AMB సినిమాస్ వ‌ల్ల‌నే ఈ మాల్‌కి అంత‌టి క్రేజ్?

హైదరాబాద్ మెట్రో న‌గ‌రానికి మ‌రో ఖ్యాతి ద‌క్కింది. సిటీలోని రెండు ప్రీమియర్ షాపింగ్ గమ్యస్థానాలైన శరత్ సిటీ క్యాపిటల్ మాల్ - నెక్సస్ మాల్ భారతదేశంలో అత్యధికంగా సందర్శించే టాప్ 25 మాల్స్‌లో చోటు దక్కించుకున్నాయి. ఈ ర్యాంకింగ్‌ను బెంగళూరుకు చెందిన జియోఐక్యూ అనే జియోలొకేషన్ స్టార్టప్ లిస్ట్ అవుట్ చేసింది. శరత్ సిటీ క్యాపిటల్ మాల్ రోజుకు సగటున 19,105 మంది సందర్శకులను ఆకర్షిస్తూ 9వ స్థానంలో ఉంది. అయితే నెక్సస్ మాల్ సగటున 14,493 రోజువారీ సందర్శకులతో 25వ స్థానాన్ని పొందింది. భారతదేశంలో అత్యధికంగా సందర్శించే షాపింగ్ మాల్స్ జాబితాలో ఢిల్లీ, ముంబైలోని మాల్స్ ఆధిపత్యం ప్ర‌ద‌ర్శించాయి.

భారతదేశంలోని మాల్స్‌ను అంచనా వేయడానికి జియో ఐక్యూ AI-ఆధారిత సాధనాలను ఉపయోగిస్తుంది. క‌చ్చితమైన సందర్శకుల గణాంకాలను అందించడానికి మాల్స్‌ను సందర్శించే కస్టమర్‌ల నుండి కంపెనీ డేటాను సేకరిస్తుంది.

దిల్లీ, ముంబై టాప్ :

ఢిల్లీలోని వేగాస్ మాల్ సగటున 26,212 రోజువారీ సందర్శకులతో మొదటి స్థానంలో ఉంది. తర్వాత V3S ఈస్ట్ సెంటర్ మాల్ 24,282 మంది సందర్శకులతో టాప్ 2లో ఉంది. ముంబైలోని ఫీనిక్స్ మార్కెట్‌సిటీ 23,000 మంది రోజువారీ సందర్శకులను ఆకర్షిస్తూ మూడవ స్థానంలో నిలిచింది.

హైటెక్ సిటీ, హైదరాబాదులోని గచ్చిబౌలి-మియాపూర్ రోడ్‌లో ఉన్న శరత్ సిటీ క్యాపిటల్ మాల్ తెలంగాణలో అతిపెద్దది. దేశంలోని అతిపెద్ద షాపింగ్ మాల్‌లలో ఒకటి. పరిమాణం పరంగా మొత్తం 27,00,000 చదరపు అడుగుల విస్తీర్ణంలో విస్తరించి ఉంది. శరత్ గ్రూప్ యాజమాన్యంలోని ఈ షాపింగ్ మాల్ 2017లో ప్రారంభమైంది. దరాబాద్‌లోని అత్యంత ప్రధానమైన ప్రాంతాలలో ఒకటైన ఈ మాల్ 19,31,000 చదరపు అడుగుల రిటైల్ విస్తీర్ణంతో 8 అంతస్తులను కలిగి ఉంది. రిటైల్ స్థలం పరంగా భారతదేశపు షాపింగ్ మాల్స్‌లో అగ్రస్థానంలో ఉంది. ఇది భారతదేశం వెలుపలి నుండి వందలాది అంత‌ర్జాతీయ‌ బ్రాండ్‌ల విక్ర‌యాల‌ను కలిగి ఉంది. మాల్‌లో తమ ఆఫ్‌లైన్ స్టోర్‌లను నిర్వ‌హిస్తున్నారు.

ఆస‌క్తిక‌రంగా శ‌ర‌త్ సిటీ మాల్ లో AMB సినిమాస్ ప్ర‌త్యేక ఆక‌ర్ష‌ణ‌. తెలుగు సూపర్ స్టార్ మహేష్ బాబు - ఏషియన్ సినిమాస్ సహ యాజమాన్యంలోని లగ్జరీ మల్టీప్లెక్స్ కి గొప్ప ఆద‌ర‌ణ ద‌క్కుతోంది. ఇది ప్రతిరోజూ వేలాది మంది సినీ ప్రేక్షకులను ఆకర్షిస్తుంది. దీనిని బ‌ట్టి స్టార్ ప‌వ‌ర్ శ‌ర‌త్ సిటీ మాల్ కి ఏ రేంజులో ప్ల‌స్ అవుతోందో అర్థం చేసుకోవ‌చ్చు. సినిమా గ్లామ‌ర్ ని జోడించి మాల్ బిజినెస్ చేయ‌డం చాలా సులువు అని కూడా ప్రూవ్ అవుతోంది.

ఇదిలా ఉంటే భారతదేశంలోని షాపింగ్ మాల్స్‌లో అగ్రశ్రేణి జాబితాలో ఉన్న మరో ప్రముఖ మాల్ కూకట్‌పల్లిలో ఉన్న నెక్సస్ మాల్. 8,00,000 చదరపు అడుగుల విస్తీర్ణంలో విస్తరించి ఉంది. ఇది ముంబై ఆధారిత రియల్ ఎస్టేట్ ఇన్వెస్ట్‌మెంట్ సంస్థ‌ నెక్సస్ సెలెక్ట్ ట్రస్ట్ యాజమాన్యంలో ఉంది. హైదరాబాద్‌లోని విస్తృతమైన షాపింగ్ మాల్ ల ప్రారంభానికి కార‌ణం.. నగరంలో పెరుగుతున్న‌ IT రంగం. నగరం దేశంలోని మెట్రోపాలిటన్ నగరాలను అత్యంత స్వాగతించే IT హబ్‌గా ముందంజలో ఉంది.