ఆ జెర్సీలో నాగవంశీ.. నెట్టింట సినిమా కోసం అలా..

టాలీవుడ్ యంగ్ ప్రొడ్యూసర్ నాగవంశీ తనకంటూ ప్రత్యేక గుర్తింపు సంపాదించుకున్న విషయం తెలిసిందే. సితార ఎంటర్టైన్మెంట్స్ బ్యానర్ పై బ్యాక్ టు బ్యాక్ సినిమాలు నిర్మిస్తూ మంచి హిట్లు అందుకుంటున్నారు. హారిక అండ్ హాసినీ క్రియేషన్స్‌ అధినేత, తన బాబాయ్ అయిన రాధాకృష్ణ అండదండలతో తక్కువ టైమ్ లోనే సితారను అగ్ర నిర్మాణ సంస్థగా తీర్చిదిద్దారు. త్వరలోనే మరిన్ని సినిమాలను తీసుకురానున్నారు నాగవంశీ.

అయితే టాలీవుడ్ లో ఎంతోమంది నిర్మాతలు ఉన్నా.. కొందరే సోషల్ మీడియాలో యాక్టివ్ గా కనిపిస్తుంటారు. ఫ్యాన్స్ తో డైలీ టచ్ లో ఉంటారు. ఎప్పటికప్పుడు అప్డేట్స్ ఇస్తూ ఉంటారు. అలాంటి వారిలో ముందువరుసలో ఉండే నాగవంశీ పెట్టిన లేటెస్ట్ ఇన్ స్టాగ్రామ్ పోస్ట్ ఇప్పుడు వైరల్ గా మారింది. ఇటీవల తన పుట్టిన రోజును జరుపుకున్న ఆయన ప్రస్తుతం ఫారిన్ ట్రిప్ లో ఉన్నారు. పారిస్ లో సెలబ్రేషన్స్ జరుపుకుని రీసెంట్ గా స్పెయిన్ వెళ్లారు.

ఇప్పుడు స్పెయిన్ వీధుల్లో ఫుల్ ఎంజాయ్ చేస్తున్న ఆయన.. ఆ దేశ FC బార్సిలోనా జెర్సీ వేసుకున్న పిక్ ను షేర్ చేశారు. ఇటీవల జరిగిన యూరో కప్ ఫైనల్‌ లో ఇంగ్లండ్‌ ను 2-1 తేడాతో ఓడించి స్పెయిన్ రికార్డు స్థాయిలో నాలుగోసారి యూరోపియన్ ఛాంపియన్‌ షిప్‌ ను గెలుచుకుంది. దీంతో నాగవంశీ.. స్పెయిన్ ప్లేయర్ అయిన లామిన్ యమల్ పేరు ఉన్న జెర్సీ వేసుకుని అతడి పట్ల అభిమానాన్ని వ్యక్తం చేశారు. ఫుట్ బాల్ పై తన ఆసక్తిని కనబరిచారు.

ఇక స్పెయిన్‌ కు చెందిన 17 ఏళ్ల లామిన్ యమల్ యూరో కప్ ఫైనల్‌ లో ఆడిన అతి పిన్న వయసు గల ఆటగాడిగా నిలిచాడు. పైనల్ లో 47వ నిమిషంలో మొదటి గోల్ చేశాడు. ఇప్పుడు నాగవంశీ పోస్ట్ పెట్టడంతో.. యమల్ కోసం తెలియని చాలా మంది నెట్టింట వెతికి మరీ తెలుసుకుంటున్నారు. అయితే బార్సిలోనా జెర్సీ వేసుకుని నాగవంశీ పోస్ట్ పెట్టడంతో.. ఆయన నిర్మించిన సూపర్ హిట్ మూవీ జెర్సీ ప్రస్తావనను ఇప్పుడు నెటిజన్లను తీసుకొస్తున్నారు.

నేచురల్ స్టార్ నాని హీరోగా ఆయన నిర్మించిన జెర్సీ మూవీ బ్లాక్ బస్టర్ హిట్ అయింది. గౌతమ్ తిన్ననూరి దర్శకత్వం వహించిన ఆ సినిమా భారీ వసూళ్లు రాబట్టింది. 2019 జాతీయ చల‌న‌చిత్ర అవార్డుల్లో ఉత్త‌మ తెలుగు చిత్రంగా పుర‌స్కారాన్ని గెలుచుకుంది. ఆ సినిమాకు వర్క్ చేసిన న‌వీన్ నూలి ఉత్త‌మ ఎడిట‌ర్‌ గా కూడా అవార్డు అందుకున్నారు. అయితే ప్రెజెంట్ పోస్ట్ కు జెర్సీ మూవీకి ఎలాంటి సంబంధం లేకపోయినా.. జస్ట్ అంతా గుర్తు చేసుకుంటున్నారు.