సినిమా మొత్తం ఒకటే డ్రెస్.. ఇది సెంటిమెంటా?

తెలుగు సినిమా రంగంలో తనదైన దర్శకత్వ ప్రతిభతో మంచి పేరును సొంతం చేసుకున్నాడు యంగ్ అండ్ టాలెంటెడ్ డైరెక్టర్ వెంకీ అట్లూరి. నటుడిగా, రైటర్‌గా చాలా కాలం క్రితమే టాలీవుడ్‌లో తనదైన మార్కును చూపించిన అతడు.. వరుణ్ తేజ్ హీరోగా నటించిన ‘తొలి ప్రేమ’ సినిమాతో దర్శకుడిగా మారాడు. ఫస్ట్ మూవీతోనే భారీ విజయాన్ని అందుకుని అందరినీ తనవైపు చూసేలా చేసుకున్నాడు.

‘తొలి ప్రేమ’ తర్వాత వెంకీ అట్లూరి పలు సినిమాలను తెరకెక్కించగా.. అవి పరాజయం పాలయ్యాయి. ఈ పరిస్థితుల్లోనే కోలీవుడ్ స్టార్ హీరో ధనుష్‌తో ‘సార్’ అనే చిత్రాన్ని తెరకెక్కించాడు. ఇది తెలుగు, తమిళంలోనూ సూపర్ డూపర్ హిట్ అయింది. ఈ ఊపులోనే ఇప్పుడు వెంకీ అట్లూరి.. దుల్కర్ సల్మాన్ హీరోగా ‘లక్కీ భాస్కర్’ అనే చిత్రం చేశాడు. ఎన్నో అంచనాల నడుమ ఇది అక్టోబర్ 31వ తేదీన విడుదల అయింది.

దుల్కర్ సల్మాన్ హీరోగా వెంకీ అట్లూరి తెరకెక్కించిన ‘లక్కీ భాస్కర్’ సినిమాకు ఆరంభంలోనే మంచి టాక్ వచ్చింది. దీంతో మొదటి రోజు నుంచే ఈ చిత్రానికి ఆడియెన్స్ నుంచి అద్భుతమైన రెస్పాన్స్ కూడా లభిస్తోంది. ఫలితంగా ఈ చిత్రం అదిరిపోయే వసూళ్లతో సాగుతోంది. ఇలా ఇది వారం రోజుల్లోనే బ్రేక్ ఈవెన్‌ను సాధించే అవకాశం ఉందని ట్రేడ్ వర్గాలు అంచనాలు వేస్తున్నాయి.

‘లక్కీ భాస్కర్’ సినిమా విజయవంతంగా ప్రదర్శితం అవుతోన్న నేపథ్యంలో చిత్ర యూనిట్ తాజాగా సక్సెస్ మీట్‌ను నిర్వహించింది. దీనికి హీరో దుల్కర్ సల్మాన్, హీరోయిన్ మీనాక్షి చౌదరి, దర్శకుడు వెంకీ అట్లూరితో పాటు ఇందులో పని చేసిన వాళ్లు హాజరయ్యారు. ఈ సందర్భంగా ఈ సినిమాలో నటించిన మాణిక్ రెడ్డి.. దర్శకుడు వెంకీ అట్లూరి గురించి ఓ ఆసక్తికరమైన విషయాన్ని బయటపెట్టారు.

తాజాగా జరిగిన ‘లక్కీ భాస్కర్’ సక్సెస్ మీట్‌లో మాణిక్ రెడ్డి మాట్లాడుతూ.. ‘ఈ సినిమా షూటింగ్ జరుగుతున్నప్పుడు వెంకీ అట్లూరిని చూసి బాధేసింది. ఎందుకంటే ఆయన ఎప్పుడూ ఒక్కటే టీ షర్ట్, ఒక్కటే ప్యాంట్‌తో కనిపించేవాడు. అలా చూసి చూసి నేనే ఆయనకు ఒక జత బట్టలు కొనివ్వాలని అనుకున్నాను. కానీ, మరోవైపు అది సెంటిమెంట్ ఏమో అని అనుకున్నాను’ అంటూ చెప్పుకొచ్చారు.

‘లక్కీ భాస్కర్’ సక్సెస్ మీట్‌లో మాణిక్ రెడ్డి చేసిన వ్యాఖ్యలు ఇప్పుడు హాట్ టాపిక్ అవుతున్నాయి. ఇది చూసిన వాళ్లంతా సినిమా పరిశ్రమలో చాలా మంది దర్శకుల్లా వెంకీ అట్లూరి కూడా సెంటిమెంట్లను ఫాలో అవుతాడా అంటూ నోరెళ్లబెట్టేస్తున్నారు. మొత్తానికి ఈ యంగ్ డైరెక్టర్ హిట్ కొట్టడంతో పాటు ఈ కామెంట్ల కారణంగానూ హెడ్‌లైన్స్‌లో నిలిచాడు.