ఈ వారం ఎన్టీఆర్‌, రజనీ, సమంత సందడే సందడి

గత వారం థియేటర్ల ద్వారా 'క', 'లక్కీ భాస్కర్‌', 'అమరన్‌' సినిమాలు ప్రేక్షకుల ముందుకు వచ్చి విజయాన్ని సొంతం చేసుకున్నాయి. సినిమా ప్రేక్షకులు థియేటర్ల ద్వారా వచ్చే సినిమాలతో పాటు ఓటీటీలో వచ్చే సినిమాల కోసం ఎంతో ఆసక్తిగా ఎదురు చూస్తున్నారు. గత వారం పెద్ద సినిమాలేవీ ఓటీటీ ద్వారా స్ట్రీమింగ్ కాకపోవడంతో ప్రేక్షకులు కాస్త నిరుత్సాహంలో ఉన్నారు. ఈ వారం థియేటర్ల ద్వారా ప్రేక్షకుల ముందుకు చాలా సినిమాలే వస్తున్నాయి. అదే విధంగా ఓటీటీ లోనూ చాలా రోజులుగా ఎదురు చూస్తున్న పెద్ద సినిమాలు స్ట్రీమింగ్‌ కు రెడీ అవుతున్నాయి. ఓటీటీ ప్రేక్షకులు ముఖ్యంగా తెలుగు ప్రేక్షకులకు సందడే సందడి.

ఎన్టీఆర్‌ ఫ్యాన్స్‌తో పాటు తెలుగు ప్రేక్షకులు అంతా చాలా ఆసక్తిగా ఎదురు చూస్తున్న 'దేవర' సినిమా స్ట్రీమింగ్‌ ఈ వారంలోనే ఉంది. కొరటాల శివ దర్శకత్వంలో రూపొందిన దేవర సినిమాను సుధాకర్‌ మిక్కిలినేని, నందమూరి కళ్యాణ్‌ రామ్‌లు భారీ బడ్జెట్‌తో నిర్మించారు. సినిమా రూ.400 కోట్లకు పైగా వసూళ్లు చేసి భారీ విజయాన్ని సొంతం చేసుకుంది. సినిమా విడుదల అయి ఆరు వారాలు కాబోతున్న నేపథ్యంలో సినిమాను ఓటీటీ ప్రేక్షకుల ముందుకు తీసుకు రాబోతున్నారు. ప్రముఖ ఓటీటీ నెట్‌ఫ్లిక్స్‌ ద్వారా దేవర సినిమా 8వ తారీకున ప్రేక్షకుల ముందుకు రాబోతుంది. ఈ విషయమై అధికారికంగా ప్రకటన సైతం వచ్చేసింది.

ఇక సూపర్‌ స్టార్‌ రజనీకాంత్‌ హీరోగా జ్ఞానవేల్‌ దర్శకత్వంలో రూపొందిన వేట్టయాన్‌ సినిమా తమిళనాట భారీ వసూళ్లు సొంతం చేసుకుంది. తెలుగులో పెద్దగా వసూళ్లు రాబట్టలేక పోయినా ఓటీటీ ద్వారా చూడటం కోసం తెలుగు ప్రేక్షకులు చాలా ఆసక్తిగా ఉన్నారు. రజనీకాంత్ వంటి సూపర్‌ స్టార్‌ సినిమాను థియేటర్‌ కి వెళ్లి చూడలేక పోయినా ఓటీటీలో అయినా చూడాలని చాలా మంది స్ట్రీమింగ్‌ కోసం వెయిట్‌ చేస్తున్నారు. ఈనెల 8న అమెజాన్‌ ప్రైమ్‌ లో వేట్టయాన్‌ సినిమా స్ట్రీమింగ్‌ కాబోతున్నట్లుగా అధికారికంగా ప్రకటన వచ్చింది. వేట్టయాన్‌లో మంజు వారియర్ ముఖ్య పాత్రలో నటించింది. సినిమాలోని మనసిలాయో పాటకి తెలుగులోనూ మంచి స్పందన దక్కింది.

స్టార్‌ హీరోయిన్‌ సమంత నటించిన వెబ్‌ సిరీస్ 'సిటాడెల్‌ : హనీ బనీ' సైతం ఈ వారంలోనే అంటే నవంబర్‌ 7న ప్రేక్షకుల ముందుకు రాబోతుంది. అమెజాన్ ప్రైమ్‌ స్ట్రీమింగ్‌ చేయబోతున్న ఈ వెబ్‌ సిరీస్‌లో సమంత చేసిన యాక్షన్‌ సన్నివేశాలు హైలైట్‌గా నిలుస్తాయని మేకర్స్‌ నమ్మకంగా చెబుతున్నారు. సమంత గతంలో నటించిన ది ఫ్యామిలీ మ్యాన్‌ సీజన్‌ 2 వెబ్ సిరీస్‌ ఏ స్థాయి విజయాన్ని సొంతం చేసుకుందో తెల్సిందే. అదే కాంబోలో సమంత చేసిన ఈ సిటాడెల్‌ కి మంచి ప్రీ రిలీజ్ బజ్‌ క్రియేట్‌ అయింది. దాదాపు ఏడాది కాలంగా ఈ వెబ్‌ సిరీస్‌ కోసం ప్రేక్షకులు వెయిట్‌ చేస్తున్నారు. అనారోగ్యంతోనే సమంత ఈ సిరీస్ లో నటించిందని మేకర్స్‌ చెబుతున్నారు. సమంత నుంచి చాలా గ్యాప్‌ తర్వాత రాబోతున్న ప్రాజెక్ట్‌ అవ్వడంతో ఫ్యాన్స్ తో పాటు ప్రేక్షకులు అంతా ఈ సిరీస్ పై ఆసక్తిని కనబర్చుతున్నారు. వరుణ్‌ దావన్‌ ఈ సిరీస్‌ లో లీడ్‌ రోల్‌ లో కనిపించబోతున్నాడు.

ఈ సినిమాలు, వెబ్‌ సిరీస్‌ మాత్రమే కాకుండా మలయాళంలో మంచి విజయాన్ని సొంతం చేసుకున్న ఏఆర్‌ఎం డిస్నీ ప్లస్ హాట్‌స్టార్‌ లో స్ట్రీమింగ్‌ కానుంది. ఈ సినిమాలో ఉప్పెన ముద్దుగుమ్మ కృతి శెట్టి నటించడంతో తెలుగులోనూ భారీగా విడుదల చేయడం జరిగింది. కానీ తెలుగు ప్రేక్షకులు ఈ సినిమాను థియేటర్ల ద్వారా వచ్చినప్పుడు తిరస్కరించారు. అయితే ఓటీటీ లో బేబమ్మ కృతి శెట్టి కోసం ఈ సినిమాను చూసే అవకాశాలు ఉన్నాయనే అభిప్రాయం వ్యక్తం అవుతోంది. ఇతర భాషలకు చెందిన పలు సినిమాలు, సిరీస్‌ లు, షో లు ఈ వారం ప్రేక్షకులకు వినోదాల విందు అందించడం ఖాయం.