నాగచైతన్య థ్రిల్లర్ కోసం లక్కీ హీరోయిన్

అక్కినేని నాగచైతన్య ఈసారి బాక్సాఫీస్ వద్ద దండయాత్ర చేసేందుకు చాలా స్ట్రాంగ్ గా సిద్దమవుతున్నాడు. అతని కెరీర్ లోనే అత్యంత భారీ బడ్జెట్ తో తెరకెక్కుతున్న సినిమా తండేల్. ప్రస్తుతం పూర్తిగా దానిపైనే దృష్టి పెట్టారని అనిపిస్తోంది. చందూ మొండేటి దర్శకత్వంలో ఎంతో ప్రతిష్టాత్మకంగా తెరకెక్కుతున్న ఈ సినిమాలో చైతన్య నెవ్వర్ బిఫోర్ అనేలా కనిపించబోతున్నారు. అసలైతే డిసెంబర్ లోనే రావాల్సిన ఈ సినిమా ఊహించని కారణాల వలన వాయిదా పడక తప్పలేదు.

ఇక నవంబర్ ముగిసేలోపు ఈ చిత్ర షూటింగ్‌ను పూర్తిచేయాలని చైతన్య నిర్ణయించుకున్నాడు. దీని తర్వాత ఆయన తన తదుపరి చిత్రానికి ప్రణాళికలు సిద్ధం చేస్తున్నారు. విరూపాక్ష ఫేమ్ కార్తిక్ వర్మ దండు దర్శకత్వంలో చైతన్య తదుపరి సినిమా తెరకెక్కనుంది. డిసెంబర్ 11న హైదరాబాద్‌లో ఈ చిత్ర షూటింగ్ ప్రారంభం కానుంది. ఈ చిత్రంలో చైతన్య సరసన ఎవరు నటిస్తున్నారు అనే విషయంలో అనేక రకాల గాసిప్స్ వైరల్ అయ్యాయి.

ఇక లేటెస్ట్ గా అందుతున్న సమాచారం ప్రకారం వరుస చిత్రాలతో బిజీగా ఉన్న మీనాక్షి చౌదరి ఎంపికైనట్లు సమాచారం. కాంబో సెట్టయితే చైతన్య, మీనాక్షి కలిసి పనిచేసే తొలి చిత్రం ఇదే అవుతుంది. ఇటీవల లక్కీ భాస్కర్ తో మీనాక్షి బిగ్ సక్సెస్ అందుకున్న విషయం తెలిసిందే. ఇక ఆమె నటించిన మట్కా కూడా ఇటీవల విడుదలవగా అది అంతగా క్లిక్కవ్వలేదు. ఇక నెక్స్ట్ మెకానిక్ రాకీ అనే సినిమా రాబోతోంది.

ఇక నాగచైతన్య మీనాక్షి జోడి తెరపై కొత్తగా అనిపిస్తుందని టీమ్ భావించింది. మీనాక్షి ప్రస్తుతం పలు సినిమాలతో బిజీగా ఉంది. మెకానిక్ రాకీతో పాటు వెంకటేశ్ నటిస్తున్న సంక్రాంతికి వస్తున్నాం సినిమాలో కూడా మీనాక్షి కీలక పాత్రలో నటిస్తోంది. తాజా సమాచారం ప్రకారం, ఆమె ఈ మధ్యే చైతన్య సినిమాలో సైన్ చేసినట్లు తెలుస్తోంది. ఈ సినిమాలో మరో హీరోయిన్ పాత్రలో పూజా హెగ్డే నటించనున్నట్లు గుసగుసలు వినిపిస్తున్నాయి.

బివిఎస్ఎన్ ప్రసాద్ ఈ చిత్రాన్ని నిర్మిస్తున్నారు. వచ్చే ఏడాదిలోనే ఈ సినిమాను ప్రేక్షకుల ముందుకు తీసుకురావాలని నిర్మాతలు ప్లాన్ చేస్తున్నారు. విరూపాక్ష లాంటి మిస్టిక్ థ్రిల్లర్ కథాంశంతోనే ఈ సినిమా రూపొందనున్నట్లు టాక్. మీనాక్షి చౌదరి లాంటి గ్లామరస్ నటి, చైతన్య సరసన నటించబోతుండటంతో ఈ జంటపై అభిమానుల్లో మంచి ఆసక్తి నెలకొంది. ఇక నాగచైతన్య ఈమద్య కంప్లీట్ గా స్టైల్ మార్చేశాడు. కొత్త తరహా కథాంశాలను ఎంచుకుంటూ, కొత్త దర్శకులతో ప్రయోగాలు చేస్తుండటం ఆయన కెరీర్‌కు కొత్త మలుపు తెస్తుంది. ఇక తండేల్ తో బిగ్ సక్సెస్ అందుకుంటే నెక్స్ట్ సినిమాలపై మరింత హైప్ పెరిగే అవకాశం ఉంటుంది.