మనోళ్లు అనిరుధ్ కి అంత ఫ్రీడమ్ ఇచ్చేనా?

తమిళ్‌ ఇండస్ట్రీలోనే కాకుండా మొత్తం సౌత్ ఇండస్ట్రీలో మరియు బాలీవుడ్ లో కూడా తనదైన పాపులారిటీని సొంతం చేసుకున్న సంగీత దర్శకుడు అనిరుధ్‌. చిన్న వయసులోనే సంగీత దర్శకుడిగా జర్నీ మొదలు పెట్టిన అనిరుధ్‌ తమిళ్‌ లో రెహమాన్ తర్వాత ఆ స్థాయి గుర్తింపును దక్కించుకున్నాడు. రెహమాన్ ఎలా అయితే పాన్ ఇండియా రేంజ్ లో దున్నేశాడో అలాగే అనిరుధ్ కూడా కుమ్మేస్తున్నాడు.

తాజాగా ఒక ఇంటర్వ్యూలో అనిరుధ్ చేసిన వ్యాఖ్యలు ప్రస్తుతం వైరల్‌ అవుతున్నాయి. తమిళ్ తో పాటు ఇతర భాషల్లో అనిరుధ్ చేసిన సినిమా ల్లో ఎక్కువ శాతం మ్యూజికల్ హిట్స్ గా నిలిచిన విషయం తెల్సిందే. అలా హిట్స్ పడటానికి ముఖ్య కారణం తనకు దర్శకులు పూర్తి స్వేచ్చ ఇస్తారు అని, వారు ఇచ్చే స్వేచ్చ కారణంగానే హిట్స్ పడుతున్నాయి అన్నాడు.

నెల్సన్‌ దిలీప్ జైలర్‌ సినిమా కోసం ఒకే ఒక్క పాట అనుకున్నాడట. కానీ అనిరుధ్ స్క్రిప్ట్‌ అంతా విన్న తర్వాత షూటింగ్ అంతా పూర్తి అయిన తర్వాత మరో రెండు పాటలు ఉంటే బాగుంటుందని భావించి తానే స్వయంగా ట్యూన్ చేసి దర్శకుడిని ఒప్పించాడట. ఇక లోకేష్ కనగరాజ్ కి అనిరుధ్‌ ఎంత చెప్తే అంత అన్నట్లుగా ఉంటుందట.

ఇద్దరి మధ్య ఉన్న అవగాహణ నేపథ్యం లో ప్రతి సినిమా కూడా మ్యూజికల్‌ గా బ్లాక్ బస్టర్ అవుతుంది. విక్రమ్ సినిమా కు అనిరుధ్ ఇచ్చిన బ్యాక్ గ్రౌండ్‌ స్కోర్ విషయం లో దర్శకుడి పట్టింపు అస్సలు లేదు. పూర్తిగా అనిరుధ్ ఛాయిస్ తో రూపొందినట్లుగా చెబుతున్నారు. మొత్తానికి తనకు అవకాశం ఇవ్వాలే కానీ అద్భుతాలు సృష్టిస్తాను అన్నట్లుగా అనిరుధ్ పేర్కొన్నాడు.

తెలుగు లో బ్యాక్ టు బ్యాక్ సినిమాలతో అనిరుధ్ ప్రేక్షకుల ముందుకు రాబోతున్నాడు. ఇతర భాషల ఫిల్మ్‌ మేకర్స్ తో పోల్చితే మన తెలుగు ఫిల్మ్‌ మేకర్స్ అన్ని తాము అనుకున్నట్లుగా ఉండాలి, తమకు నచ్చి జరగాలి అనుకుంటారు. కనుక అనిరుధ్ కి పూర్తి స్వేచ్చ దక్కేనా అంటూ కొందరు కామెంట్స్‌ చేస్తున్నారు. ఎవరో ఒకరు అయినా అనిరుధ్ కి పూర్తి స్వేచ్ఛ ఇచ్చి ఒక మంచి ఆల్బం చేయిస్తే బాగుండు అన్నట్లుగా తెలుగు ప్రేక్షకులు ఎదురు చూస్తున్నారు.