నాని - శ్రీకాంత్.. ఇంకాస్త కొత్తగా!

ఎలాంటి సినీ బ్యాక్ గ్రౌండ్ లేకుండా ఇండస్ట్రీలోకి ఎంట్రీ ఇచ్చిన హీరో నాని.. తనకంటూ ప్రత్యేక గుర్తింపు సంపాదించుకున్న విషయం తెలిసిందే. తన యాక్టింగ్ తో నేచురల్ స్టార్ గా పేరు సంపాదించుకున్న ఆయన వరుస చిత్రాలతో ఆడియన్స్ ను అలరిస్తున్నారు. గత ఏడాది దసరా, హాయ్ నాన్న మూవీలతో ప్రేక్షకుల ముందుకు వచ్చిన నాని.. ఇప్పుడు సరిపోదా శనివారం చేస్తున్నారు. త్వరలోనే ఈ సినిమా థియేటర్లలో సందడి చేయనుంది.

అయితే అప్పటి వరకు సాఫ్ట్ అండ్ కూల్ రోల్స్ లో తన సినిమాల్లో కనిపించిన నాని.. దసరాలో రా అండ్ రగ్డ్ లుక్ లో అదరగొట్టారు. మునుపెన్నడూ చూడని క్యారెక్టర్‌ లో నానిని ప్రెజెంట్ చేసిన క్రెడిట్ డైరెక్టర్ శ్రీకాంత్ ఓదెలకే దక్కుతుంది. తెలంగాణ బ్యాక్‌ డ్రాప్‌ లో రూపొందిన దసరా మూవీ రూ.120 కోట్లకుపైగా క‌లెక్ష‌న్స్ రాబ‌ట్టింది. గ‌త ఏడాది టాలీవుడ్‌ లో అత్య‌ధిక వ‌సూళ్ల‌ను రాబ‌ట్టిన సినిమాల్లో ఒక‌టిగా కూడా దసరా చిత్రం నిలిచింది.

ఇక దసరా తర్వాత నాని, శ్రీకాంత్ ఓదెల కాంబినేషన్ లో మరో మూవీ రాబోతున్న విషయం తెలిసిందే. ఇప్పటికే మేకర్స్ ప్రీ లుక్ పోస్టర్ రిలీజ్ చేయగా.. మంచి రెస్పాన్స్ వచ్చింది. పోస్టర్ అదిరిపోయేలా ఉంది. ప్రస్తుతం ప్రీప్రొడక్షన్ దశలో ఉన్న ఈ సినిమా కోసం హైద‌రాబాద్ బ్యాక్‌ డ్రాప్‌ లో మాస్ స్టోరీని శ్రీకాంత్ ఓదెల సిద్ధం చేసిన‌ట్లు తెలుస్తోంది. 1990 టైమ్ పీరియడ్ లో సినిమా కథ సాగుతుందని కొద్ది రోజులుగా వార్తలు వినిపిస్తున్నాయి.

ద‌స‌రా సినిమా త‌ర‌హాలో ఇందులో కూడా ఔట్ అండ్ ఔట్ మాస్ లీడ్ క్యారెక్ట‌ర్‌ లో నాని కనిపించనున్నట్లు టాక్ వినిపిస్తోంది. మూవీ కోసం నాని మరింత కొత్తగా మేకోవర్ చేసుకోనున్నట్లు సమాచారం. నాని, శ్రీకాంత్ ఓదెల మూవీకి రాక్ స్టార్ దేవిశ్రీప్ర‌సాద్ మ్యూజిక్ అందించ‌నున్న‌ట్లు వినికిడి. వ‌చ్చే ఏడాది జ‌న‌వ‌రి నుంచి ఈ సినిమా సెట్స్‌ పైకి వెళ్లనుందని తెలుస్తోంది. దసరా నిర్మాత సుధాకర్ చెరుకూరి భారీ బడ్జెట్ తో నిర్మించనున్నారు.

ప్ర‌స్తుతం నాని.. స‌రిపోదా శ‌నివారం మూవీ షూటింగ్‌ తో బిజీగా ఉన్నారు. ఫుల్ యాక్ష‌న్ ఎంట‌ర్టైన‌ర్‌ గా తెర‌కెక్కుతున్న ఈ సినిమాకు వివేక్ ఆత్రేయ ద‌ర్శ‌క‌త్వం వ‌హిసున్నారు. అంటే సుంద‌రానికి త‌ర్వాత మరోసారి నాని.. వివేక్ ఆత్రేయతో చేతులు కలిపారు. ప్రియాంక మోహ‌న్ హీరోయిన్‌ గా నటిస్తోంది. ఆగస్టు 29వ తేదీన సినిమా రిలీజ్ కానుంది. మరి ఈ మూవీతో నాని.. హ్యాట్రిక్ హిట్ అందుకుంటారో లేదో వేచి చూడాలి.