మహేశ్ నోట ఆ పాట.. థియేటర్లలో ఈలలే!

'చెప్పవే చిరుగాలి.. చల్లగా ఎద గిల్లి.. ఎక్కడే వసంతాల కేళి' అంటూ సాగే సాంగ్.. సూపర్ స్టార్ మహేశ్ కెరీర్ లో వన్ ఆఫ్ ది బెస్ట్ అని చెప్పొచ్చు. 20 ఏళ్ల క్రితం విడుదలైన ఒక్కడు సినిమాలోని ఈ పాటకు మణిశర్మ అందించిన బాణీలు ఎవర్ గ్రీన్. అప్పుడు స్టార్ సింగర్ ఉదిత్ నారాయణ్ పాడిన ఈ పాటను ఇప్పుడు మహేశ్ పాడితే ఎలా ఉంటుందో ఊహించుకోండి!.. ఇప్పుడిదే నిజం కాబోతుంది.

మహేశ్ బాబు.. ప్రస్తుతం మాటల మాంత్రికుడు త్రివిక్రమ్ డైరెక్షన్ లో గుంటూరు కారం సినిమాలో నటిస్తున్నారు. షూటింగ్ చివరి దశలో ఉన్న ఈ మూవీ సంక్రాంతి కానుకగా రిలీజ్ కానుంది. అయితే ఈ చిత్రంలో హీరోయిన్ ను ఇంప్రెస్ చేయడానికి మహేశ్ ఈ చెప్పవే చిరుగాలి పాటను పాడనున్నారట.

అయితే మొత్తం సాంగ్ కాదని.. కేవలం ఫస్ట్ రెండు లైన్లను మహేశ్ తన స్టైల్ లో పాడినట్లు సమాచారం. ఈ సీన్ ను అభిమానులను తెగ ఆకట్టుకుంటుందట. మహేశ్ స్టైలిష్ గా పాట పాడుతూ హీరోయిన్ ను ఇంప్రెస్ చేస్తుంటే థియేటర్లలో ఈలలే ఈలలంట. త్రివిక్రమ్ కూడా సరైన మసాలా డోస్ ఇచ్చేలా ఆ సీన్ ను చిత్రీకరించారట.

ప్రజెంట్.. ఈ సినిమా షూటింగ్ హైదరాబాద్ లోని పలు ప్రాంతాల్లో జరుగుతోందట. మహేశ్ బాబు, శ్రీలీల మధ్య కీలక సన్నివేశాలను షూట్ చేస్తున్నారట మేకర్స్. ఓ మాస్ సాంగ్ కూడా షూటింగ్ చేస్తున్నట్లు తెలుస్తోంది. అదే సమయంలో మూవీ పోస్ట్ ప్రొడక్షన్ పనులు కూడా శరవేగంగా జరుగుతున్నాయట. ఎలా అయినా సంక్రాంతి కానుకగా జనవరి 12వ తేదీన ఈ సినిమాను విడుదల చేయాలని ఫిక్స్ అయ్యారట.

గుంటూరు కారం సినిమాలో మహేశ్, శ్రీలీలతో పాటు మీనాక్షి చౌదరీ లీడ్ రోల్ పోషిస్తోంది. సీనియర్ నటులు జగపతిబాబు, రమ్యకృష్ణ, బ్రహ్మానందం, ప్రకాశ్ రాజ్, సునీల్, రఘబాబు తదితరులు కీలక పాత్రల్లో కనిపించనున్నారు. హారిక అండ్ హాసిన్ క్రియేషన్స్ పై రాధాకృష్ణ, సూర్యదేవర నాగవంశీ సినిమాను నిర్మిస్తున్నారు. జనవరి 6వ తేదీన హైదరాబాద్ లో ఈ సినిమా ప్రీరిలీజ్ ఈవెంట్ జరగనుందని సినీ వర్గాల్లో టాక్.