శెట్టిస్ ట్రైలర్: పెళ్లి వద్దు ప్రెగ్నెంట్ అవుతానంటున్న అనుష్క

జాతిరత్నాలు ఫేమ్ యంగ్ హీరో నవీన్ పోలిశెట్టి- సీనియర్ హీరోయిన్ అనుష్క శెట్టి ప్రధాన పాత్రల్లో నటించిన మూవీ మిస్ శెట్టి మిస్టర్ పోలిశెట్టి. సెప్టెంబర్ 7న ఈ చిత్రం ప్రేక్షకుల ముందుకు వచ్చేందుకు సిద్ధమైంది. ఈ సందర్భంగా మూవీటీమ్.. ట్రైలర్‌ను ఆడియెన్స్ ముందుకు తీసుకొచ్చింది. పాన్ ఇండియా స్టార్ ప్రభాస్ దీన్ని విడుదల చేయడం విశేషం. మూవీటీమ్ కు ఆల్ ది బెస్ట్ చెప్పారు. ఫన్ ఎలిమెంట్స్‌తో పాటు ఫీల్ గుడ్ సీన్స్ తో ట్రైలర్‌ను కట్ చేశారు.

ఈ ప్రచార చిత్రం ఆద్యంతం నవీన్ పోలిశెట్టి కామెడీ టైమింగ్ తో ఆకట్టుకుంటోంది. అమ్మాయిలకి అబ్బాయిలు నచ్చాలంటే చాలా పెద్ద లిస్ట్ ఉంటుంది బ్రో… కానీ అబ్బాయిలకి లిస్ట్ ఉండదు. జస్ట్ అమ్మాయి అయితే చాలు!, సీసీటీవీ కెమెరా ఉంది అక్కడ. వైరల్ అయిపోతాం.. లాంటి ఫన్నీ డైలాగ్స్‌తో నవీన్ పోలిశెట్టి నవ్వించారు. మంచి హిలేరియస్‌గా ఉంది.

ఇంకా ఈ ప్రచారం చిత్రంలో అనుష్కను.. తన కాళ్ళ మీద తాను నిలబడే వ్యక్తిత్వం ఉండే అమ్మాయిలా చూపించారు. ప్రేమ, పెళ్లిపై నమ్మకం లేని ఆమె.. కేవలం తల్లి అవ్వడానికి మాత్రమే ఓ మగాడి హెల్ప్ కావాలి అని నమ్మడం.. అందుకు హీరో సాయం అడగడం.. అందుకు ఆమెను ప్రేమించిన హీరో ఏం చేయాలో తెలీక తనకు కావాల్సింది చేయడానికి హీరో ముందుకెళ్లడం, ఈ క్రమంలోనే జరిగే ఎమోషనల్ రైడర్ ను కాస్త చూపించారు.

ఇక ఈ సినిమాలో నవీన్ పోలిశెట్టి స్టాండప్ కమెడియన్ పాత్రలో, అనుష్క శెట్టి ఫేమస్ షెఫ్ గా కనిపించారు. యూవీ క్రియేషన్స్ బ్యానర్‌పై వంశీ, ప్రమోద్ చిత్రాన్ని నిర్మించారు. 'రారా కృష్ణయ్య' ఫేమ్ పి. మహేష్ బాబు ఈ చిత్రానికి దర్శకత్వం వహించారు.

ఇప్పటికే యూవీ క్రియేషన్స్, అనుష్క కాంబినేషన్‌లో వచ్చిన 'మిర్చి', 'భాగమతి' వంటి సినిమాలు మంచి విజయాలను అందుకున్నాయి. దీంతో ఇప్పుడు మిస్ శెట్టి మిస్టర్ పోలిశెట్టి సినిమాకు హిట్ అవుతుందని ఆశిస్తున్నారు. సెప్టెంబర్ 7న సినిమా.. తెలుగు, తమిళ, కన్నడ, మలయాళ భాషల్లో విడుదల కానుంది. అదే సమయంలో బాలీవుడ్ స్టార్ హీరో షారుక్ ఖాన్ జవాన్ కూడా రిలీజ్ కానుంది.

అనష్క చివరిగా 2018లో 'భాగమతి' ఆ తర్వాత 'నిశ్శబ్దం'తో అమెజాన్ ప్రైమ్ వీడియో ఓటీటీలో సందడి చేసింది. ఆ మధ్యలో మెగాస్టార్ చిరంజీవి 'సైరా నరసింహా రెడ్డి'లో గెస్ట్ రోల్ లో కనిపించింది. ఆమె నటించిన చివరి రెండు సినిమాలు హిట్ కాలేదు. ఎలాగైనా ఈ సినిమా హిట్ అవ్వాలని ఆమె అభిమానులు ఆశిస్తున్నారు. నవీన్ పోలిశెట్టి.. 2021లో వచ్చిన జాతి రత్నాలుతో హిట్ అందుకున్నారు. ఆ తర్వాత ఆయన నటిస్తున్న సినిమా ఇదే కావడం విశేషం. దీంతో పాటే సితార ఎంటర్‌టైన్‌మెంట్స్ బ్యానర్‌పై అనగనగా ఒక రాజు అనే సినిమాను కూడా అనౌన్స్ చేశారు. త్వరలోనే ఆ చిత్ర షూటింగ్ ప్రారంభం కానుంది.