సినిమా సినిమాకీ లాంగ్ గ్యాప్.. రీజ‌న్ చెప్పిన‌ మృణాల్

ఏదైనా దీపం ఉన్న‌ప్పుడే ఇల్లు చ‌క్క‌బెట్టుకోవాలంటారు పెద్ద‌లు. అలా కాకుండా అంతా అయిపోయాక ఎంత చ‌క్క‌బెట్టాల‌న్నా మొత్తం శూన్యంలానే క‌నిపిస్తుంది. ఇప్పుడు హీరోయిన్ మృణాల్ ఠాకూర్ ది కూడా అదే సిట్యుయేష‌న్. మొద‌ట బుల్లితెర‌పై సంద‌డి చేసిన ఈ నార్త్ భామ త‌ర్వాత మెల్లిగా సినిమాల్లోకి వ‌చ్చి వెండితెర‌పై క‌నిపించింది.

అయితే మృణాల్ త‌న సినీ జీవితాన్ని ముందుగా మొద‌లుపెట్టింది మ‌రాఠీ సినిమాల‌తో. ఆ త‌ర్వాత బాలీవుడ్ కు వెళ్లి అక్క‌డ ప‌లు హిందీ సినిమాల్లో న‌టించింది. కానీ త‌న శ్ర‌మ‌కు త‌గ్గ ఫ‌లితాన్ని మాత్రం మృణాల్ బాలీవుడ్ లో అందుకోలేక పోయింది. సరిగ్గా అదే టైమ్ లో మృణాల్ కు తెలుగులో సీతారామం సినిమాలో న‌టించే అవ‌కాశం ద‌క్కింది.

సీతారామంలో దుల్క‌ర్ స‌ల్మాన్ స‌ర‌స‌న సీత పాత్ర‌లో న‌టించిన మృణాల్ ఒక్క సినిమాతోనే టాలీవుడ్ ప్రేక్ష‌కుల్ని క‌ట్టిప‌డేసింది. త‌న న‌ట‌న‌తో అంద‌రినీ మెప్పించి వావ్ అనిపించింది. దానికి త‌గ్గ‌ట్టే ఆ సినిమా కూడా బ్లాక్ బ‌స్ట‌ర్ గా నిలిచింది. సీతారామం త‌ర్వాత మృణాల్ కు తెలుగులో వ‌రుస పెట్టి అవ‌కాశాలు వ‌చ్చాయి.

దీంతో ఇక మృణాల్ మ‌ళ్లీ వేరే ఇండ‌స్ట్రీ వైపు చూసింది లేదు. రెండో సినిమాగా నాని తో చేసిన హాయ్ నాన్న సినిమా కూడా సూప‌ర్ హిట్ అయింది. అదే టైమ్ లో మృణాల్ కు కోలీవుడ్ నుంచి శివ కార్తికేయ‌న్ కు జంట‌గా ఏ ఆర్ మురుగ‌దాస్ ద‌ర్శ‌క‌త్వంలో ఓ సినిమా ఛాన్స్ వ‌చ్చింది. కార‌ణాలేంటో తెలీదు కానీ మృణాల్ మాత్రం ఆ అవ‌కాశాన్ని వ‌ద్ద‌నుకుంది.

కోలీవుడ్ ఛాన్స్ వ‌ద్ద‌నుకుని అదే టైమ్ లో మృణాల్ టాలీవుడ్ లో చేసిన ఫ్యామిలీ స్టార్ సినిమా డిజాస్ట‌ర్ అయింది. ఆ త‌ర్వాత నుంచి ఇప్ప‌టివ‌ర‌కు మృణాల్ కు కోలీవుడ్ నుంచి మ‌రో ఆఫ‌ర్ వ‌చ్చింది లేదు. గ్లామ‌ర్ విష‌యంలో ఎలాంటి కండిష‌న్స్ పెట్ట‌క‌పోయినా అమ్మ‌డికి సినిమా అవ‌కాశాలు త‌గ్గాయ‌నేది మాత్రం వాస్త‌వం. అయితే రీసెంట్ గా మృణాల్ ను ఎందుకు ఎక్కువ సినిమాలు చేయ‌డం లేద‌ని అడగ్గా, త‌ను చేస్తున్న పాత్ర‌ల‌ను ఆడియ‌న్స్ ఆద‌రిస్తున్నార‌ని అందుకే పాత్రల ఎంపిక‌లో ఆచితూచి అడుగులేస్తున్న‌ట్టు మృణాల్ తెలిపింది.