మహేష్ బాబు బర్త్‌డే స్పెషల్‌ మారింది..!
మొన్నటి వరకు మహేష్ కెరీర్ లో అతి పెద్ద డిజాస్టర్ మూవీ అయిన ఖలేజా ను బర్త్‌ డే స్పెషల్‌ గా రీ రిలీజ్ చేయాలని ప్లాన్ చేశారు.
By: Tupaki Desk | 15 July 2024 1:58 PM GMT
సూపర్‌ స్టార్‌ మహేష్ బాబు బర్త్‌ డే కి నెల రోజుల సమయం కూడా లేదు. ఆగస్టు 9న అత్యంత వైభవంగా ఫ్యాన్స్ సూపర్‌ స్టార్‌ బర్త్‌ డే వేడుకలను నిర్వహించేందుకు ఏర్పాట్లు చేస్తున్నారు. రాజమౌళి దర్శకత్వంలో మహేష్ బాబు సినిమా రూపొందబోతోంది. అయితే ఆ సినిమా నుంచి ఎలాంటి అప్‌డేట్‌ ఉండక పోవచ్చు.
మహేష్ బాబు బర్త్‌ డే కి ఈమధ్య కాలంలో రెగ్యులర్‌ గా ఆయన హిట్ లేదా ఫ్లాప్‌ సినిమాలను స్క్రీనింగ్‌ చేయడం పరిపాటిగా వస్తుంది. కనుక ఈ బర్త్‌ డే కి కూడా కచ్చితంగా మహేష్ బాబు కెరీర్ లో నిలిచి పోయే సినిమా ఉంటుంది అనే చర్చ చాలా రోజులుగా జరుగుతూ ఉంది.
మొన్నటి వరకు మహేష్ కెరీర్ లో అతి పెద్ద డిజాస్టర్ మూవీ అయిన ఖలేజా ను బర్త్‌ డే స్పెషల్‌ గా రీ రిలీజ్ చేయాలని ప్లాన్ చేశారు. అప్పుడు ఫ్లాప్‌ అయిన ఖలేజా ఇప్పటి ప్రేక్షకులకు నచ్చుతుందని, అందుకే రీ రిలీజ్ చేయాలని అనుకున్నారు. కానీ ఆ సినిమాకు కొన్ని లీగల్ సమస్యలు ఇప్పటికి వెంటాడుతూనే ఉన్నాయట. అందుకే ఆ సినిమా రీ రిలీజ్ కష్టంగా మారింది.
ఖలేజా రీ రిలీజ్ సాధ్యం కాకపోవడంతో మహేష్ బాబు సూపర్‌ హిట్ సినిమాల్లో ఒకటి అయిన మురారి సినిమాను రీ రిలీజ్ కి ప్లాన్ చేస్తున్నారు. వచ్చే ఏడాది మురారి విడుదల అయ్యి 25 ఏళ్లు అవ్వబోతుంది. ఆ సమయంలో విడుదల చేయాలని భావించారు. కానీ ముందుగానే ఈ ఏడాది బర్త్‌ డే కి విడుదల చేయబోతున్నారు.
కృష్ణవంశీ దర్శకత్వంలో వచ్చిన మురారి అప్పట్లో అన్ని విధాలుగా ప్రేక్షకుల నుంచి ప్రశంసలు దక్కించుకుంది. మహేష్ బాబు నటన మరియు ఇతర విషయాల్లో ఆయన్ను జనాల్లోకి తీసుకు వెళ్లిన సినిమాగా మురారి నిలిచింది. అలాంటి మురారి ని మహేష్ బాబు బర్త్‌ డే స్పెషల్‌ గా రీ రిలీజ్ కి ప్లాన్ చేస్తున్నారు.
మహేష్ బాబు బర్త్‌ డే స్పెషల్‌ రీ రిలీజ్ ప్లాన్ మారిన నేపథ్యంలో ఫ్యాన్స్ కూడా హర్షం వ్యక్తం చేస్తున్నారు. ఖలేజా వచ్చి చాలా ఏళ్లు అవుతున్నా కూడా ఫ్యాన్స్ కొందరు ఆ సినిమా చేదు జ్ఞాపకాల నుంచి బయటకు రాలేక పోతున్నారు. కనుక మురారి బెస్ట్‌ ఛాయిస్‌ గా వారు భావిస్తున్నారు.
