గ్రేట్ కంబ్యాక్ కోసం సౌత్ స్టార్ డైరెక్టర్ త‌ప‌న‌!

త‌మిళ స్టార్ డైరక్ట‌ర్ ఏ.ఆర్.మురుగ‌దాస్ కి దేశ‌వ్యాప్తంగా అద్భుత‌మైన ఫాలోయింగ్ ఉన్న సంగ‌తి తెలిసిందే. ముఖ్యంగా అత‌డు తెర‌కెక్కించిన 'గ‌జిని' అటు త‌మిళం ఇటు తెలుగులో పెద్ద విజ‌యం సాధించింది. ఇదే చిత్రాన్ని అమీర్ ఖాన్ క‌థానాయ‌కుడిగా హిందీలో రీమేక్ చేయ‌గా అక్క‌డా బంప‌ర్ హిట్ కొట్టింది. అమీర్ ఖాన్ కి తొలి 100 కోట్ల క్ల‌బ్ చిత్రంగా గ‌జిని రికార్డుల‌కెక్కింది. ఆ త‌ర్వాతా ముర‌గ‌దాస్ హిందీలో అక్ష‌య్, సోనాక్షి స‌హా ప‌లువురు సూప‌ర్ స్టార్ల‌తో ప‌ని చేసారు. దేశంలోని ప్ర‌ధాన భాష‌ల్లో అత‌డి సినిమాలు బ్లాక్ బ‌స్ట‌ర్లు అయ్యాయి. అత‌డి ఆలోచ‌నా వైవిధ్యం, విల‌క్ష‌ణ‌త‌, ప్ర‌యోగాత్మ‌క‌త అంద‌రికీ న‌చ్చాయి. కానీ ఇటీవ‌లి కాలంలో అత‌డు సైలెంట్ గా ఉన్నాడు. సూప‌ర్ స్టార్ ర‌జ‌నీకాంత్ తో 'ద‌ర్బార్' ఫెయిల‌య్యాక చాలా గ్యాప్ తీసుకున్నాడు. శివ‌కార్తికేయ‌న్ తో సినిమా ప్ర‌స్తుతం చిత్రీక‌ర‌ణ ద‌శ‌లో ఉంది. కానీ ఇంత‌లోనే స‌ల్మాన్ తో భారీ ప్రాజెక్టును ప్ర‌క‌టించి ఆశ్చ‌ర్య‌ప‌రిచాడు.

ఈ ప్ర‌క‌ట‌న అనంత‌రం మురుగ‌దాస్ ఈజ్ బ్యాక్ ఎగైన్! అంటూ అభిమానుల్లో ఉత్సాహం నెల‌కొంది. మురుగ‌దాస్ నుంచి ఫైనెస్ట్ యాక్ష‌న్ సినిమాల‌ను చూడబోతున్నామ‌ని అభిమానులు భావిస్తున్నారు. ముఖ్యంగా స‌ల్మాన్ ఖాన్ లాంటి దిగ్గ‌జ యాక్ష‌న్ స్టార్ తో అతడు భారీ ప్ర‌యోగం చేయ‌బోతున్నాడు. క‌బీర్ ఖాన్ (భ‌జ‌రంగి భాయిజాన్), అలీ అబ్బాస్ జాఫ‌ర్ (టైగ‌ర్ జిందా హై), ప్ర‌భుదేవా లాంటి డైరెక్ట‌ర్ల‌కు భిన్న‌మైన సినిమాని అభిమానుల‌కు అందిస్తాడని అంతా ఆస‌క్తిగా వేచి చూస్తున్నారు. గ‌జిని, ర‌మ‌ణ (ఠాగూర్), తుపాకి, సెవెంథ్ సెన్స్ లాంటి ప్ర‌యోగాత్మ‌క చిత్రాల‌ను రూపొందించిన మురుగ‌దాస్ ఈసారి ఎలాంటి స్క్రిప్టును ఎంచుకున్నాడు? యాక్ష‌న్ కామ‌న్ గా ఉండే అత‌డి సినిమాల్లో థీమ్, లాజిక్ క‌చ్ఛితంగా మెస్మ‌రైజ్ చేస్తాయి. ఈసారి కూడా అలాంటి ఒక ప్ర‌యోగాత్మ‌క క‌థ‌తో స‌ల్మాన్ కి బంప‌ర్ హిట్ ఇవ్వ‌బోతున్నాడా? అంటూ అంతా ఆస‌క్తిగా వేచి చూస్తున్నారు.

