మహేష్ - విజయ్ - విశ్వక్.. ఒక్కొక్కరి నుంచి ఒక్కోటి!

సౌత్ ఇండస్ట్రీలో ప్రస్తుతం ఎమర్జింగ్ హీరోయిన్ గా వరుస సినిమాలతో దూసుకుపోతున్న అందాల భామ మీనాక్షి చౌదరి. ఈ బ్యూటీ ఈ ఏడాదిలో ఇప్పటి వరకు ఐదు సినిమాలతో ప్రేక్షకుల ముందుకొచ్చింది. ‘గుంటూరు కారం’ సినిమాలో సూపర్ స్టార్ మహేష్ బాబు మరదలిగా మీనాక్షి కనిపించింది. ఆ సినిమా పెద్దగా మెప్పించలేదు. ఆమె క్యారెక్టర్ కి కూడా గుర్తింపు రాలేదు. తరువాత తమిళంలో సింగపూర్ సెలూన్ అనే చిత్రంలో కనిపించింది.

దీని తర్వాత దళపతి విజయ్ కి జోడీగా ‘ది గోట్’ సినిమాలో నటించింది. ఈ మూవీ డిజాస్టర్ అయ్యింది. దుల్కర్ సల్మాన్ తో ‘లక్కీ భాస్కర్’ లో జతకట్టిన ఈ అమ్మడుకి ఈ ఏడాదిలో ఫస్ట్ బ్లాక్ బస్టర్ హిట్ లభించింది. దీని తర్వాత వరుణ్ తేజ్ కి జోడీగా ‘మట్కా’ మూవీలో కనిపించింది. కానీ ఈ చిత్రం నిరాశ పరిచింది. ఇదిలా ఉంటే నవంబర్ 22న విశ్వక్ సేన్ ‘మెకానిక్ రాకీ’ ప్రేక్షకుల ముందుకొస్తోంది. ఈ చిత్రంలో మీనాక్షి చౌదరి హీరోయిన్ గా చేసింది.

తాజాగా ఈ మూవీ ప్రీరిలీజ్ ఈవెంట్ గ్రాండ్ గా జరిగింది. ఇక వేడుకకు హాజరైన మీనాక్షి చౌదరి తాను వర్క్ చేసిన హీరోల గురించి ఆసక్తికరమైన వ్యాఖ్యలు చేసింది. నేను వర్క్ చేసిన హీరోల నుంచి ఒక్కో క్వాలిటీ నేర్చుకున్నానని ఆమె ఈవెంట్ లో చెప్పింది. సూపర్ స్టార్ మహేష్ బాబు నుంచి క్రమశిక్షణ, దళపతి విజయ్ నుంచి స్థిరత్వం, దుల్కర్ సల్మాన్ నుంచి వినయంగా వర్క్ చేయడం, వరుణ్ తేజ్ నుంచి జెంటిల్మన్ నేచర్ అలవాటు చేసుకున్నాను అని మీనాక్షి తెలిపింది.

ఇక విశ్వక్ సేన్ ఫన్, ఎనర్జీ, యూత్ ఫుల్ నెస్ ని చూశానని, వాటిని అడాప్ట్ చేసుకునే ప్రయత్నం చేస్తానని తెలిపింది. ఈ వీడియో సోషల్ మీడియాలో వైరల్ అవుతోంది. ఇదిలా ఉంటే 2024లో ఆమె కెరియర్ జెట్ స్పీడ్ తో సాగిన కూడా ఎక్కడికక్కడ స్పీడ్ బ్రేకర్స్ తగులుతూనే ఉన్నాయి. అయితే ‘లక్కీ భాస్కర్’ ఆమెని కొంత వరకు సేవ్ చేసింది.

విశ్వక్ సేన్ తో చేసియున్న ‘మెకానిక్ రాకీ’ చిత్రం పైన ఆమె చాలా హోప్స్ పెట్టుకుంది. అవుట్ అండ్ అవుట్ లవ్ డ్రామా తో పాటు యాక్షన్ ఎంటర్టైనర్ గా ఈ చిత్రం తెరకెక్కింది. ఇదిలా ఉంటే విశ్వక్ సేన్ నుంచి ఈ ఏడాదిలో వస్తోన్న మూడో సినిమా ఇది కావడం విశేషం. ‘గామి’ కమర్షియల్ సక్సెస్ అయ్యింది. ‘గ్యాంగ్స్ ఆఫ్ గోదావరి’ కూడా బాక్సాఫీస్ వద్ద మంచి కలెక్షన్లు అందుకుంది. ఇక ‘మెకానిక్ రాకీ’ తో మరో సూపర్ హిట్ వస్తుందని విశ్వక్ సేన్ నమ్మకంగా ఉన్నారు.