ప్రభాస్ స్పిరిట్.. అప్పుడే ఓ పని మొదలైంది

సందీప్ రెడ్డి వంగా యానిమల్ తో బాక్సాఫీస్ దగ్గర భారీ విజయం సాధించిన విషయం తెలిసిందే. అయితే ఈ విజయం తరువాత, ఆయన రెబల్ స్టార్ ప్రభాస్‌తో స్పిరిట్ అనే ప్రాజెక్ట్ చేసేందుకు రెడీ అవుతున్నారు. ఈ సినిమా కోసం అభిమానులు ఎంతగానో ఎదురుచూస్తున్నారు. ఈరోజు ఈ ప్రాజెక్ట్‌కు సంబంధించిన అప్డేట్ వచ్చి అందరిలో హర్షం నింపింది.

ఇక సినిమాకి స్పిరిట్ అనే పవర్ఫుల్ టైటిల్‌ను ఫైనల్ చేశారు. అయితే, ఈ సినిమా షూటింగ్ మొదలవ్వడానికి ఇంకా కొంత సమయం పడుతుంది. ప్రభాస్ ప్రస్తుతం ఇతర సినిమాల షూటింగ్ షెడ్యూల్‌లో బిజీగా ఉన్నాడు. ఇక ఆ లోపు స్పిరిట్ ప్రీ ప్రొడక్షన్ పనులు ఫినిష్ చేయాలని సందీప్ రెడ్డి వంగా స్పీడ్ పెంచాడు. ముఖ్యంగా మ్యూజిక్ విషయంలో కూడా ముందే జాగ్రత్తలు తీసుకుంటున్నారు.

సందీప్ రెడ్డి వంగా గతంలో చేసిన అర్జున్ రెడ్డి మరియు యానిమల్ సినిమాలకు బ్యాక్ గ్రౌండ్ మ్యూజిక్ అందించిన హర్షవర్ధన్ రామేశ్వర్ ఈ సినిమాకు కూడా వర్క్ చేయబోతున్నారు. ముఖ్యంగా సాంగ్స్ ని కూడా అతనే కంపోజ్ చేయనున్నట్లు తెలుస్తోంది. దీపావళి సందర్భంగా సందీప్ ట్వీట్ చేస్తూ స్పిరిట్ మ్యూజిక్ సిట్టింగ్స్ మొదలయ్యాయని వెల్లడించడం, ప్రభాస్ ఫ్యాన్స్‌కు ప్రత్యేక ఆనందాన్ని కలిగించింది.

ఇక స్పిరిట్ ముందుగా ప్రభాస్ పూర్తి చేయాల్సిన ప్రాజెక్టులు ఉన్నాయి. మారుతి దర్శకత్వంలో రాజా సాబ్ అనే హారర్ కామెడీ సినిమా ప్రస్తుతం షూటింగ్ దశలో ఉంది, 2025 ఏప్రిల్ 10 ఈ సినిమా థియేటర్లలోకి రానుంది. అదే సమయంలో, హను రాఘవపూడి దర్శకత్వంలో మరో సినిమా కూడా పూర్తి చేయాల్సి ఉంది. ఈ ప్రాజెక్టులను ముగించిన తరువాత మాత్రమే ప్రభాస్ స్పిరిట్ షూటింగ్‌లో పాల్గొంటారని సమాచారం.

అలాగే ప్రభాస్ రెండు సీక్వెల్ ప్రాజెక్టులు కూడా పూర్తి చేయాల్సి ఉంటుంది. ప్రశాంత్ నీల్ దర్శకత్వంలో తెరకెక్కిన యాక్షన్ థ్రిల్లర్ సలార్ అభిమానుల హృదయాలను గెలుచుకుంది. ఆ చిత్రంలో కాటేరమ్మ ఫైట్ సీక్వెన్స్ ప్రేక్షకులందరికీ గూస్ బంప్స్ తెప్పించింది. ఈ సినిమాకు సీక్వెల్ కూడా త్వరలో షూట్ ప్రారంభం కానుంది. అలాగే, నాగ్ అశ్విన్ దర్శకత్వంలో రూపొందుతున్న కల్కి 2898 ఎడీ కూడా సీక్వెల్ రూపంలో పూర్తి చేయాల్సి ఉంది.

స్పిరిట్లో ప్రభాస్ ఒక పవర్‌ఫుల్ పోలీస్ పాత్రలో కనిపించబోతున్నారు. ఈ పాత్ర కోసం ప్రభాస్ పూర్తిగా కొత్త మేకోవర్‌లో కనిపిస్తారని సమాచారం. అందుకే ఇతర ప్రాజెక్టుల కోసం ప్రభాస్ డేట్స్ కేటాయించకుండా, పూర్తి ఫోకస్‌తో స్పిరిట్ కోసం మాత్రమే పని చేయాలని సందీప్ రెడ్డి వంగా కోరుకున్నట్లు తెలుస్తోంది. స్పిరిట్ కోసం ప్రభాస్ అన్ని షెడ్యూల్‌లను ముగించుకుని అందులో నిమగ్నమయ్యేలా ప్లాన్ చేసారని తెలుస్తోంది.