రామ్‌ మూవీ కోసం ట్యాలెంటెడ్‌ టాప్‌ టెక్నీషియన్‌

ఎనర్జిటిక్ స్టార్‌ రామ్‌ చాలా కథలు విన్న తర్వాత ఎట్టకేలకు మహేష్ బాబు పచ్చిగొల్ల దర్శకత్వంలో సినిమాను చేసేందుకు రెడీ అయ్యారు. మైత్రి మూవీ మేకర్స్‌ బ్యానర్‌లో రూపొందుతున్న ఈ సినిమా పూజా కార్యక్రమాలు ఇటీవలే జరిగాయి. పుష్ప 2 వంటి బిగ్గెస్ట్‌ మూవీని నిర్మించిన మైత్రి మూవీ మేకర్స్ వారి బ్యానర్‌లో రూపొందుతున్న సినిమా అవ్వడంతో రామ్‌22 సినిమాపై అంచనాలు భారీగా ఉన్నాయి. ఇప్పటికే ఈ సినిమా ద్వారా మహేష్ బాబు సరికొత్త కథను ప్రేక్షకుల ముందుకు తీసుకు రాబోతున్నారు అంటూ మేకర్స్‌ చెబుతూ సినిమాపై అంచనాలు పెంచుతూ వస్తున్నారు.

తాజాగా ఈ సినిమా కోసం ప్రముఖ సినిమాటోగ్రాఫర్‌ మధు నీలకందన్‌ వర్క్ చేయబోతున్నట్లుగా అధికారికంగా ప్రకటించారు. సినిమా కాన్సెప్ట్‌ కి ఈయన సినిమాటోగ్రఫీ అయితేనే బాగుంటుంది అనే ఉద్దేశ్యంతో దర్శకుడు మహేష్ బాబుతో పాటు నిర్మాతలు భావించారని అందుకే ఆయన్ను రంగంలోకి దించేందుకు సిద్ధం అయ్యారని తెలుస్తోంది. ఆయన భారీ పారితోషికం డిమాండ్‌ చేసినా గ్రీన్‌ సిగ్నల్‌ ఇచ్చారని తెలుస్తోంది. సూపర్‌ స్టార్‌ మోహన్‌లాల్‌ మూవీ మలైక్కోట్టై వాలిబన్‌కి సినిమాటోగ్రఫీ అందించడం ద్వారా విమర్శకుల ప్రశంసలు దక్కించుకున్న మధు నీలకందన్‌ తెలుగు ప్రేక్షకుల అభిరుచికి తగ్గట్లుగా రామ్‌ 22 సినిమాకు వర్క్ చేస్తాడనే విశ్వాసం వ్యక్తం అవుతోంది.

ఈ సినిమాలో రామ్‌కి జోడీగా భాగ్యశ్రీ బోర్సే హీరోయిన్‌గా నటిస్తోంది. ఇటీవల షూటింగ్‌ లాంచనంగా ప్రారంభం అయింది. రెగ్యులర్‌ షూటింగ్‌కి ఏర్పాట్లు జరుగుతున్నాయి. మైత్రి మూవీ మేకర్స్‌ వారు ఈ సినిమాను చాలా స్పీడ్‌గా నిర్మించేందుకు ఏర్పాట్లు చేస్తున్నారు. అందులో భాగంగానే వరుసగా డేట్లు తీసుకున్నారని తెలుస్తోంది. సమ్మర్‌ చివరి వరకు సినిమాను ప్రేక్షకుల ముందుకు తీసుకు వచ్చే ఉద్దేశ్యంతో మహేష్ బాబు వర్క్‌ చేస్తున్నారని సైతం ఇండస్ట్రీ వర్గాల ద్వారా సమాచారం అందుతోంది. మొత్తానికి రామ్‌, మహేష్ బాబు కాంబో మూవీ పై రోజు రోజుకు అంచనాలు పెంచుతూ వస్తున్నారు.

మలైక్కోట్టై వాలిబన్‌ సినిమా కమర్షియల్‌గా నిరాశ పరచినా కంటెంట్‌ పరంగా విమర్శకుల ప్రశంసలు దక్కించుకుంది. ముఖ్యంగా సినిమాటోగ్రఫీ విషయంలో ప్రశంసలు దక్కాయి. అందుకే రామ్‌ సినిమా కోసం ఈ సినిమాటోగ్రాఫర్‌ ని ఎంపిక చేయడం జరిగిందని తెలుస్తోంది. మలయాళం, తమిళ్‌, హిందీ, కన్నడంలో పలు సినిమాలకు సినిమాటోగ్రాఫీ అందించిన మధు నీలకందన్‌ గతంలోనే తెలుగు సినిమాలకు వర్క్‌ చేయాల్సి ఉన్నా కొన్ని కారణాల వల్ల క్యాన్సిల్‌ అయింది. ఎట్టకేలకు ఆయన తెలుగులో రామ్‌ హీరోగా మహేష్ బాబు దర్శకత్వంలో మైత్రి మూవీ మేకర్స్ నిర్మిస్తున్న సినిమాకు వర్క్‌ చేస్తున్నారు. తెలుగులో ఆయన ముందు ముందు మరిన్ని సినిమాలకు వర్క్ చేసే అవకాశాలు లేకపోలేదు.