దేశంలో అత్యుత్తమ ద‌ర్శ‌కుల‌లో ఒక‌డు అవుతాడు: లాల్

న‌టుడు పృథ్వీరాజ్ యాక్సిడెంట‌ల్‌గా ద‌ర్శ‌కుడు కాలేద‌ని, అత‌డి స్థానం ఎప్పుడూ అదేన‌ని సూప‌ర్‌స్టార్ మోహ‌న్ లాల్ అన్నారు. అత‌డు వంద‌శాతం క‌మిట్ మెంట్ తో ప‌ని చేసే ఫిలింమేక‌ర్‌. ఇండ‌స్ట్రీ డైన‌మిక్స్ ని మార్చే సామ‌ర్థ్యం ఉన్నవాడు అని లాల్ ప్ర‌శంసించారు. లూసీఫ‌ర్ సీక్వెల్ ఎంపుర‌న్ త్వ‌ర‌లో విడుద‌ల కానుంది. ఈ చిత్రంలో మ‌రోసారి లాల్ - పృథ్వీరాజ్ క‌లిసి క‌నిపిస్తారు. పృథ్వీరాజ్ వంద‌శాతం దృష్టి పెట్టి ప‌ని చేసిన చిత్ర‌మిద‌ని కూడా మోహ‌న్ లాల్ అన్నారు.

తాజాగా టీజ‌ర్ లాంచ్ వేడుక‌లో పృథ్వీరాజ్ సుకుమార‌న్ పై లాల్ ప్ర‌శంస‌ల వ‌ర్షం కురిపించారు. పృథ్వీరాజ్, అతడి కుటుంబంతో మోహ‌న్ లాల్ ఎంతో స‌న్నిహితంగా ఉంటారు. వారి మ‌ధ్య మంచి స్నేహ సంబంధాలు ఉన్నాయి. అది వారికి వృత్తి ప‌రంగాను ప్ల‌స్ అవుతోంది. వారి క‌ల‌యిక‌లో బ్లాక్ బ‌స్ట‌ర్లు వ‌చ్చి ప‌డుతున్నాయి. ఇప్పుడు ఎంపుర‌న్ కూడా బ్లాక్ బ‌స్ట‌ర్ అవుతుంద‌ని అభిమానులు భావిస్తున్నారు.

పృథ్వీరాజ్ అర్హుడైన ఫిలింమేక‌ర్ అని ప్ర‌శంసించిన మోహ‌న్ లాల్, అవసరమైనప్పుడు అత‌డిలోంచి క్రూరుడు బ‌య‌టికొస్తాడ‌ని కూడా అన్నారు పృథ్వీరాజ్ త్వరలోనే భారతీయ సినీప‌రిశ్ర‌మ‌ అత్యుత్తమ దర్శకులలో ఒకరిగా స్థిరపడతారని లాల్ దృఢమైన నమ్మకాన్ని వ్యక్తం చేశారు. ఫిలింమేకింగ్ లో అత‌డు దార్శ‌నికుడు. పరిశ్రమ మారుతున్న డైనమిక్స్‌తో అభివృద్ధి చెందే స్వ‌భావం అత‌డికి ఉంది. పృథ్వీరాజ్ ప్ర‌తిభ‌, అంకితభావం, నిబద్ధత అతడి పనిలోని ప్రతి అంశంలోనూ స్పష్టంగా కనిపిస్తాయి. స్క్రీన్ ప్లేని రూపొందించే సామర్థ్యంతో పాటు, అతడు పాత్రలను ప్రదర్శించే విధానం ఎంతో గొప్ప‌గా ఉంటుంది.. అని ప్ర‌శంసించారు.

`ఎంపురాన్` మేకింగ్ స‌వాళ్ల గురించి ప్ర‌స్థావిస్తూ.. ఓపిక, పట్టుదలతో చిత్ర‌బృందం చాలా అడ్డంకులను అధిగమించాల్సి వచ్చిందని లాల్ తెలిపారు. ఈ ప్రాజెక్ట్ కోసం పృథ్వీరాజ్ వంద‌శాతం అంకితభావాన్ని చూపించారు. అచంచలమైన నిబద్ధతతో ప‌ని చేసారని అన్నారు. అడ్డంకులు ఎన్ని ఉన్నా, త‌న‌ చిత్ర నిర్మాత ఆంటోనీ పెరుంబవూర్ గొప్ప‌ నమ్మకాన్ని ఉంచినందుకు మోహన్ లాల్ ప్రశంసించాడు.