌లోకి అలియా కూడా ఎంట్రీ ఇస్తుందా? అన్న‌ది ఆస‌క్తిక‌రంగా మారింది. అయితే కియారా స్థానంలో అలియాభ‌ట్ ని ప‌రిశీలిస్తున్నారా? లేక ఇద్ద‌ర్నీ ప్రాజెక్ట్ లో భాగం చేస్తున్నారా? లేక అలియాతో స‌ప‌రేట్ చిత్రాన్ని ప్లాన్ చేస్తున్నారా? అన్న‌ది అస్ప‌ష్టం. ఎందుకంటే అలియాతో చేసే చిత్రం హర్రర్ కామెడీ యూనివర్స్‌లో కొత్త ప్రాజెక్ట్ గా ప్లాన్ చేస్తున్నారా? అన్న ప్ర‌చారం కూడా ఉంది. మ‌రి దీనిపై స్ప‌ష్ట‌త రావాల్సి ఉంది.

ఈనేప‌థ్యంలో అలియాభట్-కియారా మ‌ధ్య వ్య‌త్యాసం తెర‌పైకి వ‌స్తోంది. సోలోగా బాక్సాఫీస్ వ‌ద్ద స‌త్తా చాటిన ఘ‌న‌త అలిభ‌ట్ సొంతం. గంగూబాయి క‌తియావాడి లాంటి చిత్రంతో తానేంటో రుజువు చేసింది. ఇటీవ‌లే రిలీజ్ అయిన జిగ్రా ఫెయిలైనా అంత ప్ర‌భావం చూప‌లేదు. ఇక కియారాకి అయితే ఇంకా ఆ ర‌క‌మైన అనుభ‌వం లేదు. ఈ నేప‌థ్యంలో ఇద్ద‌రిలో ఎవ‌రు మ‌డాక్ సంస్థ‌కు ఫ్యావ‌రెట్ గా మారుతారు? అన్న‌ది చూడాలి.