సలార్‌ : రిలాక్స్ మూడ్‌ లోకి మారుతి!

సాహో, రాధేశ్యామ్‌ సినిమాలు బాక్సాఫీస్ వద్ద బొక్క బోర్లా పడ్డ సమయంలో ఓ మంచి సినిమాను, ఓ స్టార్‌ డైరెక్టర్‌ దర్శకత్వంలో చేయాలి కానీ మారుతి వంటి ఓ చిన్న దర్శకుడి దర్శకత్వంలో ప్రభాస్‌ సినిమా చేయడం ఏంటి అంటూ చాలా మంది సోషల్‌ మీడియా ద్వారా విమర్శలు చేసిన విషయం తెల్సిందే. ప్రభాస్‌, మారుతి సినిమాను చాలా మంది తిరష్కరిస్తున్నామంటూ సోషల్ మీడియా ద్వారా వాదించారు.

సినిమా ప్రారంభానికి ముందే నెగిటివిటీ భారీ ఎత్తున రావడంతో దర్శకుడు మారుతి ఇప్పటి వరకు కనీసం ప్రకటన చేయలేదు. షూటింగ్‌ దాదాపు సగం పూర్తి అయినా కూడా మారుతి మాత్రం సినిమా ప్రారంభించామని కూడా ఒక చిన్న ప్రకటన అధికారికంగా చేయలేదు. ఎట్టకేలకు ప్రభాస్‌, మారుతి సినిమాల అప్‌డేట్స్ రాబోతున్నాయి.

ప్రభాస్ తాజా చిత్రం సలార్‌ భారీ విజయాన్ని సొంతం చేసుకుంది. సలార్‌ విజయం తర్వాత మారుతి చాలా వరకు రిలాక్స్ అయ్యాడు. మొదటి నుంచి కూడా సలార్‌ వచ్చిన తర్వాత మాత్రమే తమ సినిమా యొక్క ప్రకటన ఉంటుందని మారుతి సన్నిహితుల వద్ద చెప్పుకొచ్చాడు .

సలార్‌ విజయం తర్వాత ప్రభాస్ పై ఉన్న ఒత్తిడి కాస్త తగ్గడంతో పాటు, ఆయన నుంచి ఇక ముందు రాబోతున్న సినిమాల విషయంలో కూడా ఒత్తిడి లేదనే విషయం చెప్పాలి. అందుకే ప్రభాస్ తో తాను చేయబోతున్న సినిమాకు సంబంధించిన అప్డేట్స్ ను మారుతి రెడీ చేస్తున్నాడు అనే టాక్ వినిపిస్తోంది.

వచ్చే నెలలో రాబోతున్న సంక్రాంతి సందర్భంగా తమ కాంబో సినిమాకు సంబంధించిన టైటిల్‌ ను రివీల్‌ చేయడంతో పాటు, ప్రభాస్ లుక్ ను ఇతర విషయాలను రివీల్‌ చేయబోతున్నట్లుగా మారుతి సన్నిహితుల వద్ద అన్నట్లుగా తెలుస్తోంది. పీపుల్స్ మీడియా ఫ్యాక్టరీ బ్యానర్‌ లో ఈ సినిమా రూపొందుతోందని తెలుస్తోంది. ఆ విషయం కూడా అధికారికంగా క్లారిటీ రాలేదు.

మొత్తానికి సలార్‌ భారీ విజయం సాధించి, వెయ్యి కోట్ల వసూళ్ల దిశగా పరుగులు తీస్తున్న నేపథ్యంలో ప్రభాస్ నటించిన, నటించబోతున్న రాబోయే సినిమాలపై ఒత్తిడి చాలా వరకు తగ్గిందనే టాక్ వినిపిస్తోంది. సోషల్‌ మీడియాలో ఆయా సినిమాలకు సంబంధించిన హడావుడి మొదలయ్యే అవకాశాలు ఉన్నాయి. వచ్చే ఏడాది ద్వితీయార్థం లో ప్రభాస్‌, మారుతి కాంబో మూవీ వస్తుందని సమాచారం అందుతోంది.