నాగ్ లీక్డ్ వీడియో వైరల్

ఒకప్పుడు హిందీలో ప్రత్యేక పాత్రలు పోషిస్తూ అక్కడి ప్రేక్షకులను ఆకట్టుకున్నారు టాలీవుడ్ సీనియర్ హీరో అక్కినేని నాగార్జున. ఐతే మధ్యలో ఎందుకో పర భాషల్లో నటించడం తగ్గించేశారు. తెలుగులో హీరోగా మాత్రమే సినిమాలు చేస్తూ వచ్చారు. కానీ ఈ మధ్య వివిధ భాషల్లో మళ్లీ స్పెషల్ రోల్స్ చేయడం మొదలుపెట్టారు. ‘బ్రహ్మాస్త్ర’లో ఆయన పోషించిన పాత్రకు మంచి స్పందనే వచ్చింది.

ప్రస్తుతం తెలుగు, తమిళ భాషల్లో తెరకెక్కుతున్న ‘కుబేర’లో ఓ ముఖ్య పాత్ర చేస్తున్నారు. అలాగే సూపర్ స్టార్ రజినీకాంత్ మూవీ ‘కూలీ’లో సైతం సైమన్ అనే పాత్రలో నటిస్తున్న విషయం ఇటీవలే వెల్లడైంది. బంగారం స్మగ్లింగ్ నేపథ్యంలో నడిచే ఈ చిత్రంలో నాగ్‌ది డాన్ తరహా పాత్ర అని అంటున్నారు. ఈ సినిమా షూటింగ్ స్పాట్ నుంచి లీకైన నాగ్ వీడియో ఒకటి ఇప్పుడు సోషల్ మీడియాలో వైరల్ అవుతోంది.

నాగ్ డైలాగ్స్ చెబుతుండగా.. ఎవరో షూటింగ్ స్పాట్ నుంచి వీడియో తీశారు. అదిప్పుడు సోషల్ మీడియాలోకి వచ్చి వైరల్ అవుతోంది. ఈ సీన్ తాలూకు సెటప్ అంతా భారీగానే కనిపిస్తోంది. నాగ్ గెటప్, డైలాగ్స్ చూస్తే కొంచెం నెగెటివ్ టచ్ ఉన్న పాత్రలా అనిపిస్తోంది. షేడ్స్ ఎలా ఉన్నా సరే.. నాగ్ చాలా స్టైలిష్‌గా కనిపిస్తున్నాడీ క్యారెక్టర్లో. ‘కూలీ’లో నాగ్‌తో పాటు ఉపేంద్ర ఓ ప్రత్యేక పాత్ర పోషిస్తున్న సంగతి తెలిసిందే. మలయాళ విలక్షణ నటుడు షోబిన్ కూడా ఓ స్పెషల్ రోల్‌లో కనిపించనున్నాడు. ‘లియో’తో నిరాశపరిచిన లోకేష్ కనకరాజ్ ఈ సినిమాతో బలంగా బౌన్స్ బ్యాక్ అవుతాడని ప్రేక్షకులు అంచనా వేస్తున్నారు. ఈ చిత్రం వచ్చే వేసవిలో ప్రేక్షకుల ముందుకు వస్తుంది.