మట్కా.. బ్లాక్ అండ్ వైట్ మోడ్ లో వరుణ్, మీనాక్షి

ఆప‌రేష‌న్ వాలంటైన్ మూవీ త‌ర్వాత మెగా ప్రిన్స్ వరుణ్ తేజ్ ప్రస్తుతం మట్కా సినిమా చేస్తున్న విషయం తెలిసిందే. ప‌లాస వంటి క‌ల్ట్ మూవీ రూపొందించి ప్రశంసలు అందుకున్న కరుణ కుమార్ దర్శకత్వం వ‌హిస్తున్నారు. పీరియాడిక్ యాక్షన్ డ్రామాగా వైరా ఎంటర్టైన్మెంట్స్, ఎస్ ఆర్ టీ ఎంటర్టైన్మెంట్స్ బ్యానర్స్ పై డాక్టర్ విజయేందర్ రెడ్డి తీగల, రజనీ తాళ్లూరి భారీ బడ్జెట్ తో నిర్మిస్తున్నారు. 1960స్ వైజాగ్ బ్యాక్‌ డ్రాప్‌ తో గ్యాంబ్లింగ్ తరహా కథాంశంతో రూపొందిస్తున్నారు.

పాన్ ఇండియా లెవెల్ లో రిలీజ్ కు సిద్ధమవుతున్న మట్కాలో నోరా ఫతేహి, మీనాక్షి చౌదరీ ఫిమేల్ లీడ్ రోల్స్ పోషిస్తున్నారు. నవీన్ చంద్ర, సలోని, అజయ్ ఘోష్, కన్నడ కిషోర్, రవీంద్ర విజయ్, రవిశంకర్ కీలక పాత్రలు పోషిస్తున్నారు. అయితే నవంబర్ 14వ తేదీన సినిమాను రిలీజ్ చేస్తామని మేకర్స్ ఇప్పటికే అనౌన్స్ చేశారు. కొద్ది రోజులుగా ప్రమోషన్స్ నిర్వహిస్తున్నారు. సినిమాపై మంచి బజ్ క్రియేట్ చేస్తున్నారు.

ఇప్పటికే మేకర్స్ విడుదల చేసిన మేకింగ్ వీడియో, టీజర్, రెండు సాంగ్స్.. ఆడియన్స్ నుంచి మంచి రెస్పాన్స్ అందుకున్నాయి. మూవీపై అందరి ఫోకస్ పడేలా చేశాయి. సినిమాపై అంచనాలు పెంచాయి. అదే సమయంలో రిలీజ్ కు మరో 15 రోజులే ఉందని గుర్తు చేస్తూ మట్కా మేకర్స్ నేడు క్రేజీ అప్డేట్ ఇచ్చారు. వరుణ్ తేజ్, మీనాక్షి ఉన్న స్పెషల్ పోస్టర్ ను సోషల్ మీడియాలో విడుదల చేశారు.

పోస్టర్ బ్లాక్ అండ్ వైట్ మోడ్ లో ఉండి ఆకట్టుకుంటోంది. రెట్రో లుక్ సినీ ప్రియులను మెప్పిస్తోంది. సినిమాలో భాగంగా ఫోటో స్టూడియోలో పిక్ తీసుకున్నట్లు కనిపిస్తోంది. మీనాక్షి అమాయకంగా లంగా వోణీ గెటప్ లో కనిపించారు. ఇక వరుణ్ అయితే రగ్డ్ లుక్ తో ఆకట్టుకున్నారు. ఉంగరాల జట్టు, అదిరిపోయే షర్ట్, మెడలో నల్ల తాడుతో వేరే లెవెల్ లో సినీ ప్రియుల్లో మూవీపై ఆసక్తి పెంచేశారు.

ప్రస్తుతం సోషల్ మీడియాలో వరుణ్, మీనాక్షీ కొత్త పోస్టర్ ఫుల్ వైరల్ అవుతోంది. ఫోటో అదిరిపోయిందని నెటిజన్లు చెబుతున్నారు. ఇద్దరూ తమ పాత్రల్లో ఒదిగిపోయినట్లు కనిపిస్తున్నారని, సినిమాలో తమ యాక్టింగ్ తో అదరగొట్టేలా ఉన్నారని కామెంట్లు పెడుతున్నారు. మూవీ మంచి హిట్ అయ్యేలా ఉందని అంటున్నారు. మరి మట్కాతో వరుణ్, మీనాక్షి ఎలాంటి విజయం సాధిస్తారో వేచి చూడాలి.