సెట్లోకి క‌త్తులు తెచ్చి న‌టిని బెదిరించి అసభ్యంగా
ప్రముఖ మ‌ల‌యాళ న‌టిని వెంబ‌డించి మార్గ‌మ‌ధ్యంలో కిడ్నాప్ చేసిన ఘటన కొన్నేళ్లక్రితం సంచ‌ల‌న‌మైన సంగ‌తి తెలిసిందే.
By: Tupaki Desk | 29 Oct 2023 7:42 AM GMT
ప్రముఖ మ‌ల‌యాళ న‌టిని వెంబ‌డించి మార్గ‌మ‌ధ్యంలో కిడ్నాప్ చేసిన ఘటన కొన్నేళ్లక్రితం సంచ‌ల‌న‌మైన సంగ‌తి తెలిసిందే. ఈ కేసులో ప్రముఖ హీరో ప్ర‌మేయం ఉంద‌న్న ఆరోప‌ణ‌ల‌తో అత‌డిపై విచార‌ణ సాగింది. అయితే ఆ ఘటన త‌ర్వాత చెదురుముదురు ఘ‌ట‌న‌లు హెడ్ లైన్స్ లో నిలిచాయి.
ఇప్పుడు ఈ శనివారం నాడు కర్ణాటకలోని చిక్కమగళూరు జిల్లాలో ఒక సినిమా షూటింగ్ సెట్‌లోని ఫ్లోర్‌లోకి ప్రవేశించిన దుండగులు ఒక నటితో అసభ్యంగా ప్రవర్తించడంపై ఫిర్యాదు అందింది. ప్రముఖ నటి శుభపూంజా కన్నడ చిత్రం `కొరగజ్జ` కోసం పాట చిత్రీకరణలో పాల్గొంటున్నారు. అయితే చిత్రీక‌ర‌ణ స‌మ‌యంలో అక్క‌డికి బైక్‌పై వచ్చిన దుండగులు పదునైన ఆయుధాలతో షూటింగ్ ప్రాంతంలోకి చొరబడ్డారు. వారు పూంజతో అనుచితంగా ప్రవర్తించారని, ఆమె చేయి పట్టుకుని లాగేందుకు కూడా ప్రయత్నించారని ఆరోపించారు. ఈ ఘటనతో షూటింగ్‌ను నిలిపివేశారు.
ఈ ఘటన కుద్రేముఖ పోలీస్ స్టేషన్ పరిధిలో జరిగినప్పటికీ చిత్రబృందం దీనిపై అధికారికంగా ఫిర్యాదు చేయలేదు. ఈ ఘటనపై ఫిర్యాదు చేస్తే చర్యలు తీసుకుంటామని పోలీసులు తెలిపారు. లక్షల రూపాయలు వెచ్చించి సెట్‌ను నిర్మించే ముందు సంబంధిత అధికారుల నుంచి అవసరమైన అనుమతులు తీసుకున్నామని, ఇప్పుడు ఈ ఘటనతో పాట చిత్రీక‌ర‌ణ‌ను ఆపేశామ‌ని చిత్ర దర్శకుడు సుధీర్ అత్తవర మీడియాకు తెలిపారు. ఈ బృందం బాలీవుడ్ నుండి ప్రముఖ కొరియోగ్రాఫర్ గణేష్ ఆచార్యను కూడా నియమించుకుంది.
