మల్టీస్టారర్‌ పై మరింత క్లారిటీ..!

భాష ఏదైనా మల్టీ స్టారర్ సినిమాలు అంటే ఆ క్రేజ్ వేరు. ఇక పెద్ద హీరోల యొక్క మల్టీ స్టారర్ సినిమా లు అంటే ఉండే క్రేజ్ అంతా ఇంతా కాదు. ఇప్పుడు అందరి దృష్టి కూడా శేఖర్‌ కమ్ముల దర్శకత్వంలో రాబోతున్న క్రేజీ మల్టీస్టారర్ సినిమా పై ఉంది అనడంలో ఎలాంటి సందేహం లేదు.

ధనుష్ హీరోగా శేఖర్‌ కమ్ముల దర్శకత్వంలో సినిమా కోసం చాలా కాలం క్రితమే ప్రయత్నాలు ప్రారంభం అయ్యాయి. దాదాపు రెండేళ్ల క్రితం అధికారికంగా ప్రకటన వచ్చింది. కానీ ఇప్పటి వరకు క్లాప్‌ పడింది లేదు. ఆ మధ్య సినిమా ను పక్కన పెట్టేశారా అనే అనుమానాలు వ్యక్తం అయ్యాయి.

ఇటీవల శేఖర్ కమ్ముల దర్శకత్వంలో ధనుష్ హీరోగా రూపొందబోతున్న సినిమాలో నాగార్జున కీలక పాత్రలో నటించబోతున్నాడు అనే క్లారిటీ వచ్చింది. ఆ విషయం పై నాగార్జున మొదటి సారి స్పందించాడు. తన నా సామి రంగ సినిమా ప్రమోషన్ లో భాగంగా శేఖర్ కమ్ముల దర్శకత్వంలో చేయబోతున్న సినిమా గురించి స్పష్టతను ఇచ్చాడు.

ఈ నెలలోనే 25వ తారీకున సినిమా యొక్క అధికారిక ప్రారంభోత్సవం జరుగబోతుంది అంటూ ప్రకటించాడు. అంతే కాకుండా సినిమాకు సంబంధించిన షూటింగ్ కార్యక్రమాలను అతి త్వరలోనే ప్రారంభించే విధంగా ప్రీ ప్రొడక్షన్ వర్క్ జరుగుతున్నట్లు తెలుస్తోంది.

అన్నీ అనుకున్నట్లుగా జరిగితే ఈ క్రేజీ మల్టీస్టారర్ మూవీ ని ఇదే ఏడాది ద్వితీయార్థంలో విడుదల చేసే విధంగా దర్శకుడు శేఖర్ కమ్ముల ప్లాన్‌ చేస్తున్నాడు. ధనుష్ సార్‌ సినిమా తో తెలుగు లో మంచి విజయాన్ని సొంతం చేసుకున్నాడు. కనుక ఈ సినిమా పై అంచనాలు పెరిగాయి.