డబ్బు కోసం ఇవి చేయాలని మేం కోరుకోం!

25 ఏళ్ల క్రితం రామ్ గోపాల్ వర్మ దర్శకత్వంలో వచ్చిన సత్య చిత్రంలో భికు మ్హత్రే పాత్ర పోషించిన తర్వాత మనోజ్ బాజ్‌పేయి తొలిసారిగా వెలుగులోకి వచ్చాడు. ఆ చిత్రానికి మనోజ్ చాలా ప్రశంసలు అందుకున్నాడు. ఉత్త‌మ స‌హాయ న‌టుడిగా జాతీయ అవార్డ్ సైతం గెలుచుకున్నాడు. ఆ త‌ర్వాత చాలా సినిమాల్లో అత్యుత్త‌మ న‌ట‌ప్ర‌ద‌ర్శ‌న‌తో మెప్పించాడు. అమెజాన్ ప్రైమ్ వీడియోలో 'ది ఫ్యామిలీ మ్యాన్‌'లో కనిపించిన తర్వాత మ‌నోజ్ భాజ్ పేయి పేరు అంత‌ర్జాతీయంగా మార్మోగింది.

ఇన్నాళ్లూ మనోజ్ తన తరంలోని అత్యంత ప్రతిభావంతులైన నటులలో ఒకరిగా కీర్తినందుకున్నాడు. కానీ అత‌డు ముంబై నగరంలో జీవించడానికి సృజనాత్మక సంతృప్తికి బదులుగా డబ్బు సంపాదించి పెట్టే పాత్రలను రాజీ ప‌డి పోషించవలసి వచ్చిందని యూట్యూబ్ ఛానెల్ 'జానిస్ సిక్వేరా'తో జరిగిన చాట్‌లో తెలిపాడు. ఇటీవలి ఇంటర్వ్యూలో డబ్బు కోసమే ఎప్పుడైనా సినిమాకి సంతకం చేశారా? అని మనోజ్‌ని ప్ర‌శ్నించ‌గా, అత‌డు 'అవును' అని ఎటువంటి సంకోచం లేకుండా ఒప్పుకున్నాడు.

అవ‌కాశాలు లేని స‌మ‌యంలో ఒక నటుడు మనుగడ కోసం ఇలాంటి ఆఫర్‌లను తీసుకున్నందుకు చింతించాల్సిన అవసరం లేదని అతడు అన్నాడు. బ‌తుకు తెరువు కోసం.. వంటగదిని నడపడానికి ఏదైనా చేస్తే ఆర్టిస్టు చింతించకూడదు అని అన్నాడు. దీనిని కొన్ని అడుగులు వెనక్కి వేసినట్లు చూడవచ్చని మనోజ్ పేర్కొన్నాడు. అయితే వారు మంచి భవిష్యత్తు వైపు దూసుకుపోవడానికి సిద్ధంగా ఉన్నందున దీనిని ప‌ట్టించుకోకూడ‌ద‌ని అన్నాడు. ముందుకు దూకడం కోసం కొన్ని అడుగులు వెనక్కి వేస్తున్నట్లు భావించి సినిమా చేయాలి. ఇది నా వ‌ర‌కూ ఆనందించే విషయం కాదు కానీ ఈ నగరంలో జీవించడానికి నాకు డబ్బు అవసరం. నేను ఎప్పుడూ దీని గురించి చింతించలేదు. ఇప్పటికీ ఆ చిత్రాలను చాలా గర్వంగా చేస్తున్నాను.. అని అన్నారు.

యూట్యూబ్ ఛానెల్ చాట్‌లో మాట్లాడుతూ.. బ్యాడ్ డేస్ ని చూసిన తర్వాత అవ‌మానాలు భ‌రించిన‌ తర్వాత కూడా డబ్బు కోసం సినిమాలు చేయడం మానేయండి! అని అతని భార్య షబానా రజా త‌న‌తో అన్నార‌ని కూడా మ‌నోజ్ తెలిపారు. చెడ్డ చిత్రాలు చేసాక నా భార్య‌ నాకు ఫోన్ చేసి ఈ సినిమా ఎలా నచ్చిందని అడిగేది. డ‌బ్బు కోసం సినిమాలు చేయడం మానేయండి. డబ్బు కోసం ఇవి చేయాలని మేం కోరుకోం. చాలా ఇబ్బందికరంగా ఉంది.. నేను అవమానంగా భావించాను.. థియేటర్‌లో అవమాన‌ప‌డ్డాను. ఇలాంటివి ఎప్పుడూ చేయవద్దు దయచేసి! మీరు కథలు పాత్రలలో మంచివారిగా క‌నిపించండి.. దయచేసి వాటిని ఎంచుకోండి.. ఇలాంటి చెత్త‌ సినిమాలు కాదు.. మీరు మరేమీ నిరూపించాల్సిన అవసరం లేదు'' అని భార్య కోరిన‌ట్టు తెలిపారు. మనోజ్ బాజ్‌పేయ్ చివరిసారిగా ZEE5 చిత్రం 'సిర్ఫ్ ఏక్ బందా కాఫీ హై'లో కనిపించారు.