మైత్రి మూవీ మేక‌ర్స్.. అదంతా ఫేక్ న్యూస్

ఎన్నో ఆశ‌లు పెట్టుకున్న 'లాల్ సింగ్ చ‌డ్డా' అమీర్ ఖాన్‌ని తీవ్ర నిరాశ‌కు గురి చేసిన సంగ‌తి తెలిసిందే. ఈ సినిమా డిజాస్ట‌ర్ ఫ‌లితం అత‌డు ఊహించ‌నిది. ఆ త‌ర్వాత అమీర్ చాలా గ్యాప్ తీసుకున్నాడు. తారే జ‌మీన్ పార్ సినిమాకి సీక్వెల్ క‌థ‌ను నిర్మించేందుకు ఓకే చేసాడు కానీ, తాను పూర్తి స్థాయి పాత్ర‌లో న‌టించే ఏ ఇత‌ర సినిమాకి సంత‌కం చేయ‌లేదు. అమీర్ కథానాయకుడిగా తన తదుపరి చిత్రాన్ని ఇంకా ప్రకటించలేదు.

ఇలాంటి స‌మ‌యంలో బిగ్ అప్ డేట్ అంటూ సోష‌ల్ మీడియాల్లో షాకింగ్ పోస్ట‌ర్ ప్ర‌త్య‌క్ష‌మైంది. ఈ పోస్ట‌ర్ లో అమీర్ ఖాన్ - మైత్రి మూవీ మేక‌ర్స్ సినిమాని ప్ర‌క‌టించేయ‌డం ఆశ్చ‌ర్య‌ప‌రిచింది. అమీర్ ఖాన్ క‌థానాయ‌కుడిగా లోకేష్ క‌న‌గ‌రాజ్ ద‌ర్శ‌క‌త్వంలో టాలీవుడ్ అగ్ర నిర్మాణ సంస్థ మైత్రి భారీ చిత్రానికి స‌న్నాహ‌కాలు చేస్తోంద‌ని క‌థ‌నాలు వైర‌ల్ అయ్యాయి.

క‌ట్ చేస్తే, అది నిజం కాద‌ని తేలింది. అదంతా సోష‌ల్ మీడియా ప్ర‌చారం మాత్ర‌మే. ఇందులో ఎలాంటి నిజం లేద‌ని మైత్రి స‌న్నిహిత వ‌ర్గాలు చెబుతున్నాయి. స‌ల్మాన్ ఖాన్ తో ఒక క‌మిట్ మెంట్ ఉంది. అలాగే లోకేష్ క‌న‌గ‌రాజ్ తోను ఒప్పందం ఉంది. కానీ అమీర్ ఖాన్ తో ఎలాంటి ఒప్పందం లేదు. అత‌డికి అడ్వాన్సులు కూడా ఏమీ ఇవ్వ‌లేద‌ని తెలుస్తోంది. మైత్రీ మూవీ మేకర్స్ గతంలో అమీర్ ఖాన్‌ను కలిశారు కానీ ఇంకా ఏదీ ఖరారు కాలేదు. ఇవ‌న్నీ ఊహాగానాలేనని సన్నిహిత వర్గాలు తెలిపాయి.

మైత్రి సంస్థ ప్ర‌స్తుతం వెట‌ర‌న్ హీరో సన్నీడియోల్ ప్రధాన పాత్రలో తొలి హిందీ చిత్రాన్ని నిర్మిస్తోంది. ఈ చిత్రానికి గోపీచంద్ మలినేని దర్శకత్వం వహిస్తున్నారు. త‌దుప‌రి స‌ల్మాన్, అమీర్ ల‌తోను మైత్రి సంస్థ‌ ప‌ని చేసే అవ‌కాశం ఉంది. కానీ అధికారికంగా వివ‌రాలు వెల్ల‌డించాల్సి ఉంటుంది.