NBK109 : నెం.4 గా మిల్కీ బ్యూటీ!
NBK109 సినిమాలో ముగ్గురు ముద్దుగుమ్మలు హీరోయిన్స్ గా కనిపించబోతున్నారు అనే ప్రచారం మొదటి నుంచే జరుగుతోంది.
By: Tupaki Desk | 23 Dec 2023 8:15 AM GMT
నందమూరి బాలకృష్ణ ప్రస్తుతం బాబీ దర్శకత్వంలో తన 109వ సినిమా ను చేస్తున్న విషయం తెల్సిందే. అఖండ, వీర సింహా రెడ్డి, భగవంత్ కేసరి సినిమాలతో బ్యాక్ టు బ్యాక్ విజయాలను సొంతం చేసుకున్న బాలయ్య ప్రస్తుతం బాబీ తో కలిసి చేస్తున్న NBK109 సినిమా పై అంచనాలు ఆకాశాన్ని తాకేలా ఉన్నాయి.
వాల్తేరు వీరయ్య సినిమా తో చిరంజీవి కి మాస్ విజయాన్ని అందించిన దర్శకుడు బాబీ ఇప్పుడు బాలయ్యకు అంతకు మించి అన్నట్లుగా ఒక కమర్షియల్‌ బ్లాక్ బస్టర్ ఇవ్వడం కోసం రెడీ అవుతున్నాడు. ఇప్పటికే షూటింగ్‌ ప్రారంభం అయిన ఈ సినిమా ను 2024 సమ్మర్‌ లో విడుదల చేసే విధంగా ప్లాన్‌ చేస్తున్నారు.
NBK109 సినిమాలో ముగ్గురు ముద్దుగుమ్మలు హీరోయిన్స్ గా కనిపించబోతున్నారు అనే ప్రచారం మొదటి నుంచే జరుగుతోంది. ఇప్పటికే బాలీవుడ్‌ బ్యూటీ ఊర్వశీ రౌతేలా ఈ సినిమా షూట్‌ లో పాల్గొంది. గుంటూరు కారం సినిమాలో నటిస్తున్న మీనాక్షి చౌదరి కూడా బాలయ్య కు జోడీగా ఈ సినిమాలో నటిస్తుందనే వార్తలు వస్తున్నాయి. మూడో హీరోయిన్‌ విషయంలో సస్పెన్స్ కొనసాగుతోంది.
ఈ సమయంలోనే సినిమాలో నాల్గవ హీరోయిన్‌ గా మిల్కీ బ్యూటీ కనిపించబోతుంది అనే వార్తలు వస్తున్నాయి. అయితే మిల్కీ బ్యూటీ కేవలం ఐటెం సాంగ్ లో మాత్రమే కనిపించే అవకాశాలు ఉన్నాయట. ఈ మధ్య కాలంలో తమన్నా ఐటెం సాంగ్స్ కి మంచి స్పందన దక్కిన విషయం తెల్సిందే. బాబీ గతంలో జై లవకుశ సినిమాలో తమన్నా తో స్వింగ్‌ జర అనే ఐటం సాంగ్ చేయించాడు.
స్వింగ్‌ జర ఐటం సాంగ్ భారీ విజయాన్ని సొంతం చేసుకుంది. అంతే కాకుండా సినిమాకు సంబంధించిన విజయం లో మిల్కీ బ్యూటీ పాత్ర ఉందనే టాక్ కూడా దక్కింది. అందుకే మరోసారి ఆ సెంటిమెంట్‌ ని రిపీట్ చేసే ఉద్దేశ్యంతో దర్శకుడు బాబీ తన తాజా బాలయ్య సినిమాలో తమన్నా తో ఐటం సాంగ్ చేయించాలని నిర్ణయించుకున్నాడని తెలుస్తోంది.
