ఇలాంటి సినిమాల‌తో స‌భ్య స‌మాజానికి ప్ర‌మాదం: హైకోర్ట్

న్యాయ‌మూర్తుల‌ను, న్యాయ‌వ్య‌వ‌స్థ‌ను చిన్న‌బుచ్చుతూ పోలీసులే ప్ర‌జ‌ల‌కు న్యాయం చేసేయ‌డం సినిమాల్లో ఎక్కువ‌గా చూస్తుంటాం. కోర్టులు చేయ‌లేని విధంగా వ్య‌క్తులు లేదా పోలీసులు సునాయాసంగా న్యాయం చేసేస్తుంటారు. దుర్మార్గుల భ‌ర‌తం ప‌ట్టేస్తుంటారు. దీనిని సినిమాటిక్ లిబ‌ర్టీ అని ప్ర‌జ‌లు, సినీప్రియులు భావించినా కానీ కోర్టులు భావించ‌డం లేదు. తాజాగా కాప్ డ్రామాల్లో ప‌లు అంశాల‌పై ప్ర‌ముఖ న్యాయ‌మూర్తి (జ‌డ్జి) చేసిన వ్యాఖ్య‌లు క‌ల‌క‌లం రేపాయి. దీని ప్ర‌భావం రోహిత్ శెట్టి తెర‌కెక్కించ‌నున్న‌ `సింగం ఎగైన్`పై ప‌డుతుంద‌ని భావిస్తున్నారు. బాంబే హైకోర్టు న్యాయమూర్తి గౌతమ్ పటేల్ అజయ్ దేవగన్ సినిమా సింగంపై విమర్శలు గుప్పించారు. ఈ చిత్రం హానికరమైన సందేశాన్ని ప్ర‌జ‌ల్లోకి పంపుతుందని ఆయన అన్నారు.

రోహిత్ శెట్టి- అజయ్ దేవగన్ బృందం ఇటీవలే సింగం ఎగైన్ షూటింగ్ ను పూజాకార్య‌క్ర‌మాల‌తో లాంచ్ చేసారు. అయితే తాజాగా బాంబే హైకోర్టు న్యాయమూర్తి ప్రకటనతో సినిమా చిక్కుల్లో పడే అవకాశం ఉందని తెలుస్తోంది. సింగం లాంటి సినిమాలు ప్రమాదకరమైన సందేశాన్ని ఇస్తాయని జస్టిస్ గౌతమ్ పటేల్ వ్యాఖ్యానించ‌డం నిర్మాత‌ల్ని ఇప్పుడు ఊహించ‌ని డైల‌మాలో ప‌డేసింద‌ని చెబుతున్నారు. పోలీసు సంస్కరణల దినోత్సవం, వార్షిక దినోత్సవాన్ని పురస్కరించుకుని ఇండియన్ పోలీస్ ఫౌండేషన్ నిర్వహించిన కార్యక్రమంలో, జస్టిస్ గౌతమ్ పటేల్ మాట్లాడుతూ-``సినిమాల్లో న్యాయమూర్తులకు పోలీసులు వ్య‌తిరేకులుగా ఉంటార‌``ని వ్యాఖ్యానించారు. పోలీసులను నాయ‌కుల‌కు విధేయులుగా, పిరికివారుగా, దట్టంగా కళ్లద్దాలు క‌ల‌వారిగా, చాలా చెత్తగా దుస్తులు ధరించే వారిగా తెర‌పై చూపిస్తార‌ని అన్నారు.

సినిమాల్లో పోలీసులు దోషులను విడిచిపెట్టాలని కోర్టులను నిందిస్తారని, కాప్ ఒంటరిగానే అంద‌రికీ న్యాయం చేసేస్తారని ఆయన అన్నారు. ఆ తర్వాత అజయ్ దేవగన్ సినిమా సింగంని ఉద‌హ‌రించారు. సింగం క్లైమాక్స్ సీన్‌లో ప్రకాష్ రాజ్ పోషించిన రాజకీయ నాయకుడిపై మొత్తం పోలీసు బలగాలు దిగినట్లు చూపించారని, ఇప్పుడు న్యాయం జరిగినట్లు చూపించారని ఆయన అన్నారు. సినిమాల ద్వారా ఇది ప్రమాదకరమైన సందేశమని ఆయన పేర్కొన్నారు. నిజానికి ఇలాంటి వాటిలో ఒక ప్రక్రియ ఉందని, నిందితుడు నిర్దోషి లేదా దోషి అనేది కూడా వారే (పోలీసులే) నిర్ణయిస్తారని జస్టిస్ పటేల్ అన్నారు. ``నిజానికి ఈ ప్రక్రియలు నెమ్మదిగా ఉంటాయి... అవి ఉండాలి... ఎందుకంటే వ్యక్తి స్వేచ్ఛను జప్తు చేయకూడదు. షార్ట్‌కట్‌లకు అనుకూలంగా ఈ ప్రక్రియను విరమించినట్లయితే, మేము చట్టం నియమాన్ని తారుమారు చేస్తాము`` అని అన్నారు.

సింగం జూలై 2011లో విడుదలైంది. ఇప్పుడు మళ్లీ సింగం నుంచి కొత్త సినిమా కోసం అభిమానులు ఎదురుచూస్తున్నారు. సింగం ఎగైన్ లో.. అజయ్ దేవగన్ సింగం పాత్రలో క‌నిపించ‌నుండ‌గా, రణవీర్ సింగ్ సింబాగా, అక్షయ్ కుమార్ వీర్ సూర్యవంశీగా నటించ‌నున్నారు. ఈ సినిమాలో దీపికా పదుకొణె కూడా లేడీ కాప్‌గా కనిపించనుంది. ఈ చిత్రంలో కరీనా కపూర్‌ ఖాన్‌ అజయ్ దేవగన్ భార్యగా మళ్లీ నటించనుంది. ఈ నెలాఖరు నుంచి క‌రీనా షూటింగ్ లో చేర‌నుంది. సింగం ఎగైన్ భారతదేశంతో పాటు విదేశాలలో తెర‌కెక్క‌నుంది. సింగం ఘ‌న‌విజ‌యం త‌ర్వాత ఈ ఫ్రాంఛైజీలో వ‌రుస‌గా సినిమాల్ని తెర‌కెక్కించేందుకు రోహిత్ శెట్టి భారీ ప్ర‌ణాళిక‌లను క‌లిగి ఉన్నారు. త్వ‌ర‌లో సింగం ఎగైన్ రెగ్యుల‌ర్ చిత్రీక‌ర‌ణ‌కు వెళ్ల‌నుంది. కానీ ఇంత‌లోనే జ‌డ్జి గారి వ్యాఖ్య‌లు క‌ల‌వ‌ర‌పాటుకు గురి చేసేవిగా ఉన్నాయి. ఇలాంట‌ప్పుడు సింగం క‌థ‌ల‌తో ఇక‌పైనా రోహిత్ శెట్టి సాహ‌సాలు చేస్తారా? అన్న‌ది చ‌ర్చ‌గా మారింది.