అరెరే.. మహేష్ ఇన్ని హిట్ మూవీస్ వదులుకున్నారా?

టాలీవుడ్ సూపర్ స్టార్ మహేష్ బాబు.. ఆయనకున్న క్రేజే వేరు. రెండు తెలుగు రాష్ట్రాల్లో మహేష్ కు ఎందరో డై హార్డ్ ఫ్యాన్స్ ఉన్న విషయం తెలిసిందే. ఆయన నటించిన సినిమాలు ఎప్పుడు వస్తాయోనని ఎదురుచూస్తుంటారు. ఒక మూవీ రిలీజ్ అయ్యాక నెక్స్ట్ సినిమా అప్డేట్ కోసం వెయిట్ చేస్తుంటారు. అయితే చివరగా గుంటూరు కారం మూవీతో ప్రేక్షకుల ముందుకు వచ్చిన ఆయన.. ఇప్పుడు దర్శకధీరుడు ఎస్ ఎస్ రాజమౌళితో కలిసి SSMB 29 కోసం వర్క్ చేయనున్నారు.

అయితే మహేష్ బాబు.. జక్కన్న సినిమా కోసం ఫుల్ మేకోవర్ చేసుకుంటున్నట్లు ఇప్పటికే క్లారిటీ వచ్చేసింది. గుబురు గడ్డం, ఫుల్ హెయిర్ తో ఇదివరకే పలుమార్లు కెమెరాకు చిక్కారు. త్వరలో SSMB 29 మూవీ షూటింగ్ స్టార్ట్ కానున్నట్లు తెలుస్తోంది. అయితే మహేష్ బాబు.. ఇప్పటికే తెలుగులో సూపర్ స్టార్ అయినా అనేక సూపర్ హిట్ ప్రాజెక్టులు వదులుకున్న విషయం తెలుసా? ఆ సినిమాలేంటి? ఆయన వదులుకున్న చిత్రాలు ఎవరు చేశారు మరి? వంటి పలు వివరాలు మీకోసం.

గత ఏడాది చివర్లో వచ్చి సూపర్ హిట్ అయిన యానిమల్ మూవీ ఫస్ట్ మహేష్ దగ్గరికి వెళ్లిందట. కానీ మూవీలోని హీరో పాత్ర తీరు నచ్చకపోవడంతో ఆయన రిజెక్ట్ చేశారని వినికిడి. దీంతో రణ్ బీర్ కపూర్ ఆ ఛాన్స్ అందుకుని అలరించారు. అంతకుముందు కోలీవుడ్ స్టార్ డైరెక్టర్లు అట్లీ తెరకెక్కించిన జవాన్, మణిరత్నం రూపొందించిన పొన్నియన్ సెల్వన్ ప్రాజెక్టుల స్క్రిప్టులు మహేష్ వద్దకే వెళ్లాయని తెలుస్తోంది. కానీ కొన్ని కారణాల వల్ల ఆయన రిజెక్ట్ చేసినట్లు సమాచారం.

బ్లాక్ బస్టర్ హిట్ పుష్ప మూవీ మహేష్ చేయాల్సిందట. మొదట కొరటాల శివ ఆయనకే కథ చెప్పగా, హీరో మేకోవర్ నచ్చక సూపర్ స్టార్ గ్రీన్ సిగ్నల్ ఇవ్వలేదని అప్పట్లో టాక్ వినిపించింది. ఆ తర్వాత అల్లు అర్జున్ ఒప్పుకోవడం.. నటించడం.. భారీ క్రేజ్ సంపాదించుకోవడం.. నేషనల్ అవార్డు అందుకోవడం.. ఇవన్నీ తెలిసిందే. ఇప్పుడు సీక్వెల్ కూడా రిలీజ్ కు సిద్ధమవుతోంది. అంతకుముందు 2016లో వచ్చిన సూర్య 24 మూవీ కూడా మహేష్ రిజెక్ట్ చేసిన స్క్రిప్టేనట.

శేఖర్ కమ్ముల తెరకెక్కించిన ఫిదా సినిమా అందరినీ ఫిదా చేసిన విషయం తెలిసిందే. మహేష్ చేయాల్సిన ఆ సినిమాను వరుణ్ తేజ్ దక్కించుకుని మంచి హిట్ అందుకున్నారు. స్టార్ హీరోయిన్ సమంత డెబ్యూ మూవీ ఏ మాయ చేసావేలో హీరోగా మహేష్ నటించాల్సిందని తెలుస్తోంది. కానీ ఆయన అప్పుడు కొన్ని కారణాల వల్ల రిజెక్ట్ చేశారట. 2008లో సంచలనం సృష్టించిన గజినీ మూవీ కోసం మురుగుదాస్ ముందుగా మహేష్ ను సంప్రదించారని సమాచారం.

ఆయన ఓకే చెప్పకపోవడంతో సూర్యకు ఆ ఛాన్స్ దక్కింది. ప్రభాస్ కెరీర్ లో ప్రత్యేక స్థానమున్న వర్షం మూవీ మహేష్ బాబే చేయాల్సింది. కానీ ఆయన వదులుకోవడంతో డార్లింగ్ చేశారు. 22 ఏళ్ల క్రితం వచ్చి ఇప్పటికీ అదే క్రేజ్ మెయింటైన్ చేస్తున్న ఇడియట్ మూవీలో హీరోగా మహేషే అనుకున్నారట పూరీ. అయితే ఆయన రిజెక్ట్ చేయడంతో రవితేజ చేశారు. ఏదేమైనా ఈ బ్లాక్ బస్టర్ హిట్ చిత్రాలు చేసి ఉంటే మహేష్ క్రేజ్ మరో స్థాయికి చేరేదని చెప్పడంలో డౌట్ అక్కర్లేదు!