32 ఏళ్ళ తర్వాత విలన్ గా కింగ్ నాగ్?

కింగ్ అక్కినేని నాగార్జున ఆరు పదులు దాటిన వయసుల్లోనూ రెట్టింపు ఉత్సాహంతో పని చేస్తున్నారు. ఓవైపు సినిమాలు చేస్తూనే, మరోవైపు హోస్టుగా బుల్లితెర మీద అదరగొడుతున్నారు. గత కొంతకాలంగా నాగ్ తన ఏజ్ కు తగ్గ పాత్రల్లోనే నటిస్తున్నారు. కథానాయకుడిగా నటిస్తూనే, పాత్ర నచ్చితే స్పెషల్ రోల్స్ చేయడానికి కూడా రెడీ అవుతున్నారు. ఇందులో భాగంగా ఆయన ఇప్పుడు ప్రతినాయకుడి పాత్ర పోషించడానికి గ్రీన్ సిగ్నల్ ఇచ్చారని తాజాగా ఓ క్రేజీ రూమర్ సోషల్ మీడియాలో చక్కర్లు కొడుతోంది.

సూపర్ స్టార్ రజనీకాంత్, డైరెక్టర్ లోకేష్ కనగరాజ్ కాంబినేషన్ లో 'కూలీ' అనే సినిమా తెరకెక్కుతున్న సంగతి తెలిసిందే. ఇప్పటికే అధికారికంగా ప్రకటించబడిన ఈ పాన్ ఇండియా మూవీ ఈ మధ్యనే సెట్స్ మీదకు వెళ్ళింది. ఆ సమయంలో కింగ్ నాగ్ ఓ కీలక పాత్రలో నటించనున్నట్లు వార్తలు వచ్చాయి. అయితే అది విలన్ రోల్ అని టాక్ వినిపిస్తోంది. రజనీకి ధీటుగా ఉండే క్యారక్టర్ కావడంతో నాగార్జున ఓకే చెప్పారని, లోకేశ్ ఆయన్ను చాలా కొత్తగా ప్రెజెంట్ చేయబోతున్నారని కోలీవుడ్ వర్గాలు అంటున్నాయి.

నిజానికి నాగార్జున కెరీర్ ప్రారంభం నుంచీ వైవిధ్యమైన చిత్రాలు, విలక్షమైన పాత్రల్లో నటిస్తూ ట్రెండ్ సెట్టర్ అనిపించుకున్నారు. ఎప్పుడూ ఒకే రకమైన ఇమేజ్ కు పరిమితం అవ్వకుండా, ఎప్పటికప్పుడు డిఫరెంట్ స్టోరీలు ట్రై చేస్తూ వస్తున్నారు. రామ్ గోపాల్ వర్మ దర్శకత్వంలో తెరకెక్కిన 'అంతం' మూవీలో తొలిసారిగా నెగెటివ్ షేడ్స్ ఉన్న పాత్రలో కనిపించారు. మూడు దశాబ్దాల తర్వాత మళ్ళీ ఇన్నాళ్లకు 'కూలీ' సినిమాలో విలన్ రోల్ చేయడానికి నాగ్ పచ్చజెండా ఊపారని ప్రచారం సాగుతోంది.

ఇదే నిజమైతే నాగార్జున, రజనీకాంత్ కలిసి నటించే ఫస్ట్ మూవీ 'కూలీ' అవుతుంది. డైరెక్టర్ లోకేష్ కనగరాజ్ తన సినిమాల్లో విలన్ రోల్స్ ను కూడా నెక్స్ట్ లెవల్ లో చూపిస్తుంటారు. 'విక్రమ్' చిత్రంలో సూర్య పోషించిన రోలెక్స్ పాత్రకు ఎంత మంచి పేరొచ్చిందో ప్రత్యేకంగా చెప్పాల్సిన పని లేదు. ఇప్పుడు నాగ్ ను కూడా అలాంటి వైవిధ్యమైన పాత్రలోనే చూపించే అవకాశం ఉందని సినీ అభిమానులు భావిస్తున్నారు. దీనిపై మేకర్స్ సైడ్ నుంచి త్వరలోనే అఫీషియల్ అనౌన్స్ మెంట్ వస్తుందేమో చూడాలి.

ఇదిలా ఉంటే ఈ ఏడాది సంక్రాంతికి 'నా సామిరంగా' సినిమాతో సూపర్ హిట్ కొట్టిన నాగార్జున.. ప్రస్తుతం తమిళ హీరో ధనుష్ తో కలిసి 'కుబేర' అనే మల్టీస్టారర్ పాన్ ఇండియా చిత్రంలో నటిస్తున్నారు. శేఖర్ కమ్ముల దర్శకత్వం వహిస్తున్న ఈ సినిమాలో ఆయనొక పవర్ ఫుల్ పోలీసాఫీసర్ గా కనిపించనున్నారు. అలానే ఓ తమిళ దర్శకుడితో ఓ ప్రాజెక్ట్ కు కమిటైనట్లు టాక్ వచ్చింది. ఇక ఎస్.ఎస్. రాజమౌళి, సూపర్ స్టార్ మహేష్ బాబు కాంబోలో రూపొందనున్న SSMB29లోనూ నాగ్ భాగం అవుతారని అనుకుంటున్నారు. ఆగస్టు 29న కింగ్ బర్త్ డే సందర్భంగా వీటిల్లో కొన్నింటిపైనా అయినా క్లారిటీ వచ్చే అవకాశం ఉంది.