ఇటీవ‌లి కాలంలో స‌ల్మాన్ నుంచి వైవిధ్య‌మైన సినిమా ఏదీ రాలేదు. అత‌డు రొటీన్ గా స్పై యాక్ష‌న్ సినిమాల‌తో స‌రిపెట్టుకున్నాడు. అందుకు భిన్నంగా ఏదైనా చేయాల‌నే ప్ర‌య‌త్నంలో భాగంగానే మురుగ‌దాస్ తో ప‌ని చేస్తున్నాడు. క‌బీర్, అలీ అబ్బాస్ జాఫ‌ర్, ప్ర‌భుదేవా లాంటి వారిని కాద‌ని అత‌డు ఒక సౌత్ డైర‌క్ట‌ర్ ని ఎంపిక చేయ‌డం వెన‌క భారీ పాన్ ఇండియా ప్ర‌ణాళిక దాగి ఉంద‌ని అభిమానులు భావిస్తున్నారు.

ఈద్ 2024 కి సల్మాన్ నుంచి సినిమా ఏదీ విడుద‌ల కాలేదు.. కానీ దానిని భర్తీ చేయడానికి మురుగ‌దాస్ తో 'సికందర్' అనే భారీ ప్రాజెక్ట్‌ను ప్ర‌క‌టించారు. చిత్రీకరణ జూన్ 2024 లో ప్రారంభం కానుంది. మురుగదాస్ ప్రస్తుతం తమిళ స్టార్ శివకార్తికేయన్ (తాత్కాలికంగా SK23 అనే పేరు పెట్టారు) ప్ర‌ధాన పాత్ర‌లో యాక్షన్ చిత్రం తెర‌కెక్కిస్తున్నారు. స‌ల్మాన్ తో సినిమా ప‌ట్టాలెక్క‌డానికి ముందే SK23 చిత్రీక‌ర‌ణ మెజారిటీ భాగం పూర్తి చేయ‌డానికి ప్ర‌య‌త్నిస్తున్నారు. ప్లాన్‌లో భాగంగా మేలో మేలో సికందర్ ప్రారంభ షెడ్యూల్ పూర్తిచేసి.. ఆ తర్వాత జూన్‌లో శివకార్తికేయన్ సినిమా మెజారిటీ పార్ట్ పూర్తి చేస్తాడు. అటుపై జూలై నుంచి మురుగదాస్ తన పూర్తి దృష్టిని సికిందర్‌పైనే ఉంచుతాడ‌ని తెలిసింది. ఈద్ 2025 విడుదలను లక్ష్యంగా సినిమాని పూర్తి చేసేందుకు అన్నివిధాలా శ్ర‌మిస్తాడ‌ని కూడా తెలుస్తోంది.

సికంద‌ర్ మొదటి షెడ్యూల్ ముంబైలో జరుగుతుంది. ప్రస్తుతం లొకేష‌న్ల‌ను ఖరారు చేయడానికి లొకేషన్ స్కౌటింగ్ జ‌రుగుతోంది. సల్మాన్ ఖాన్ మే నెలాఖరులో సికంద‌ర్ షూట్ లో పాల్గొంటారు. అటుపై జూన్ 20 తర్వాత ప్రిన్సిపల్ ఫోటోగ్రఫీ మొద‌ల‌వుతుంద‌ని తెలిసింది. మురుగ‌దాస్ సినిమాల్లో యాక్ష‌న్ కి చాలా ఎక్క‌వ ప్రాధాన్య‌త ఉంటుంది. ఇప్ప‌టికే యాక్షన్ డైరెక్టర్లు సెట్ల‌లో స్టంట్ సీక్వెన్సుల‌ కొరియోగ్రఫీలో బిజీగా ఉన్నార‌ని కూడా తెలిసింది. సల్మాన్ ఖాన్ ని దీనికోసం ప్రిపేర్ చేయిస్తున్నార‌ట‌. ఈ యాక్ష‌న్ సీన్స్ కోసం స‌ల్మాన్ జిమ్ లో శ్ర‌మిస్తూ త‌న రూపాన్ని మార్చుకుంటున్నార‌ని కూడా తెలుస్తోంది. ముంబై, హైద‌రాబాద్ లో చిత్రీక‌ర‌ణ సాగే ఈ సినిమాలో ర‌ష్మిక మంద‌న్న క‌థానాయిక‌గా న‌టిస్తున్న సంగతి తెలిసిందే.

అకీరా (2016) తర్వాత హిందీలో ఎనిమిదేళ్ల విరామం తీసుకున్న‌ మురుగదాస్ సికందర్ తో ఘ‌న‌మైన కంబ్యాక్ ని చాటుకోవాల‌ని ప్ర‌యత్నిస్తున్న‌ట్టు తెలిసింది. ఈ ప్రాజెక్ట్ ని కిక్, జుద్వా, ముజ్సే కరోగి కరోగి వంటి బ్లాక్‌బస్టర్ హిట్‌ల ను నిర్మించిన సాజిద్ నడియాడ్‌వాలా నిర్మిస్తున్నారు. గ్రేట్ కంబ్యాక్ కోసం సౌత్ స్టార్ డైరెక్టర్ మురుగ‌దాస్ త‌ప‌న ఏమేర‌కు వ‌ర్క‌వుట‌వుతుందో వేచి చూడాలి.