ఇంట్రెస్టింగ్: మోక్ష‌జ్ఞ మూవీలో విల‌న్‌గా స్టార్ హీరో కొడుకు..?

టాలీవుడ్ సీనియర్ హీరో నందమూరి బాలకృష్ణ తనయుడు మోక్షజ్ఞ తేజ హీరోగా ఎంట్రీ ఇస్తున్న సంగతి తెలిసిందే. 'హనుమాన్' ఫేమ్ ప్రశాంత్ వర్మ చేతుల మీదుగా నందమూరి వారసుడు తెరంగేట్రం చేయడానికి రెడీ అవుతున్నాడు. ఇప్పటికే అతడి డెబ్యూ ప్రాజెక్ట్ ను అధికారికంగా ప్రకటించారు. ప్రస్తుతం ప్రీ ప్రొడక్షన్ స్టేజ్ లో ఉన్న ఈ చిత్రాన్ని త్వరలోనే సెట్స్ మీదకు తీసుకెళ్ళనున్నారు. అయితే ఇప్పుడు ఈ సినిమాలో నటించే ప్ర‌తినాయ‌కుడి పాత్ర గురించి ఓ వార్త చక్కర్లు కొడుతోంది.

ప్రశాంత్ వర్మ సినిమాటిక్ యూనివర్స్ లో భాగంగా నందమూరి మోక్షజ్ఞ డెబ్యూ మూవీ తెరకెక్కనున్నట్లు మేకర్స్ ఇది వరకే ప్రకటించారు. PVCU లో హీరోల పాత్రలు ఎలా ఉంటాయో, విలన్ క్యారెక్టర్స్ కూడా అంతే పవర్ ఫుల్ గా ఉండేలా డిజైన్ చేస్తున్నారు ప్రశాంత్ వర్మ. అందుకే ప్ర‌తినాయ‌కుడి పాత్రల్లో పాపులర్ యాక్టర్స్ ను తీసుకోవాలని భావిస్తున్నారట. ఇందులో భాగంగా మోక్షు సినిమాలో తమిళ్ హీరో ధృవ్ విక్రమ్ ను విలన్ రోల్ కోసం సంప్రదిస్తున్నారనే ఓ ఇంట్రెస్టింగ్ గాసిప్ వినిపిస్తోంది.

కోలీవుడ్ వర్సటైల్ యాక్టర్ చియాన్ విక్రమ్ త‌న‌యుడు ధృవ్ ఇప్పటికే తండ్రి బాటలో ఇండస్ట్రీలో అడుగుపెట్టాడు. అర్జున్ రెడ్డి తమిళ రీమేక్ 'ఆదిత్య వర్మ' సినిమాతో హీరోగా పరిచయమయ్యాడు. ఆ తర్వాత తన తండ్రి విక్రమ్ తో కలిసి 'మహాన్' మూవీ చేశాడు. ఇందులో ధృవ్ కాస్త నెగెటివ్ షేడ్స్ ఉన్న పాత్రలో కనిపించారు. ఈ రెండు సినిమాలూ నటుడిగా మంచి పేరు తెచ్చిపెట్టాయి. ప్రస్తుతం పా.రంజిత్ నిర్మాణంలో మారి సెల్వరాజ్ దర్శకత్వంలో 'బిసోన్' అనే మూవీలో నటిస్తున్నాడు.

హీరోగా ధృవ్ విక్రమ్ బిజీగా మారుతున్న టైంలో, నందమూరి వారసుడికి విలన్ గా నటిస్తారనే రూమర్లు వస్తున్నాయి. అది కూడా కెరీర్ ప్రారంభంలోనే ప్రతినాయకుడిగా నటిస్తాడా? ఇది అయ్యే పనేనా? ఏమో అవ్వొచ్చేమో. ఎందుకంటే ప్రశాంత్ వర్మ సినిమాటిక్ యూనివర్స్ లో విలన్ పాత్రలకు చాలా ప్రాధాన్యత ఉంటుంది. అందులోనూ సినిమాటిక్ యూనివర్స్ లో వచ్చే చిత్రాల్లోనూ భాగమయ్యే అవకాశం ఉంటుంది. కాబట్టి ధృవ్ సైడ్ నుంచి గ్రీన్ సిగ్నల్ వస్తుందేమో. ఇప్పటికైతే యంగ్ హీరోతో దర్శకుడు చ‌ర్చ‌లు జ‌రుపుతున్నారని టాక్ నడుస్తోంది.

మరోవైపు ధృవ్ విక్రమ్ తో 'Rx 100', 'మంగళవారం' ఫేమ్ అజయ్ భూపతి ఓ సినిమా చేస్తారని వార్తలు వస్తున్నాయి. ఇది భారీ బడ్జెట్‌తో తెలుగు, తమిళ భాషల్లో తెరకెక్కే బై లింగ్వల్ మూవీ అని అంటున్నారు. ఇంతలోనే ఇప్పుడు మోక్షజ్ఞ సినిమాలో ధృవ్ విలన్ అని రూమర్లు వినిపిస్తున్నాయి. అటు హీరో, ఇటు విలన్ వార్తలతో విక్రమ్ కొడుకు టాలీవుడ్ లో హాట్ టాపిక్ అయ్యాడు. మరి త్వరలోనే మనోడి తెలుగు డెబ్యూ ఉంటుందేమో చూడాలి.

ఇక మోక్షజ్ఞ డెబ్యూ విషయానికొస్తే, సీనియర్ నటి ర‌వీనా ఠాండ‌న్ కుమార్తె ర‌షా థ‌డానీని హీరోయిన్ గా ఎంపిక చేయనున్నట్లు టాక్స్ నడుస్తున్నాయి. ఆల్రెడీ ఆమెతో ఫొటో షూట్ కూడా చేశారని చెప్పుకుంటున్నారు. ఇక తనయుడి సినిమాలో బాల‌య్య అతిథి పాత్ర‌లో ద‌ర్శ‌న‌మిస్తారనే మాట కూడా గట్టిగానే వినిపిస్తోంది. దీని కోసం ప్రశాంత్ వర్మ మంచి స్క్రిప్ట్ రెడీ చేస్తున్నారని, తండ్రీ కొడుకులను ఒకే ఫ్రేమ్ లోకి తీసుకొస్తానని అంటున్నారు. చూద్దాం.. ఈసారి PVCU లో దర్శకుడు ఎలాంటి మైథలాజికల్ సోషల్ సబ్జెక్ట్ ను డీల్ చేస్తారో!