శ్రీవారి సేవలో మెగా 'మట్కా' టీం

మెగా హీరో వరుణ్‌ తేజ్‌, మీనాక్షి చౌదరి జంటగా కరుణ కుమార్‌ దర్శకత్వంలో రూపొందిన మట్కా సినిమా రేపు ప్రేక్షకుల ముందుకు రాబోతుంది. భారీ అంచనాల నడుమ రూపొందిన ఈ సినిమా వరుణ్ తేజ్ కెరీర్‌లో బిగ్గెస్ట్‌ బడ్జెట్‌ మూవీగా నిలువబోతుంది. భారీ అంచనాలున్న ఈ సినిమా షూటింగ్‌ ప్రారంభం అయినప్పటి నుంచి ఎప్పుడు విడుదల అవుతుందా అంటూ మెగా ఫ్యాన్స్ ఆసక్తిగా ఎదురు చూస్తూ వచ్చారు. ట్రైలర్‌ విడుదల తర్వాత సినిమాపై అంచనాలు మరింతగా పెరిగాయి. వరుణ్‌ లుక్‌ కచ్చితంగా సినిమా హిట్‌ అవుతుంది అనే నమ్మకంను కలిగిస్తోంది అంటూ నెటిజన్స్‌ కామెంట్స్ చేస్తున్నారు. సినిమా ప్రమోషన్‌లో భాగంగా గత రెండు వారాలుగా మీడియా లో మట్కా టీం సందడి చేస్తున్నారు.

తెలుగు రాష్ట్రాల్లో పలు చోట్ల సినిమా ప్రమోషన్‌ నిర్వహించిన మట్కా టీం చివరగా విడుదలకు ముందు రోజు తిరుమల శ్రీవారి దర్శనంకు వెళ్లారు. అక్కడ స్వామి వారిని దర్శించుకుని వేద పండితుల ఆశీర్వాదం అందుకుని, ప్రసాదాలు స్వీకరించారు. వరుణ్‌ తేజ్‌ తో పాటు ఇతర యూనిట్‌ సభ్యులు తిరుమల శ్రీవారిని దర్శించుకున్న వారిలో ఉన్నారు. శ్రీవారి దర్శనం తర్వాత మాట్కా సినిమా గురించి చిత్ర యూనిట్‌ సభ్యులు మీడియాతో మాట్లాడుతూ తప్పకుండా ఇది ఒక మంచి సినిమా అవుతుందని, వసూళ్ల పరంగా వరుణ్ తేజ్ కెరీర్‌ లో బిగ్గెస్ట్ మూవీగా నిలుస్తుందని కూడా అభిప్రాయం వ్యక్తం చేశారు.

మూడు విభిన్నమైన ఏజ్‌ గ్రూప్‌ లో వరుణ్ తేజ్‌ను దర్శకుడు కరుణ కుమార్‌ చూపించడం జరిగింది. సినిమాలో వరుణ్‌ తేజ్ లుక్‌ పాత సినిమాలో చిరంజీవి, నాగబాబు లుక్‌ తరహాలో ఉన్నాయి అంటూ కామెంట్స్ వస్తున్నాయి. పీరియాడిక్‌ డ్రామా కావడంతో వరుణ్‌ లుక్‌ను అలా ప్లాన్‌ చేశారు. డబ్బు సంపాదన కోసం అడ్డదారిలో నడిచిన ఒక కుర్రాడి కథను ఈ సినిమాలో చూపించబోతున్నారు. కొన్ని నిజ జీవిత సంఘటనల ఆధారంగా రాసుకున్న కథ అంటూ దర్శకుడు గతంలో చెప్పుకొచ్చారు. తప్పకుండా ఇది తెలుగు ప్రేక్షకులకు అన్ని విధాలుగా నచ్చుతుంది అంటూ మేకర్స్‌ చెప్పుకొచ్చారు.

వరుణ్‌ తేజ్‌ గత నాలుగు అయిదు సంవత్సరాలుగా వరుసగా సినిమాలతో ప్రేక్షకుల ముందుకు వస్తున్నాడు కానీ కమర్షియల్‌ హిట్‌ దక్కించుకున్న దాఖలాలు లేవు. అయితే ఈ సినిమాతో వరుణ్‌ తేజ్ ఆ లోటును భర్తీ చేయబోతున్నాడు. కచ్చితంగా ఈసారి భారీ బ్లాక్‌ బస్టర్‌ విజయాన్ని సొంతం చేసుకోవడం ఖాయం అనే నమ్మకంతో వరుణ్‌ సైతం ఉన్నాడు. వంద కోట్ల వసూళ్లు సాధించగల సత్తా ఉన్న కంటెంట్‌ మూవీ అంటూ యూనిట్‌ సభ్యులు చెబుతున్నారు. వరుణ్ తేజ్‌ ఈ సినిమా హిట్‌ తో మరిన్ని ఇలాంటి ప్రయోగాత్మక సినిమాలు చేసే అవకాశాలు ఉన్నాయి. మరికొన్ని గంటల్లో విడుదల కాబోతున్న ఈ సినిమా ఫలితం ఎలా ఉంటుందో చూడాలి.