సూపర్ స్టార్‌ సినిమాల రీ రిలీజ్ ప్లాన్‌..!
సూపర్ స్టార్‌ మహేష్ బాబు ఈ ఏడాది ఆరంభంలో గుంటూరు కారం సినిమాతో ప్రేక్షకుల ముందుకు వచ్చిన విషయం తెల్సిందే.
By: Tupaki Desk | 11 Nov 2024 5:31 AM GMT
సూపర్ స్టార్‌ మహేష్ బాబు ఈ ఏడాది ఆరంభంలో గుంటూరు కారం సినిమాతో ప్రేక్షకుల ముందుకు వచ్చిన విషయం తెల్సిందే. ఆ సినిమా భారీ విజయాన్ని సొంతం చేసుకుంటుందని, రికార్డ్‌ స్థాయి వసూళ్లు సాధిస్తుందని అంతా భావించారు. కానీ త్రివిక్రమ్‌ దర్శకత్వంలో వచ్చిన ఆ సినిమా బాక్సాఫీస్ వద్ద నిరాశ పరిచింది. ప్రస్తుతం రాజమౌళి సినిమా కోసం మహేష్ బాబు రెడీ అవుతున్నాడు. జుట్టు గడ్డం పెంచిన మహేష్ బాబు ఇప్పటికే ఏడాది కాలంగా కొత్త సినిమాలను ప్రేక్షకుల ముందుకు తీసుకు రాలేదు, రాజమౌళి సినిమా ఇంకా ప్రారంభం కాలేదు కనుక విడుదలకు కనీసం రెండేళ్ల సమయం పట్టవచ్చు. అంటే గుంటూరు కారం తర్వాత మూడు ఏళ్లకు మహేష్ బాబు సినిమా వచ్చే అవకాశం ఉంది.
మహేష్ బాబు సినిమాలు ఇప్పట్లో విడుదల లేని కారణంగా ఫ్యాన్స్‌ కోసం పలు సినిమాలను రీ రిలీజ్ చేయడం కోసం డిస్ట్రిబ్యూటర్స్ ఆసక్తి చూపిస్తున్నారు. మహేష్ బాబు నటించిన సూపర్ హిట్ సినిమాలను మాత్రమే కాకుండా ఫ్లాప్ అయిన ఖలేజా, అతడు వంటి సినిమాలను సైతం రీ రిలీజ్ చేయాలని ప్రయత్నాలు చేస్తున్నారు. మహేష్ బాబు కి ప్రస్తుతం ఉన్న క్రేజ్ నేపథ్యంలో గతంలో ఉన్న సినిమాలు సైతం ఇప్పుడు థియేటర్‌లలో విడుదల అయి మంచి వసూళ్లు సాధించే అవకాశాలు ఉన్నాయి. ముఖ్యంగా ఖలేజా, అతడు, ఆగడు, టక్కరి దొంగ సినిమాలను ఈ రెండేళ్ల కాలంలో రీ రిలీజ్ చేసే అవకాశాలు ఉన్నాయని తెలుస్తోంది.
మహేష్ బాబు కెరీర్‌లో ఇప్పటి వరకు సూపర్ డూపర్‌ హిట్‌లతో పాటు అదే స్థాయి ఫ్లాప్‌లు వచ్చాయి. ఫ్లాప్ సినిమాల్లో కొన్ని ప్రేక్షకులకు ఇప్పుడు నచ్చేవి ఉంటాయనే అభిప్రాయం వ్యక్తం అవుతోంది. ఆ మధ్య రామ్‌ చరణ్ డిజాస్టర్ మూవీ ఆరెంజ్ రీ రిలీజ్ అయ్యి భారీ వసూళ్లు సాధించిన విషయం తెల్సిందే. ఇప్పుడు అదే తరహాలో మహేష్ బాబు ఫెయిల్‌ మూవీస్ ని వరుసగా ప్రేక్షకుల ముందుకు తీసుకురావడం ద్వారా మళ్లీ క్యాష్ చేసుకునే ఉద్దేశ్యంతో సినిమాల నిర్మాతలు, డిస్ట్రిబ్యూటర్స్ ఉన్నారని తెలుస్తోంది. త్వరలోనే మహేష్ బాబు సినిమాల రీ రిలీజ్ అనౌన్స్మెంట్‌ వచ్చే అవకాశాలు ఉన్నాయి.
గుంటూరు కారం సినిమా నిరాశ పరిచిన నేపథ్యంలో మహేష్ బాబు ఫ్యాన్స్‌ ప్రస్తుతం చేస్తున్న రాజమౌళి సినిమాపై అంచనాలు భారీగా పెట్టుకుని ఉన్నారు. ఇటీవల మహేష్ బాబు, రాజమౌళి సినిమా గురించి దర్శక నిర్మాత తమ్మారెడ్డి భరద్వాజ ఒక ఇంటర్వ్యూలో మాట్లాడుతూ.. రూ.1000 కోట్ల బడ్జెట్‌, రూ.2000 కోట్ల ప్రీ రిలీజ్ బిజినెస్‌, నాలుగు వేల కోట్ల రూపాయల వసూళ్లు ఆ సినిమా చేయబోతుందని, హాలీవుడ్‌లోనూ సూపర్ హిట్ అయ్యే విధంగా రాజమౌళి సినిమాను తీస్తారనే నమ్మకంను ఆయన వ్యక్తం చేశారు. బాక్సాఫీస్ లెక్కలు అప్పటి వరకు పూర్తిగా మారి పోతాయి అంటూ తమ్మారెడ్డి అభిప్రాయం వ్యక్తం చేశారు.
