హెబ్బా 'ధూం ధాం'... మరో మెలోడీ సాంగ్

టాలీవుడ్ బ్యూటీ హెబ్బా పటేల్.. మళ్ళీ వరుస అవకాశాలు అందుకుంటోంది. కుమారి 21 ఎఫ్ చిత్రంతో యూత్ లో మంచి క్రేజ్ దక్కించుకున్న అమ్మడు.. ఆ తర్వాత అనేక సినిమాల్లో నటించింది. స్పెషల్ సాంగ్స్ కూడా చేసింది. ఇప్పుడు మళ్లీ సినిమాల్లో నటిస్తూ బిజీగా మారింది. ప్రస్తుతం ధూం ధాం మూవీ చేస్తోంది. లవ్ అండ్ ఫ్యామిలీ కామెడీ ఎంటర్టైనర్ గా తెరకెక్కుతున్న ఈ చిత్రం రిలీజ్ కు సిద్ధమవుతోంది.

చేతన్ కృష్ణ హీరోగా నటిస్తున్న ఈ సినిమాకు సాయి కిషోర్ మచ్చా దర్శకత్వం వహిస్తున్నారు. ఫ్రైడే ఫ్రేమ్ వర్క్ బ్యానర్ పై ఎం ఎస్ రామ్ కుమార్ నిర్మిస్తుండగా.. గోపీ మోహన్ కథ అందిస్తున్నారు. ఇప్పటికే షూటింగ్ పూర్తి చేసుకున్న ఈ సినిమా.. ప్రస్తుతం పోస్ట్ ప్రొడక్షన్ వర్క్ జరుపుకుంటోంది. త్వరలో మేకర్స్ రిలీజ్ డేట్ ను అనౌన్స్ చేయనున్నారు. ఇక ప్రమోషన్స్ ను జోరుగా నిర్వహించనున్నారు. అయితే కొద్దిరోజులుగా మ్యూజికల్ ప్రమోషన్స్ చేస్తున్న విషయం తెలిసిందే.

ఇప్పటికే ఈ సినిమా నుంచి మల్లే పూల టాక్సీ, టమోటా బుగ్గల పిల్ల, కుందనాల బొమ్మ, మాయ సుందరి సాంగ్స్ ను మేకర్స్ రిలీజ్ చేశారు. మ్యూజికల్ లవర్స్ నుంచి మంచి రెస్పాన్స్ అందుకుని ఉర్రూతలూగించాయి. సోషల్ మీడియాలో మంచి వ్యూస్ దక్కించుకున్నాయి. అదే జోష్ తో మేకర్స్ ఇప్పుడు మరో సాంగ్ ను రిలీజ్ చేశారు. మంచి మెలోడీని శుక్రవారం సాయంత్రం విడుదల చేశారు. 'మనసున మనసు నువ్వే.. మరలా కలిశావే..' అంటూ సాగుతున్న ఈ పాట ఆకట్టుకుంటోంది.

లిరికల్ సాంగ్ ను క్రేజీ గా ప్రజెంట్ చేశారు మేకర్స్. ఫారిన్ వీధుల్లో హీరో హీరోయిన్లు తిరుగుతున్నట్లు చూపించారు. చేతన్, హెబ్బా కెమిస్ట్రీ అట్రాక్ట్ చేస్తోంది. లైట్ గా రొమాంటిక్ టచ్ కూడా ఇచ్చారు. ఆ సాంగ్ అంతా విదేశాల్లోనే షూట్ చేసినట్లు చూపించారు. మధ్య మధ్యలో షూటింగ్ బిట్స్ ను కూడా యాడ్ చేశారు. లొకేషన్స్ చాలా బాగున్నాయి. విజువల్స్ రిచ్ గా ఉన్నాయి. హెబ్బా తన అందంతో ఫిదా చేస్తోంది. చేతన్ కృష్ణ కూడా ఇంప్రెసింగ్ గా కనిపిస్తున్నారు.

ఇక సాంగ్ విషయానికొస్తే.. సరస్వతీపుత్ర రామజోగయ్య శాస్త్రి మరోసారి తన మార్క్ చూపించారు. అద్భుతమైన లిరిక్స్ అందించారు. స్టార్ మ్యూజిక్ డైరెక్టర్ గోపి సుందర్ క్లీన్ అండ్ ఫ్రెష్ బాణీలను కట్టారు. విజయ్ జేసుదాస్, హరిని వాటూరి తమ గాత్రంతో పాటకు ప్రాణం పోశారు. ప్రస్తుతం ఈ సాంగ్ నెట్టింట వైరల్ గా మారింది. మెలోడియస్ గా చాలా బాగుందని నెటిజన్లు చెబుతున్నారు. కచ్చితంగా మెలోడీ లవర్స్ ఆల్బమ్ లోకి చేరిపోతుందని అంటున్నారు.