RC 16లో మున్నా భాయ్?

టాలీవుడ్ స్టార్ హీరో రామ్ చరణ్, డైరెక్టర్ బుచ్చిబాబు కాంబోలో ఓ చిత్రం తెరకెక్కుతున్న విషయం తెలిసిందే. బాలీవుడ్ బ్యూటీ జాన్వీ కపూర్ హీరోయిన్ గా నటిస్తున్న ఆ మూవీ పూజా కార్యక్రమాలు ఇప్పటికే గ్రాండ్ గా జరిగాయి. రీసెంట్ గా షూటింగ్ కూడా మొదలైనట్లు తెలుస్తోంది. బుచ్చిబాబు ఆ విషయాన్ని ఇన్ డైరెక్ట్ గా సోషల్ మీడియాలో రీసెంట్ గానే తెలిపారు.

మైసూర్‌ లోని చాముండేశ్వరి అమ్మవారి దేవాలయాన్ని దర్శించిన ఆయన.. చేతిలో స్క్రిప్ట్‌ పేపర్లతో గుడి బయట దిగిన పిక్ షేర్ చేశారు. తమకు ఈరోజు బిగ్ డే అని.. చాముండేశ్వరి మాత ఆశీస్సులతో ఇది మొదలైందని తెలిపారు. దీంతో మైసూర్ లో తొలి షెడ్యూల్ షూటింగ్ స్టార్ట్ అయినట్లు అర్థమవుతుంది. కొన్ని కీలక సన్నివేశాలను మేకర్స్ షూట్ చేయనున్నారని సమాచారం.

అదే సమయంలో RC16 కోసం మేకర్స్.. అనేక మంది ప్రముఖలను రంగంలోకి దింపుతున్నట్లు తెలుస్తోంది. కన్నడ యాక్టర్ శివ రాజకుమార్ నటిస్తున్నట్లు ఎప్పుడో ప్రకటించేశారు మేకర్స్. రీసెంట్ గా టాలీవుడ్ స్టార్ యాక్టర్ జగపతి బాబును మూవీ టీమ్ లోకి ఆహ్వానించారు. పోస్టర్‌ ను రిలీజ్ చేశారు. థాంక్యూ కమాండర్ అంటూ జగపతి బాబు కూడా ట్వీట్ చేశారు.

అయితే ఇప్పుడు సోషల్ మీడియాలో ఇంట్రెస్టింగ్ అప్డేట్ చక్కర్లు కొడుతోంది. ఫేమస్ వెబ్ సిరీస్ మీర్జాపూర్ ఫేమ్ మున్నా భాయ్ కూడా RC 16లో నటిస్తున్నట్లు తెలుస్తోంది. మున్నా భాయ్ గా ఫుల్ పాపులర్ అయిన దివ్యేందు.. కీలక పాత్ర పోషించనున్నారని సమాచారం. త్వరలోనే మేకర్స్ అఫిషియల్ గా అనౌన్స్ చేయనున్నారని నెట్టింట జోరుగా ప్రచారం సాగుతోంది.

మీర్జాపూర్ సిరీస్ ద్వారా దివ్యేందు ఎంత పాపులర్ అయ్యారో అందరికీ తెలిసిందే. ఇప్పటి వరకు మూడు సీజన్స్ రాగా.. రెండిట్లో మున్నా భాయ్ గా అలరించారు. ఓ రేంజ్ లో మెప్పించారు. మూడో సీజన్ లో మున్నా భాయ్ లేకపోవడంతో ఎంతోమంది నిరాశ కూడా వ్యక్తం చేశారు. అంతలా తన రోల్ లో దివ్యేందు ఆకట్టుకున్నారు. ఇప్పుడు RC 16లో నటిస్తున్నట్లు వార్తలు రావడంతో మెగా అభిమానులు హ్యాపీ ఫీలవుతున్నారు

RC 16 విషయానికొస్తే.. స్పోర్ట్స్ డ్రామాగా బుచ్చిబాబు తెరకెక్కిస్తున్నట్లు తెలుస్తోంది. విలేజ్ బ్యాక్ డ్రాప్ లో కథ రాసుకున్నట్లు సమాచారం. మూవీ కోసం రెండేళ్లుగా వర్క్ చేస్తున్న ఆయన.. రామ్ చరణ్ ను కొత్తగా చూపించనున్నారట. మైత్రీ మూవీ మేకర్స్‌, వృద్ధి సినిమాస్‌, సుకుమార్‌ రైటింగ్స్‌ సంస్థలు కలిసి నిర్మిస్తున్న ఆ చిత్రానికి పెద్ది అనే టైటిల్‌ ఫిక్స్ చేయనున్నారని ఎప్పటి నుంచో వార్తలు వస్తున్నాయి. మరి చూడాలి మేకర్స్ ఏం చేస్తారో..