మహేష్ - జక్కన్న మూవీ ఫస్ట్‌ అప్‌డేట్‌
ఇక మహేష్ బాబు తదుపరి సినిమాకు సంబంధించిన అప్‌డేట్‌ కోసం అభిమానులు చాలా ఆసక్తిగా ఎదురు చూస్తున్న విషయం తెల్సిందే.
By: Tupaki Desk | 5 March 2024 6:42 AM GMT
సూపర్‌ స్టార్‌ మహేష్ బాబు మొన్న సంక్రాంతికి గుంటూరు కారం సినిమాతో ప్రేక్షకుల ముందుకు వచ్చిన విషయం తెల్సిందే. ఆ సినిమాకి మిశ్రమ స్పందన వచ్చింది. ఇక మహేష్ బాబు తదుపరి సినిమాకు సంబంధించిన అప్‌డేట్‌ కోసం అభిమానులు చాలా ఆసక్తిగా ఎదురు చూస్తున్న విషయం తెల్సిందే.
సాధారణంగా అయితే ఇప్పటి వరకు మహేష్ బాబు తదుపరి సినిమా ప్రారంభం అవ్వాల్సి ఉంది. కానీ ఆయన తదుపరి సినిమా రాజమౌళి దర్శకత్వంలో చేయబోతున్నాడు. కనుక సహజంగానే కాస్త ఆలస్యం అయ్యే అవకాశాలు ఉన్నాయి. ఇప్పటికే ప్రీ ప్రొడక్షన్ వర్క్‌ ను దర్శకుడు రాజమౌళి ప్రారంభించాడని సమాచారం అందుతోంది.
టాలీవుడ్‌ వర్గాల నుంచి అందుతున్న సమాచారం ప్రకారం షూటింగ్ కోసం చకచక ఏర్పాట్లు జరుగుతున్నాయట. అన్నీ అనుకున్నట్లుగా జరిగితే ఇదే ఏడాది జూన్ నుంచి మొదటి షెడ్యూల్‌ ను రాజమౌళి మొదలు పెట్టే అవకాశాలు ఉన్నాయట. అందుకోసం హడావుడిగా ప్రీ ప్రొడక్షన్ వర్క్‌ జరుగుతుందట.
జక్కన్న గత చిత్రాల మాదిరిగా కాకుండా ఈసినిమాను ఏడాదిన్నర లోపు షూటింగ్ పూర్తి చేసి, ఆరు నెలల పాటు పోస్ట్‌ ప్రొడక్షన్ వర్క్‌ చేసి మొత్తంగా రెండు సంవత్సరాల్లో సినిమాను ప్రేక్షకుల ముందుకు తీసుకు వచ్చే విధంగా ప్లాన్‌ చేస్తున్నారని సమాచారం.
ఇటీవల ఒక ఇంటర్వ్యూలో రాజమౌళి సినిమా గురించి మహేష్ బాబు మాట్లాడుతూ చాలా ఆసక్తిగా ఆ సినిమా కోసం వెయిట్ చేస్తున్నాను అన్నాడు. సినిమా కోసం అన్నట్లుగా గడ్డం మరియు జుట్టును మహేష్ బాబు పెంచుతున్నాడని కూడా ఆయన సన్నిహితుల ద్వారా తెలుస్తోంది.
ఇప్పటికే మహేష్ బాబు కథకు తగ్గట్లుగా ఫిజిక్ ను మార్చుకునే పనిలో ఉన్నారట. జూన్ నుంచి షూటింగ్ ను మొదలు పెడితే వచ్చే ఏడాది చివరి వరకు పూర్తి అయ్యి, 2026 ప్రథమార్థంలోనే సినిమా విడుదల అయ్యే అవకాశాలు కనిపిస్తున్నాయి. అధికారికంగా ఈ సినిమా విషయమై జక్కన్న టీం నుంచి క్లారిటీ రావాల్సి ఉంది.
