నాని ప్యారడైజ్.. స్టార్ క్యాస్ట్ కోసం గట్టిగానే..

నేచురల్ స్టార్ నాని ప్రస్తుతం ‘హిట్ 3’ మూవీ చేస్తున్నారు. దీని తర్వాత ‘దసరా’ ఫేమ్ శ్రీకాంత్ ఓదేల దర్శకత్వంలో సినిమా ఉండబోతోంది. 2025లో ఈ మూవీ షూటింగ్ మొదలు కాబోతున్నట్లు తెలుస్తోంది. ప్రస్తుతం ఈ సినిమా ప్రీప్రొడక్షన్ పనులు జరుగుతున్నాయి. అలాగే ఈ సినిమా క్యాస్టింగ్ ని ఫైనల్ చేసే పనిలో డైరెక్టర్ శ్రీకాంత్ ఉన్నారు. ఇదిలా ఉంటే ఇప్పటికే ఈ సినిమాకి మ్యూజిక్ డైరెక్టర్ గా అనిరుద్ రవిచందర్ ని కన్ఫర్మ్ చేశారు.

ఇక సినిమాలో ప్రతినాయకుడిగా కలెక్షన్ కింగ్ మోహన్ బాబుని ఎంపిక చేసినట్లు టాక్ వినిపిస్తోంది. చాలా ఏళ్ళ తర్వాత వేరొక హీరో సినిమాలో మోహన్ బాబు విలన్ గా నటించబోతున్నాడనే వార్త ఇప్పుడు హాట్ టాపిక్ గా మారింది. కచ్చితంగా నేచురల్ స్టార్ నానికి, మోహన్ బాబుకి పెర్ఫార్మెన్స్ పరంగా మంచి పోటీ ఉండబోతోందని అనుకుంటున్నారు. ఇదిలా ఉంటే ఈ సినిమాలో మరో సీనియర్ హీరో కూడా కీలక పాత్రలో నటించబోతున్నాడంట.

అయితే అతను ఎవరనేది క్లారిటీ లేదు. త్వరలో ఈ క్యాస్టింగ్ గురించి పూర్తిస్థాయిలో స్పష్టత వస్తుందని అనుకుంటున్నారు. అలాగే హీరోయిన్స్ గా చాలా మంది పేర్లు పరిశీలిస్తున్నారంట. గతంలో జాన్వీ కపూర్ పేరు ప్రముఖంగా వినిపించింది. అయితే అలాగే మరికొంతమంది బాలీవుడ్ బ్యూటీస్ పేర్లు కూడా తెరపైకి వచ్చాయి. శ్రీకాంత్ ఓదేల ‘ది ప్యారడైజ్’ సినిమా కోసం స్టార్ క్యాస్టింగ్ ని లైన్ లోకి తీసుకుంటున్నాడని ఇండస్ట్రీలో అనుకుంటున్నారు.

పాన్ ఇండియా రేంజ్ లోనే ఈ మూవీ తెరకెక్కబోతున్నట్లు టాక్ వినిపిస్తోంది. ‘దసరా’ సినిమాని నిర్మించిన సుధాకర్ చెరుకూరి ఈ చిత్రాన్ని భారీ బడ్జెట్ తో నిర్మించబోతున్నారు. సుమారు 100-120 కోట్ల మధ్యలో ఈ సినిమాకి బడ్జెట్ అవుతుందని అనుకుంటున్నారు. దసరాతో నానికి 100 కోట్ల కలెక్షన్స్ ని శ్రీకాంత్ ఇచ్చారు. ఈ మూవీతో దర్శకుడిగా అతని ఇమేజ్ కూడా పెరిగింది. ఇప్పుడు రెండో సినిమాని నానితోనే చాలా గ్రాండియర్ గా సిల్వర్ స్క్రీన్ పై ఆవిష్కరించడానికి సిద్ధమవుతున్నాడు.

మరి ఈ మూవీతో నాని, శ్రీకాంత్ ఎలాంటి ఎక్స్ పెక్టేషన్స్ క్రియేట్ చేస్తారు అనేది ఇప్పుడు ఆసక్తికరంగా మారింది. ‘ది ప్యారడైజ్’ అనే పేరు కూడా ఇంగ్లీష్ మూవీ టైటిల్ లా ఉంది. ఇలాంటి టైటిల్ తో శ్రీకాంత్ ఏ తరహా కథ చెప్పబోతున్నాడు అనే ఆసక్తి అందరిలో ఉంది.