నేచురల్ స్టార్ కోసం కలెక్షన్ కింగ్?

నేచురల్ స్టార్ నాని ఈ ఏడాది ‘సరిపోదా శనివారం’ మూవీతో బ్లాక్ బస్టర్ హిట్ ని అందుకున్నారు. ప్రస్తుతం శైలేష్ కొలను దర్శకత్వంలో ‘హిట్ 3’ మూవీ చేస్తున్నారు. ఈ సినిమా షూటింగ్ దశలో ఉంది. దీని తర్వాత ‘దసరా’ ఫేమ్ శ్రీకాంత్ ఓదేల దర్శకత్వంలో మూవీని సెట్స్ పైకి తీసుకొని వెళ్ళబోతున్నారు. ఈ సినిమాని సుధాకర్ చెరుకూరి భారీ బడ్జెట్ తో నిర్మించడానికి సిద్ధమయ్యారు. ప్రస్తుతం ఈ మూవీ ప్రీప్రొడక్షన్ వర్క్ జరుగుతోంది.

క్యాస్టింగ్ ని ఫైనల్ చేసే పనిలో శ్రీకాంత్ ఉన్నారు. నాని కెరియర్ లోనే మోస్ట్ వైలెంట్ ఫిల్మ్ గా ఈ చిత్రం ఉండబోతోందనే టాక్ వినిపిస్తోంది. ‘దసరా’ కి మించి ఈ చిత్రం హిట్ అవుతుందని శ్రీకాంత్ కూడా గతంలో ట్వీట్ చేశారు. ఇదిలా ఉంటే ఈ సినిమాకి ‘ది ప్యారడైజ్’ అనే టైటిల్ ఫిక్స్ చేసినట్లు ప్రచారం జరుగుతోంది. ఇదిలా ఉంటే ఇప్పటికి ఈ సినిమాకి మ్యూజిక్ డైరెక్టర్ గా అనిరుద్ రవిచందర్ వర్క్ చేయబోతున్నారు. ఇప్పటికే ఈ విషయాన్ని అధికారికంగా కన్ఫర్మ్ చేశారు.

ఇదిలా ఉంటే ఈ సినిమాలో ప్రతినాయకుడి పాత్ర కోసం విలక్షణ నటుడు, కలెక్షన్ కింగ్ మోహన్ బాబుని ఫైనల్ చేసినట్లు తెలుస్తోంది. మోహన్ బాబు విలన్ గా నటించి చాలా కాలం అయ్యింది. ఆయన 2018లో వచ్చిన ‘గాయిత్రి’ మూవీలో ఆయన హీరో క్యారెక్టర్ తో పాటు ప్రతినాయకుడిగా కూడా నటించారు. మోహన్ బాబు విలనిజం గురించి ప్రత్యేకంగా పరిచయం చేయాల్సిన అవసరం లేదు. ఆయన ఏదైనా క్యారెక్టర్ చేస్తున్నాడంటే కచ్చితంగా అందులో ఏదో ప్రత్యేకత ఉండాల్సిందే.

లేదంటే అస్సలు ఒప్పుకోరు. అలాంటిది విలన్ పాత్రలో కనిపించబోతున్నారు అంటే కచ్చితంగా ఈ సినిమాలో అతని క్యారెక్టర్ చాలా స్ట్రాంగ్ గా ఉండే అవకాశాలు ఉండొచ్చనే మాట వినిపిస్తోంది. నేచురల్ స్టార్ నాని రియలిస్టిక్ పెర్ఫార్మెన్స్, మోహన్ బాబు విలక్షణ నటన ఒకే సినిమాలో చూసే అవకాశం ఇప్పుడు ప్రేక్షకులకి రాబోతోంది. మోహన్ బాబు విలన్ గా నటిస్తున్నారనే న్యూస్ బయటకి రావడంతోనే ఈ సినిమాపై హైప్ పెరిగిపోయింది.

ప్రస్తుతం మోహన్ బాబు మంచు విష్ణు కన్నప్పలో నటిస్తున్నారు. అందులో ఆయన క్యారెక్టర్ చాలా పవర్ ఫుల్ గా ఉండబోతోందని తెలుస్తోంది. ఇదిలా ఉంటే మంచు ఫ్యామిలీ నుంచి తండ్రి వారసత్వంతో మంచు మనోజ్ కూడా ప్రతినాయకుడిగా ప్రయత్నం చేస్తున్నాడు. ‘మిరాయ్’ మూవీలో అతను సూపర్ విలన్ క్యారెక్టర్ లో కనిపించబోతున్నాడు. అలాగే ‘భైరవం’లో కూడా నెగిటివ్ షేడ్స్ ఉన్న రోల్ లో నటిస్తున్నాడు.