యంగ్ బ్యూటీని ఇబ్బంది పెట్టిన విజ‌య‌న‌గ‌రం!

యువ హీరో అశోక్ గ‌ల్లా హీరోగా న‌టిస్తోన్న `దేవ‌కీ నంద‌న వాసుదేవ` సినిమాతో మ‌రో తెలుగ‌మ్మాయి మాన‌సా వార‌ణాసి ప‌రిచ‌యం అవుతుంది. ఇదొక ఆధ్యాత్మిక థ్రిల్ల‌ర్ చిత్రం. స‌త్య‌భామ అనే పాత్ర‌లో ప్రేక్ష‌కుల్ని మెప్పించ‌డానికి రెడీ అవుతోంది. మ‌రి ఈ టాలీవుడ్ అమ్మాయి బ్యాక్ గ్రౌండ్ ఏంటి? ఎక్క‌డ నుంచి వ‌చ్చిందో ఎంత మందికి తెలుసు? ఆ వివ‌రాలేంటో ఆమె మాట‌ల్లోనే...

`నేను పుట్టింది హైద‌రాబాద్ లోనే. ఇక్క‌డే ఇంజ‌నీరింగ్ పూర్తి చేసా. కానీ అంత‌కు ముందు టెన్త్ క్లాస్ ముంబైలో చ‌దివాను. మిస్ ఇండియా పోటీల్లో పాల్గొని టైటిల్ గెలిచా. ఆ త‌ర్వాత దేశం త‌రుపున మిస్ వ‌ర‌ల్డ్ లో పాల్గొన్నా. ఆ త‌ర్వాత ఉద్యోగం చేయాలా? ఈ రంగంలోనే కొన‌సాగాలా? అని ఆలోచిస్తున్న‌ప్పుడు మూవీ వ‌ర్క్ షాపుకు వెళ్లాను. అప్పుడే సినిమాల‌పై ఆస‌క్తి పెరిగింది. ఆ త‌ర్వాత సినిమాల‌కు ఆడిష‌న్స్ ఇచ్చాను.

ఈ క్ర‌మంలోనే అవ‌కాశాలు వ‌చ్చాయి. ఏ న‌టికైనా తొలి సినిమా స‌వాల్ గా ఉంటుంది. సెట్స్ లో వాడే ప‌దాలు సినిమా లాంగ్వేజ్ అన్నింటిని అప్ప‌టిక‌ప్పుడు నేర్చుకోవాలి. దీంట్లో స‌త్య‌భామ ప‌ల్లెటూరి అమ్మాయి పాత్ర‌లో క‌నిపిస్తా. నాది ఆ నేప‌థ్యం కాదు. కాబ‌ట్టి బాడీ లాంగ్వేజ్, విజ‌య‌న‌గ‌రం యాస‌ను ఒంట‌ప‌ట్టించుకోవ‌డం స‌వాల్ గా అనిపించింది. మాట్లాడేట‌ప్పుడు నాలిక స‌రిగ్గా తిరిగేది కాదు. కానీ ఈ ప్ర‌యాణాన్ని ఎంతో ఆస్వాదించా.

అశోక్ తో క‌లిసి ప‌నిచేయ‌డం చాలా ఆనందాన్నిచ్చింది. సెట్స్ లో ఆయ‌న మ‌హేష్ బాబు ద‌గ్గ‌ర నేర్చుకున్న విష‌యాలు చెప్పేవారు. న‌టిగా ఈ సినిమా మంచి అనుభూతినిచ్చింది. తొలి సినిమా అయినా అంతా ఎంతో స‌హ‌క‌రించ‌డంతోనే చ‌క్క‌గా నా ప‌ని పూర్తి చేయ‌గ‌లిగాను. ప్ర‌స్తుతం `క‌పుల్ ప్రెండ్` అనే మ‌రో సినిమా చేస్తున్నా` అని తెలిపింది.