శాండ్‌విచ్ అయిపోతామని శెట్టి-పొలిశెట్టి భయం

లేడీ సూపర్ స్టార్ అనుష్క తెర మీద కనిపించి చాలా కాలం అయిపోయింది. చాలా గ్యాప్ తర్వాత ఆమె నటించిన సినిమా 'మిస్ శెట్టి మిస్టర్ పొలిశెట్టి'. జాతిరత్నాలు మూవీతో స్టార్ ఇమేజ్ సంపాదించిన నవీన్ పొలిశెట్టితో అనుష్క జట్టు కట్టడంతో ఈ సినిమాపై ప్రేక్షకుల్లో ప్రత్యేక ఆసక్తి నెలకొంది.

ఈ సినిమా కోసం ఎప్పట్నుంచో ఎదురు చూస్తున్నారు ఆడియన్స్. వారి నిరీక్షణకు తెరదించుతూ ఆగస్టు 4న 'మిస్ శెట్టి మిస్టర్ పొలిశెట్టి'ని రిలీజ్ చేయడానికి సన్నాహలు చేశారు. నెల ముందే డేట్ ఇచ్చారు. ఈ దిశగా గత కొన్ని వారాల్లో ప్రమోషన్లు కూడా చేశాడు నవీన్.

త్వరలోనే అనుష్క కూడా రంగంలోకి దిగుతుందని అంచనా వేస్తుండగా.. ఇప్పుడు ప్రేక్షకులకు షాకిస్తూ సినిమాను వాయిదా వేస్తున్నట్లుగా సమాచారం బయటికి వచ్చింది. కొత్త డేట్ ఆగస్టు 18 ఉండొచ్చని భావిస్తున్నారు.

'మిస్ శెట్టి మిస్టర్ పొలిశెట్టి' వాయిదాకు కారణాలు ఏంటన్నది చెప్పట్లేదు కానీ.. ఆగస్టు 4 డేంజరస్ డేట్ అని భావిస్తున్నట్లు సమాచారం. ముందు వారం పవన్ కళ్యాణ్ సినిమా 'బ్రో' రిలీజ్ కానుంది. తర్వాతి వారం భోళా శంకర్, జైలర్ లాంటి భారీ చిత్రాలు వస్తున్నాయి.

ముఖ్యంగా మెగాస్టార్ చిరంజీవి, పవన్ స్టార్ పవన్ కళ్యాణ్ సినిమాలు రెండు వారాల వ్యవధిలో వస్తుంటే.. వాటి మధ్య ఖాళీ దొరికిన వారంలో రిలీజయ్యే సినిమా శాండివిచ్ అయిపోవడం ఖాయం. 'బ్రో' సినిమాకు పాజిటివ్ టాక్ వస్తే రెండో వీకెండ్లో కూడా ప్రభావం ఉంటుంది. 4న 'మిస్ శెట్టి మిస్టర్ పొలిశెట్టి' రిలీజ్ అయితే.. 10కల్లా రజినీ సినిమా 'జైలర్' వచ్చేస్తుంది. తర్వాతి రోజు 'భోళా శంకర్' రిలీజ్. మధ్యలో అనుష్క-నవీన్ సినిమాకు మిగిలింది ఆరు రోజులు మాత్రమే.

ఓవైపు 'బ్రో' ప్రభావాన్ని తట్టుకుంటూ.. మరోవైపు జైలర్, భోళా శంకర్ సినిమాల మీదికి జనాల ఫోకస్ మళ్లకుండా చూడాలంటే శక్తికి మించిన పనే. సినిమా బాగున్నా వసూళ్ల మీద ప్రతికూల ప్రభావం పడుతుంది. అందుకే వాయిదాకు వెళ్లిపోవాలని చిత్ర బృందం భావించినట్లు తెలుస్తోంది.