కంగువా 'నాయకా'.. దేవిశ్రీ పవర్ ఫుల్ ట్యాన్ అదిరిందిగా!

కోలీవుడ్ స్టార్ హీరో సూర్య.. కంగువా సినిమాతో ప్రేక్షకుల ముందుకు వచ్చేందుకు సిద్ధమవుతున్న విషయం తెలిసిందే. సిరుతై శివ దర్శకత్వం వహిస్తున్న ఆ సినిమా.. పాన్ ఇండియా లెవెల్ లో తెరకెక్కుతోంది. బాలీవుడ్ బ్యూటీ దిశా పటానీ హీరోయిన్ గా నటిస్తుండగా.. బాబీ డియోల్ కీలక పోషిస్తున్నారు. అత్యంత భారీ బడ్జెట్ తో యూవీ క్రియేషన్స్, స్టూడియో గ్రీన్‌ పతాకంపై కేఈ జ్ఞానవేల్ రాజా గ్రాండ్ గా పీరియాడికల్ యాక్షన్ గా డ్రామాగా రూపొందిస్తున్నారు.

నవంబర్ 14వ తేదీన సినిమాను రిలీజ్ చేస్తున్నట్లు మేకర్స్ ఇప్పటికే అనౌన్స్ చేశారు. ఆ తర్వాత ప్రమోషన్స్ స్టార్ట్ చేశారు. రీసెంట్ గా ట్రైలర్ ను విడుదల చేయగా మంచి రెస్పాన్స్ వచ్చింది. అద్భుతమైన విజువల్స్, ఉత్కంఠభరితమైన యాక్షన్‌ తో ప్రేక్షకులను ఆకట్టుకుంది. సినిమాపై అంచనాలు పెంచింది. ఇప్పుడు మూవీ యూనిట్.. ప్ర‌మోష‌న‌ల్ కార్య‌క్ర‌మాల్లో వేగం పెంచింది. కంగువా నుంచి వ‌రుస‌గా సాంగ్స్ ను విడుద‌ల చేస్తోంది. రీసెంట్ గా నాయకా సాంగ్ ను విడుద‌ల చేసింది.

నాయకా... నాయకా అంటూ సాగుతున్న పాట.. సోషల్ మీడియాలో ఓ రేంజ్ లో వైరల్ అవుతోంది. యూట్యూబ్ లో టాప్-10 ట్రెండింగ్ లో ఉంది. అందరికీ గూస్ బంప్స్ తెప్పిస్తోంది. సాంగ్ లో సూర్య అవతార్ చూసి అంతా షాక్ అవుతున్నారు. వేరే లెవెల్ లో ఆయన ఆకట్టుకుంటున్నారు. తమ నాయకుడి గొప్పతనాన్ని శక్తివంతమైన వ్యాఖ్యలతో పాట ద్వారా కీర్తిస్తున్నట్లు అర్థమవుతుంది. రాకేందు మౌళి అందించిన అద్భుతమైన సాహిత్యానికి అనేక మంది గాత్రంతో ప్రాణం పోశారు.

అరవింద్ శ్రీనివాస్, దీపక్ బ్లూ, షెంబాగ్రాజ్, నారాయణ్ రవిశంకర్, గోవింద్ ప్రసాద్, సిబి శ్రీనివాసన్, ప్రసన్న అభిషేష్, సాయి శరణ్, విక్రమ్ పిట్టి, అభిజిత్ రావు, అపర్ణ హరి కుమార్, సుస్మిత నరసింహన్, పవిత్రా చారి, లవితా లోబో, దీప్తి సురేష్, లత, కృష్ణ, పద్మజ శ్రీనివాసన్ కలిసి పాడారు. టాలీవుడ్ స్టార్ మ్యూజిక్ డైరెక్టర్ దేవిశ్రీ ప్రసాద్ పవర్ ఫుల్ ట్యూన్ అందించారు. తన టాలెంట్ ఏంటో ప్రూవ్ చేసుకున్నారు. ఓ రేంజ్ లో తన మ్యూజిక్ తో మెప్పించారు.

లిరికల్ సాంగ్ లో విజువల్స్ కూడా చాలా బాగున్నాయి. ప్రతి ఫ్రేమ్ లో క్వాలిటీ కనిపిస్తుంది. ఓవరాల్ గా సాంగ్ అందరినీ ఆకట్టుకుంటోంది. అయితే పదికి పైగా భాషల్లో తెరకెక్కుతున్న కంగువా.. 2D, 3D, IMAX ఫార్మాట్స్ లో కూడా రిలీజ్ అవ్వనుంది. నైజాంలో ప్రముఖ డిస్ట్రిబ్యూషన్ కంపెనీ మైత్రీ మూవీ డిస్ట్రిబ్యూటర్స్ విడుదల చేయనుంది. మరి భారీ అంచనాల మధ్య ప్రేక్షకుల ముందుకు రాబోతున్న కంగువా చిత్రం ఎలాంటి హిట్ అవుతుందో వేచి చూడాలి.